Read Yucateco Isaías 36 Bible Online

Isaías 36 - Yucateco bible

Isaías 36

¹Ti' u catorce ja'abil u ajawil Ezequíase', Senaquerib u ajawil Asiriae', tu ba'ateltaj tuláacal u tuulum caajilo'ob Judae' ca tu ch'a'alantaj.

²Líikbal tu caajil Laquise' tu túuxtaj jun túul u nojochil u náacomo'ob yéetel jun p'éel nojoch múuch' aj ba'atelo'ob u ti'al u yilo'ob ajaw Ezequías tu caajil Jerusalén, ca tu je'elsajuba'ob tu jáal u becanil u cúuchil ja' yaan tu ca'analil le pu'uc ti' le bej cu bin tu káaxil le aj P'o'o nooko'obo'.

³Te'elo' j bin nuptáantbilo'ob tumeno'ob Hilcías u j mayolil jalach naj; Sebna; u aj dzíibil ba'axo'ob cu yúuchul jalach naj; yéetel Joa u paal Asaf u aj dzíib ajaw.

⁴U náacomal Asiria tu ya'alaj ti'ob: Dza'ex u yojéelt Ezequías u túuchi' t'aan le nojoch ajawo', u ajawil Asiria: ¿Ba'ax beetic a tucultic jach utz a wanil?

⁵¿Táan wa a tucultic je'el u páajtal u yúuchul ba'atel chéen yéetel jadzudz t'aano'ob quex mina'an u muukil yéetel u na'atil u nu'ucta'al u yúuchul ba'atele'? ¿Máax ti' ca kubic a wóol u ti'al ma' a tziquic in t'aan?

⁶Quin wilic a dzaamaj a wóol ti' u ajawil Egipto. Ba'ale' Egiptoe' chéen jun p'éel jalal te'ete'ej, cu yocol tu kaab máax cu nactal ti', u ti'al u yáanticubáa. Faraón u ajawil Egiptoe' bey u beetic ti' tuláacal máaxo'ob ocsaj óoltico'.

⁷Bey xan wa ca wa'alic ti' teen: To'one' c ocsaj óoltic Yuumtzil c Ku, ¿ma' wa dzo'oc u láaj luksaj Ezequías u cúuchilo'ob u kulta'al yéetel u multuunil u kulta'al Kui', cu dzo'ocole' ca tu ya'alaj ti' u cajnáalilo'ob Jerusalén ca kultajnaco'ob chéen ti' jun p'éelili' multuunil kultaj?

⁸Beet jun p'éel moc t'aan yéetel in dzuulil u ajawil Asiria: tene' bíin in dzáa ti' teech dos mil tzíimino'ob, wa ca caxtic máaxo'ob nat'ique'.

⁹Teche' ma' tu páajtal a beetic u púudzul mix u asab chichanil u náacomo'ob le j asiriobo', ¿táan wa túun a tucultic u dza'abal ti' teech j nat' tzíimino'ob yéetel u tzíiminilo'ob tumen u ajawil Egipto?

¹⁰Cu dzo'ocole', ¿táan wa a tucultic taalen in ba'atelt le múuch' caaj quex mina'an Yuumtzil tin wéetel? ¡Leti' j a'al ti' teen ca in ba'atelt yéetel ca in xu'ulsej!

¹¹Eliaquim, Sebna yéetel Joae', tu núucajo'ob ti' u náacomal asiria: Beet utz a t'anico'on ich arameo, tumen to'one' c na'atic arameo. Ma' a t'anico'on ich hebreo, tumen táan u yu'uba'al tumen tuláacal le máaco'ob yano'ob tu yóokol le tuulumo'.

¹²Ba'ale' le u náacomal asiria tu ya'alaj: Ma' j túuxta'aben tumen u ajawil Asiria u ti'al j t'aan tu yéetel a dzuulile'ex wa ta wéetele'exi'. Túuxta'aben u ti'al j t'aan tu yéetel le máaco'ob yano'ob tu yóokol le tuulumo', tumen leti'ob yéetel te'ex bíin a make'ex a ta'ex bíin xan a wuke'ex a wixe'ex.

¹³Le náacom túuno', j wa'alaje' ca tu yaawtaj ich hebreo yéetel tuláacal u muuk: U'uye'ex ba'ax cu ya'alic le nojoch ajawo', u ajawil Asiria:

¹⁴Ma' a cha'ique'ex a tu'usule'ex tumen Ezequías; tumen leti'e' ma' tu páajtal u toquique'ex ti' quíimil.

¹⁵Wa Ezequías u káat u yoques ta poole'ex ca a wocsaj óolte'ex Yuumtzil u ti'al ca u ya'al ti' te'ex: Yuumtzil bíin toquico'on ti' quíimil; leti'e' ma' bíin u cha'a u lúubul le caaj tu kab u ajawil Asiriai',

¹⁶ma' a wocsique'ex ta poole'ex ba'ax cu ya'alic. U ajawil Asiriae' cu túuxtiquen in wa'al ti' te'ex ca a bisaba'ex tu yéetel, bey xan ca a kubaba'ex ti' teen, tumen beyo' tu jujun túulile'ex bíin páatac a jaantique'ex u yich a pakal uvaex yéetel a pakal higoex, bey xan bíin a wuke'ex u ja'il a chultune'ex.

¹⁷Cu dzo'ocole' bíin u bise'ex ti' jun p'éel múuch' caajo'ob chica'an ti' le a ti'ale'exo', jun p'éel u múuch' caajil u coolilo'ob trigo yéetel u x péet paachilo'ob uvaob u ti'al a beetique'ex waaj yéetel vino.

¹⁸Wa cu ya'alic ti' te'ex Ezequías Yuumtzil bíin toque'ex ti' quíimile', ma' a cha'ique'ex u tusique'ex. ¿Yaan wa quex jun túul ti' u láak kuob páatchaj u toquic múuch' caajo'ob tu kab u ajawil Asiria?

¹⁹¿Tu'ux yaan u kuilo'ob Amat yéetel Arfad? ¿Tu'ux yaan u kuilo'ob Sefarvaim? ¿Páatchaj wa u to'ocol tu kab Asiria u caajil Samaria?

²⁰¿Máacalmáac ti' u kuilo'ob le múuch' caajo'ob páatchaj u toquic u múuch' caajo'ob tu kab u ajawil Asiria? ¿Ba'axten ca tucultique'ex je'el u páajtal u to'ocol ti' quíimil u caajil Jerusalén tumen Yuumtzile'?

²¹Leti'obe' tu macaj u chi'ob ma' tu núucajo'ob mix jun p'éel t'aani', tumen a'ala'ab ti'ob tumen ajaw ma' u núuquico'ob mix ba'al.

²²Bey tumen chi'ichnaco'ob Eliaquim u j mayolil jalach naj, Sebna u aj dzíibil ba'axo'ob cu yúuchul yéetel Joa aj dzíibe', tu jatajo'ob u nooko'ob tu yóokolo'ob, cu dzo'ocole' j bino'ob u yilo'ob Ezequías u ti'al ca u tzicbalto'ob ti' tuláacal ba'ax dzo'oc u ya'alic le náacom j asirio'.