Read Yucateco Isaías 34 Bible Online

Isaías 34 - Yucateco bible

Isaías 34

¹Caaje'ex nadzjaba'ex u'uyaj; múuch' caaje'ex ch'en xiquinene'ex tu jaajil a wóole'ex. U'uyajnac lu'um yéetel tuláacal u cajnáalilo'ob, yóokolcaab yéetel tuláacal ba'ax cu yantali',

²Tumen Yuumtzile' p'uja'an yéetel múuch' caajo'ob bey xan yéetel u aj ba'atelo'ob, dzo'oc u xot kintico'ob u ti'al xu'ulsaj yéetel quíimil.

³Quimeno'obe' bíin xúunp'attaco'ob, bíin jóokoc u tu'il u booc u quimen wíinclilo'ob bíin xan áalcabnac ki'ik te j witzo'obo'.

⁴Tuláacal u eekilo'ob ca'an bíin mix ba'alcunsa'aco'ob, ca'ane' bíin u codzubáa bey jun wáal ju'une' bíin láaj tu'uplajac xan le eeko'obo', je'el bix u tijil yéetel u júutul u le' uva, wa u le' x ko'och cu t'o'ocol tu kabo'.

⁵U máascab Yuumtzile' bíin chíicpajac te j ca'ano', bin u ca'aj lúubul tu yóokol Edom le caaj xotkinta'an u ti'al quíimilo'.

⁶U máascab Yuumtzile' bíin pakbanac yéetel ki'ik, bíin xan ch'albanac yéetel tzaatz, je'el bix u yúuchul tu kiinil u quíimsa'al mejen j tamano'ob yéetel x yuuco'ob u ti'al j kubbil ti' Yuumtzil. Yuumtzile' bin u ca'aj u beet jun p'éel quíimsaj Bosra, bin u ca'aj u beet jun p'éel nojoch quíimsaj tu lu'umil Edom.

⁷Bíin lúubuco'ob bey je'el bix u lúubul bufalo'ob, mejen wacaxo'ob yéetel le nucuch wacaxo'obo', u lu'umo'obe' bíin pakbanac yéetel ki'ik, u ma'ay lu'umile' bíin ch'albanac yéetel tzaatz.

⁸Lelo', u kiinil u sutic u jeel loob Yuumtzil, u ja'abil u su'utul jeel ba'ax beeta'ab ti' Sión.

⁹U t'o'ol ja'ilo'obe' bíin suunaco'ob bey iitze', u lu'umile' bíin suunac bey asufre; lu'umo' bíin elec bey u yelel iitze'.

¹⁰Mix yéetel kiin, mix yéetel áakab bíin tu'upuc; mantadz bíin líikic u buudzil. Bíin xúunp'atta'ac u ti'al ja'abilo'ob; mix máac bíin ca'a káataqui'.

¹¹Ti' bíin cajlac tunculuchu yéetel xooch', ti' bíin u beet u ku' j ch'oomi' bey xan x t'óojcab x nuuc. Yuumtzile' bíin u sut x tocoy lu'umil mix máac bíin cajlaqui'.

¹²Ma' bíin ca'a yanac jun túul ajaw u ti'al méektáantiqui'; ma' bíin p'áatac mix jun túul u nuuquilo'obi'.

¹³Tu jalach najilo'obe' bíin nuucchajac u ki'ixelo'ob, bey xan u tuulumilo'ob bíin lo'oboc yéetel láalo'ob bey yéetel x teeso'ob. Bíin suunac u cúuchil u cajtal u peekilo'ob káax u cúuchil xan u ta'acbesicuba'ob avestruso'ob.

¹⁴Ch'omaco'obo', bíin múul cajlaco'ob yéetel u peekilo'ob káax, x yuuco'obo' bíin u t'anuba'ob tu baatzilo'ob. Yéetel áakabe' ti' bíin yanac ja'asaj óoli', ti' bíin yanac tu'ux u je'eleli'.

¹⁵Ti' bíin u beet u ku xooch'i', ti' bíin e'elnaqui', bíin xan u jóokes u mejenilo'ob, bíin u much'quinto'ob u ti'al u cananto'ob. Ti' xan bíin u much'juba'ob le j ch'úuyo'obo', tu jujun túulilo'ob, u j xiibile' yéetel u x ch'uupil.

¹⁶Xoque'ex u dzíib Yuumtzil u ti'al ca a wile'ex: Ma' bíin u binet mix jun túul ti' le ba'alche'obo', mix jun túul bíin p'áatac x ma' ch'uupili', tumen bey u tucultmail Yuumtzil, chéen yéetel u yustaj bíin u much'quito'obi'.

¹⁷Dzo'oc u ye'esic u cúuchil ti' u jujun túulil, yéetel u x tuch'ub tu ye'esaj tu'ux yaan u lu'umilo'ob, ti' bíin yanaco'obi', ti' bíin cajlaco'ob tuláacal ja'abo'obi'.