Read Yucateco Isaías 37 Bible Online

Isaías 37 - Yucateco bible

Isaías 37

¹Le ca tu yu'ubaj ajaw Ezequías le t'aano'oba', tu jataj u yáalal u búuco'obe', ca tu búuquintaj to'och nooko'ob, u ti'al u chíicbesic u yaj óolale', ca j bin tu kulnaj Yuumtzil.

²Ca tu túuxla'antaj Eliaquim, u j mayolil u jalach naj, Sebna u aj dzíibil ba'axo'ob cu yúuchul, yéetel u asab nuxibilo'ob aj kiino'ob u búuquintmajo'ob u j to'och nookilo'ob okom óolal u ti'al u yilo'ob aj bóobat Isaías u paal Amoz,

³u ti'al ca u ya'alo'ob ti' u t'aano'ob ajaw: Bejela'e', ti' yano'on ich yaj óolal, ich jaadz yéetel sublaquil; bey je'el bix jun túul co'olel ta'itac u síijsaj cu p'áatal mina'an u muuke'.

⁴Quexi' wa j kuch tu xiquin a Ku ba'axo'ob tu ya'alaj le náacom túuxta'ab tumen u ajawil Asiria, u dzuulil, u ti'al u poch' cuxa'an Ku, yéetel quexi' ca ja'adzac tumen Yuumtzil a Ku tu yo'olal ba'axo'ob tu yu'ubajo'. Payalchi'ine'en tu yo'olal le máaxo'ob ca'aliquil cuxa'ano'obo'.

⁵U nuuquilo'ob u jalach naj Ezequíase', j bino'ob u yilo'ob Isaías,

⁶Isaíase' tu kuben t'antaj ca u ya'alo'ob ti' u dzuulilo'ob: Yuumtzile' cu ya'alic: Ma' a ch'ique'ex sajaquil tu yo'olal le pooch'ilo'ob tu ya'alajo'ob ti' teen u palitzilo'ob u ajawil Asiriao'.

⁷Tumen tene', bin in ca'aj in beet u kuchul tu xiquin jun p'éel tzicbal u ti'al in beetic u suut tu múuch' caajo'ob, cu dzo'ocole' bíin quíimsa'ac.

⁸U náacomal asiriao' tu yojéeltaj dzo'oc u lukul u ajawil Asiria tu caajil Laquis. Leti' túune' tu p'ataj xan u caajil Jerusalene', ca tu nuptáantaj u ajaw Asiria táan u ba'ateltic Libna.

⁹Te'elo' u ajawil Asiriae', tu yu'ubaj u ya'ala'al táan u bin ba'ateltbil tumen Tirhaca u ajawil Etiopía. U ajawil Asiriae' tu ca'a túuchi'itaj aj bisaj t'aano'ob ti' Ezequías u ajawil Judá u ti'al u ya'alo'ob ti':

¹⁰A Ku ti' máax ca alab óolalo', cu jach a'alic ti' teech ma' bíin lúubuquech tin kabi'; ba'ale' ma' a cha'ic u tusiquech.

¹¹Teche' dzo'oc a wojéeltic ba'ax tu beetajo'ob u ajawilo'ob Asiria yéetel le múuch' caajo'ob tu yóoltajo'ob u xu'ulso'obo'. ¿Bin a ca'a wa túun a jech le quíimilo'?

¹²¿To'oc wa tumen u kuob u láak múuch' caajo'ob j xu'ulsa'abo'ob tumen in máanja'an ch'i'ibalo'ob je'el bixo'ob: Gozán, Harán, Resef yéetel u cajnáalilo'ob Bet-edén, cajna'alo'ob ca'ach Telasaro'?

¹³¿Tu'ux yaan u ajawilo'ob Hamat, Arfad, Sefarvaim, Hena yéetel Iva?

¹⁴Ezequíase' tu ch'a'aj le ju'un tu bisaj le aj bisaj t'aano'obo' ca tu xocaj. Cu dzo'ocole' j bin ich kulnaje' ca tu xit'aj le ju'un tu táan Yuumtzilo',

¹⁵ca j payalchi'inaj beya':

¹⁶Yuumtzil u yuumil tuláacal páajtalil, u Ku Israel, ti' yaan a jalach káanche' tu yóokol querubino'obe', chéen teech u Kuech tuláacal u ajawilo'ob lu'um; teech beet ca'an yéetel lu'um.

¹⁷Yuumtzil jach qui' u'uyeni'. Yuumtzil p'il a wich u ti'al a wilic. U'uy ba'ax t'aanilo'ob dzo'oc u túuxtic a'albil ti' teen Senaquerib, tuláacalo'obe', u t'aanilo'ob u ti'al u poch'iquech, teech le Ku cuxa'ano'.

¹⁸Yuumtzil jach jaaj dzo'oc u láaj xu'ulsa'al tumen u ajawilo'ob Asiria le múuch' caajo'ob yéetel tuláacal u lu'umilo'ob,

¹⁹cu dzo'ocole' tu pulaj káak tuláacal u kuob, tumen tu jaajile' ma' kuobi', chéen beetbil kuob che'ob yéetel tuunich u ca'ajo'ob beeta'ano'ob tumen wíinico'ob. Le t o'olal j kascunta'abo'ob.

²⁰Ba'ale' Yuumtzil c Ku, bejela'e' toco'on tu kab tu yo'olal u yojéelta'al tumen tuláacal u múuch' caajilo'ob yóokolcaab, teech Yuumtzil, chéen teech Junab Kuech.

²¹Isaías túune' tu túuxtaj a'albil ti' Ezequías: Je'el ba'ax cu ya'alic Yuumtzil u Ku Israela': Tene' dzo'oc in wu'uyic le payalchi' ta beetaj ti' teen tu yo'olal Senaquerib u ajawil Asiriao'.

²²Je'el ba'axo'ob tu ya'alaj Yuumtzil tu yo'olal u ajawil Asiria: Senaquerib, u caajil Sione' cu che'ejtiquech bey je'el bix a che'ejta'al tumen jun túul x ch'úupale'. Jerusalene' cu yúuntic u pool u ti'al u p'a'astiquech le quéen xi'iqueche'.

²³¿Máax dzo'oc a sen poch'ic? ¿Máax ta ka'am t'antaj u ti'al a líiksic a wich a pactic yéetel noj ba'alil? ¡U quili'ich Ku Israel!

²⁴Tu chi' a náacomo'ob ta poch'aj Yuumtzil. Ta wa'alaj: Tin ch'a'aj u sen ya'abcach bolanilo'ob in ba'atele', ca j na'aquen tu jo'ol lu'umil le pu'uco'ob, tu asab ca'analil Líbano'. Tin ch'acaj u asab ca'analil kuulche'ob, yéetel u asab jadzutz pino'ob. J kuchen tac tu asab ca'analil, yéetel u káaxilo'ob beyo'ob u x péet pakalilo'ob nicte'obe'.

²⁵Ti' táanxel lu'umilo'ob tin potaj ch'e'eno'ob, ca tin wukaj u ja'ilo'ob, cu dzo'ocole' tin tiquincuntaj u áalcab ja'ilo'ob Egipto yéetel in pe'echak.

²⁶¿Ba'ale' ma' a wojel ca'ach teen Yuumtzil máax beetic ca láaj úuchuc beyo'? Líikbal úuch in tucult in beetic, ba'ale' dzo'oc in beetic u béeychajal bejela'e'; le t o'olal teche' ca kascuntic le caajo'ob tuulumta'ano'obo', ca sutico'ob jeenel caajo'ob.

²⁷U cajnáalilo'obe' j ma' óolo'ob, sajaco'ob, sublaco'ob xan, beyo'ob u xíiwil káax ya'axtaco'ob u ti'al u janal ba'alche'obe', beyo'ob xíiwo'ob cu jóokolo'ob tu yóokol najo'obe' cu tiquincunta'alo'ob tumen u yiikal j lakin.

²⁸Tene' in wojel tuláacal tu'ux ca máan yéetel tuláacal ba'ax ca beetic; tene' in wojel dzo'oc a táaj p'u'ujul ti' teen.

²⁹Bey tumen in kaj óol bix a sen p'uja'anil yéetel a nonoj baíle', bin in ca'aj in dzáa jun p'éel x léecheb ta ni' yéetel jun p'éel jok ni', u ti'al in beetic a suut ti' le bej tu'ux taalecho'.

³⁰Isaías túune' tu ya'alaj ti' Ezequías: Lela' u chíiculal ba'ax bíin úuchuc: ti' le ja'aba' yéetel u láak cu taalo' bíin a jaante'ex le trigo cu yantal chéen jóoko'obilo', ba'ale' tu yóox ja'abe' bíin páatac a pakale'ex yéetel a joche'ex, bíin a pake'ex uvaob u ti'al a jaante'ex u yicho'ob.

³¹Le judeailo'ob bíin u jecho'ob le quíimilo', bíin p'áataco'ob bey pakalbil che'obe': bíin jóokoc u mootzo'ob yéetel bíin ch'úuyuc u yicho'ob,

³²tumen bíin p'áatac jun jáat u cajnáalilo'ob Jerusalén; tu pu'uquil Sione' bíin yanac jun jaatz le tu jechajo'ob le quíimilo'. Lelo' bíin úuchuc tu yo'olal u sen yaabilaj Yuumtzil u yuumil tuláacal páajtalil.

³³Wa tu yo'olal u ajawil Asiriae', Yuumtzile' cu ya'alic: Ma' bíin ococ Jerusaleni', ma' bíin dzoonac yéetel mix jun p'éel x julubi', ma' bíin u ba'atelt u dzaamaj chimalo'obi mix bíin u beet u níix bejilo'ob u bak paachi'.

³⁴Ti' le bej tu'ux j taale', ti' bíin suunaqui'; ma' bíin ococ ti' le caaja'. Teen Yuumtzil a'alic.

³⁵Tene' bíin in canant le caaj u ti'al in toquic ti' quíimila', tu yo'olal in yaabilaj ti' David yéetel ti' in kaaba'.

³⁶U aj túuchi' Yuumtzile' j bine' ca tu quíimsaj ciento ochenta mil wíinico'ob tu cúuchil tu'ux cu je'elel le j asiriobo'; le ca sáaschaje' láaj quimentaco'obi'.

³⁷Senaquerib u ajawil Asiria túune', tu láaj lukesaj u aj ba'atelo'obo' te j cúuchilo', ca j suunaj Nínive.

³⁸Jun p'éel kiin táan u kultaj tu kulnaj Nisoc u kue', j quíimsa'ab tumeno'ob Adramelec yéetel Sarezer u paalal, cu dzo'ocole' ca j púudzo'ob tu tojil Ararat. Cu dzo'ocole' j culaj Esarhadón u paal tu jalach káanche'.