Read Yucateco Isaías 39 Bible Online

Isaías 39 - Yucateco bible

Isaías 39

¹Ti' le kiino' Merodac-baladán, u ajawil Babiloniae', tu yu'ubaj u tzicbalta'al koja'anchaj ca'ach Ezequías, ba'ale' dzo'oc u yutztal, leti'e' tu túuchi'itaj dze'edzec aj bisaj t'aano'ob u biso'ob jun p'éel dzíibil ju'un yéetel jun p'éel siibal ti'.

²Leti'e' j qui'imacchaj u yóol úuchic u kuchulo'obe', ca tu ye'esaj ti'ob u ayikalil, plata yéetel oro, le j qui'iboc ja'ob yéetel u ma'alob aceite bey xan u cúuchil u nu'uculo'ob u ba'atel yéetel tuláacal le ba'axo'ob yano'ob te j cúuchilo'. Ma' j p'áat mix ba'al ma' u ye'esic ti'ob ti' le ba'axo'ob yaan ca'ach tu jalach naj yéetel tu ajawilo'.

³J bin túun aj bóobat Isaías u yil ajaw Ezequías ca tu káat chi'itaj ti': ¿Tu'ux u taal le wíinico'obo', ba'axo'ob tu ya'alajo'ob ti' teech? Ezequíase' tu núucaj: Ti' u taalbalo'ob náanach lu'ume'; Babilonia u taalo'ob.

⁴Isaíase' tu káat chi'itaj ti': ¿Ba'ax tu yilajo'ob ta jalach naj? Ezequíase' tu núucaj: Tu yilajo'ob tuláacal ba'ax yaani'i. Ma' j p'áat mix ba'al ma' u yilico'ob tu cúuchil tu'ux in ta'acbesmajo'obi', tuláacal tin we'esaj ti'ob.

⁵Isaías túune' tu ya'alaj ti' Ezequías: U'uy ba'ax cu ya'alic ti' teech Yuumtzil u yuumil tuláacal páajtalil:

⁶Táan u taal u kiinilo'ob u bisa'al tu lu'umil Babilonia tuláacal ba'ax yaan ta jalach naj ti' le ba'axo'ob tu much'quintaj a máanja'an ch'i'ibalo'ob tac tu kiinil bejela'e'. Mix ba'al bíin p'áatac waye'.

⁷Tac dze'edzec ti' a ch'i'ibalo'ob bíin bisa'aco'ob Babilonia, bíin nuumquinta'aco'ob ti' u j xiibilo'ob, u ti'al u dza'abalo'ob palitzilil tu jalach naj ajaw.

⁸Ezequiase' tu yo'olal tu tucultaj bíin yanac wal jéedzel tu kiinilo'ob u cuxtale', tu núucaj ti' Isaías: Jach utz le péectzil dzo'oc u túuchi'itic ti' teen Yuumtzilo'.