Read Yucateco Isaías 40 Bible Online

Isaías 40 - Yucateco bible

Isaías 40

¹A Kuexe' cu ya'alic: Qui'imaccunte'ex yóol, qui'imaccunte'ex yóol in caajal;

²t'ane'ex yéetel yaacunaj u caajil Jerusalén a'ale'ex ti'e', u palitzilile' dzo'oc u ch'éenel, dzo'oc u kamic u bo'olal tu yo'olal u si'ipilo'ob, dzo'oc bin u kamico'ob tin kab u ca'a máalil u jaadzil tu yo'olal tuláacal u kebano'ob.

³Jun p'éel t'aane' cu yaawtic: Nu'ucbese'ex jun p'éel bej te x tocoy lu'umo', jolch'acte'ex jun p'éel toj noj bej te j chakan lu'umo'.

⁴Chupe'ex tuláacal u chowac kóom lu'umilo'ob, táaxcunte'ex tuláacal le múulo'ob, yéetel le jo'ol lu'umo'obo', tuláacal le witzo'ob, yéetel le cúuchilo'ob koklemaco'ob láaj sute'exo'ob jach táax lu'umil.

⁵Yuumtzil túune' bíin u ye'es u nojbe'enil, bíin múuch' ila'ac tumen tuláacal wíinico'ob. Yuumtzil dzo'oc u ya'alic tu chi'il.

⁶Jun p'éel t'aane' cu ya'alic: Awatnaquech. Tene' quin káat chi'itic: ¿Ba'ax u najmal in waawtic? Tuláacal wíinique' bey xíiwe', ¡sen ma'alob yanil je'el bix u nicte'il káaxe'!

⁷Quéen máanac u yustaj Yuumtzil tu yóokolo'obe', le xíiwo' cu tijil, le nicte'o' cu chuchultal. ba'al jaaje', wíinique' bey xíiwe'.

⁸Xíiwe' cu tijil, nicte'e' cu chuchultal, ba'ale' u t'aan Yuumtzile' mix bikin bíin xu'uluc.

⁹Sión na'aquen tu jach ca'analil jun p'éel witz, awatnen yéetel tuláacal a muuk u ti'al a ka'aytic jun p'éel ma'alob péectzil. Awatnen x ma' sajaquil u caajil Jerusalén, ka'ayt ti' u caajilo'ob Judá: ¡Way yaan a Junab Kuexe'!

¹⁰Yuumtzile' cu kuchul tu yéetel páajtalil, cu láaj t'onquintic yéetel u muuk u kab. Cu taasic u caajal cu dzo'ocol u lojic.

¹¹Táan u taal bey jun túul aj canan cu canantic u j tamano'onbe'; cu méekic le mejen j tamano'ob, cu bisico'ob tu'ux cu chu'ucho'ob bey xan cu canantic le táant u síijilo'obo'.

¹²¿Máax dzo'oc u p'isic ka'anabo'ob yéetel u náab, wa dzo'oc xan u xoquic yéetel u yaal u kab buca'aj u cóochil ca'an? ¿Máax dzaamil chéen ti' jun p'éel x p'isib tuláacal u ma'ayil le lu'uma', dzo'oc xan u p'isic chéen ti' jun p'éel x ch'uyub p'is u aalil tuláacal jo'ol lu'umo'ob yéetel witzo'obo'?

¹³¿Yaan wa máax a'almail u nu'uc ti' Yuumtzil wa máax tzolmail ti' bix cu bin u beetic?

¹⁴¿Máax tzool u xiquin, máax dzáa u na'at? ¿Máax e'es ti' bix u yúuchul toj p'is óol? ¿Máax ca'anbes ma'alob kaj óolalo'ob ti'? ¿Máax e'es u ca'anbesajilo'ob ojéelajil ti'?

¹⁵Tu táan leti'e' le múuch' caajo'obo' chéen beyo'ob jun ch'áaj ja'e', bey jun p'úuy lu'um tu yóokol p'isibe'; u múuch' caajilo'ob jáal ka'anabe' beyo'ob jun p'éel sa'am lu'um tu táane'.

¹⁶Ma' tu chúucpajal tuláacal u ba'alche'ilo'ob Líbano' u ti'al u ku'ubul tóocbil ba'alche'ob ti', mix tu chúucpajal u si'il u ti'al u káakil.

¹⁷Mix ba'alo'ob tu táan leti' tuláacal le múuch' caajo'obo'; u ti'al leti'e' jach mix ba'al u tojolo'ob.

¹⁸¿Máax yéetel bíin a quete'ex Ku? ¿Yéetel ba'ax oochel bíin we'ese'ex bix leti'?

¹⁹Jun túul j póol che', cu póolic jun p'éel j culche', jun túul j meyaj oroe' cu bonic yéetel oro cu beetic x jóoken jóoko'ob plata.

²⁰Máax beetic culche'e' cu yéeyic jun p'éel che' ma'atech u la'abal, cu caxtic jun túul j meyaj jadzutz ba'alo'ob cu beetic jun p'éel ma'alob x culub tu yo'olal ma' u lúubul.

²¹¿Ba'ale' ma' a wojele'ex wa ca'achi'? ¿Ma' ta wu'uyajex wa u ya'ala'ali'? ¿Ma' wa tzicbalta'ab ti' te'ex tu yáax chuuni'? ¿Ma' a ch'a'a nu'ucte'ex líikbal tu yáax chuun beeta'abic yóokolcaabi'?

²²Kue' ti' yaan u jalach káanche' tu yóokol le nak ca'an balmail yóokolcaabo', leti'e' cu yilic le wíinico'ob beyo'ob j sáake'. Leti'e' cu sinic ca'an bey u si'inil jun p'éel nook u ti'al bo'oye', cu xit'ic bey jun p'éel chuybil naje'.

²³Leti'e' cu mix ba'alcuntic nucuch wíinico'obo' cu beetic xan u xu'ulul u nuuquilo'ob lu'um.

²⁴Bey mejen che'ob táant u xa'abalo'ob ma' u qui' ch'ico'ob u mootzo'ob te j lu'umo'. Wa cu yustaj Ku tu yóokolo'obe' cu tijilo'ob, cu bisa'alo'ob bey sojol tumen chac iikale'.

²⁵Le quili'ich Kuo' cu káat chi'itic: ¿Máax yéetel bíin a quetene'ex? ¿Máax je'el u páajtal u queticubáa tin wéetele'?

²⁶Líikese'ex a wiche'ex j ca'an u ti'al ca paacatnaque'ex: ¿Máax beet tuláacal le ba'alo'obo'? Le máax j t'oxla'anto'ob tu jujun túulil cu t'anic xan tu kaaba'ob tu jujun túulilo'ob. Sen nojoch u páajtalil, bey xan u muuk ma' tu tu'ubul mix jun túul ti'.

²⁷Israel, u caajil Jacob, ¿Ba'axten ca x tac pool? ¿Ba'axten xan ca wa'alic: Yuumtzile' ma' tu táan óoltic ba'ax cu yúuchul ti' teen; Kue' ma' tin ka'ajal ti'?

²⁸¿Ma' wa a wojéeltmaji'? ¿Mix wa jun teen a wu'uyej? Yuumtzile', Ku mina'an xu'ulul ti', leti' beetmail tuláacal yóokolcaab, ma'atech u jéesbal mixtech u ca'anal; mina'an xu'ulul ti' u na'at.

²⁹Leti'e' dzáic u muuk máax ca'ana'an, cu dzáic u yóol le j ma' óolo'.

³⁰Tac le j táanquelem paalal cu ca'analo'ob yéetel cu jéesbalo'obo', tac le asab mu'uka'ano'ob cu lúubulo'obo',

³¹ba'ale' máaxo'ob cu yocsic u yóolo'ob ti' Yuumtzile' bíin yanac túumben muuk ti'ob bíin páatac u xiknalo'ob beyo'ob j cóote'; ma' bíin ca'ananchajco'ob quéen áalcabnaco'ob, ma' xan bíin jéesbalnaco'ob quéen xíimbalnaco'obi'.