Read Yucateco Isaías 41 Bible Online

Isaías 41 - Yucateco bible

Isaías 41

¹Mac a chi'ex tin táan u múuch' caajile'ex ka'anab. Múuch' caaje'ex xiixib máacchajque'ex. Co'ote'ene'ex ca c tzicbalte'ex le ba'alo'oba'; cone'ex ma'alob tucultic ba'ax unaj c beetic.

²¿Máax beet u chíicpajal j lakin le ajaw cu pa'a muuk mantadzo'? ¿Máax kubic le múuch' caajo'ob tu kab u ti'al ca u t'onquint u ajawilo'ob u ti'al xan ca u xiixcunto'ob yéetel u máascab bey xan yéetel u x p'úunche' tac u ki'itbesico'ob bey sojole'?

³¿Máax beetic u ch'a'apachtic u ti'al ma' u yantal mix ba'al katic u beel, bey tu yóol iik cu bine'?

⁴¿Máax beetic le meyaja'? ¿Máax a'almajil ca'aliquil táan u chu'unpajal yóokolcaab ba'axo'ob bíin úuchuc? Teen, Yuumtzil, chéen teen Junab Ku, teen u yáax chuun teen xan u xuul.

⁵U múuch' caajilo'ob ka'anabe' tu yilajo'ob ca j sen sajacchajo'ob; lu'ume' j láaj quíilbalnaji. Dzo'oc u náadzalo'ob, táan u taalo'ob.

⁶Tu jujun túulil j meyaj jadzutz ba'alo'obe' cu yáantic u ch'a'a u yóol u yéet meyaj.

⁷Le j póol che'o' cu ch'a'ic u yóol ti' máax cu meyajtic plata; máax cu meyaj yéetel x bajabe' cu yóolintic máax cu meyaj tu nu'ucul bax fierro', cu ya'alic xan wa ma'alob u táakalilo'ob, cu dzo'ocole' cu ma'alob wa'acuntic le beetbil ku tu joyajo' u ti'al ma' u péec.

⁸Ba'ale' teche' Israel, u caajil Jacob, in palitzil máax in yéeymajech, u ch'i'ibal Abraham in wéet bisajbáa:

⁹Tene' tin jóokesech tu xuul lu'um, tin t'anajech tu naklil náanach lu'um, ca tin wa'alaj ti' teech: Teche' in palitzilech. Tene' tin yéeyajech, ma' in kex óoltechi'.

¹⁰Ma' a ch'a'ic sajaquil, tumen tene' ti' yanen ta wéetele'; ma' u péec a wóol tumen tene' a Kuen. Teen dzáic a muuk, teen áantiquech, teen lat'ab kabtiquech yéetel in kab yaan páajtalil ti'.

¹¹Tuláacal máaxo'ob p'ectmaileche', bíin sublacchajco'ob bíin xan pa'ajac u subtalo'ob; máaxo'ob ba'ateltiqueche' bíin jáay xu'ulsa'aco'ob.

¹²Quéen jo'op'oc a caxantic a aj p'eeco'obe', ma' bíin a nuptáanto'obi'; le máaxo'ob ba'ateltiquecho'obe', bíin p'áatac bey mix jun teen síijico'obe'.

¹³Tumen teen Yuumtzil a Kue', dzo'oc in machiquech ta kab; tene' tin wa'alaj ti' teech: Ma' a sajactal, teen áantiquech.

¹⁴Yuumtzile' cu ya'alic: Israel u caajil Jacob, quex sen chichanech yéetel j ma' muukeche', ma' a ch'a'ic sajaquil; teen áantiquech. Teen u quili'ich Ku Israele', teen a j tocsajil.

¹⁵Bíin in sutech u nu'ucul u mu'uxul trigo, túunben, ma'alob xan u le'et'ilo'ob u nu'ucul yoxo'om; bíin a mux le pu'uco'ob u ti'al a sutic ma'ay lu'umilo'ob, bíin a sut sojolil le jo'ol pu'uco'obo'.

¹⁶Bíin a pul u ti'al ca bisa'ac tumen iik; bíin ki'ikita'ac tumen chac ikal. Teech túune' bíin qui'imacchajac a wóol ti' Yuumtzil, bíin a wu'uyabáa qui' a wóol tu yo'olal u quili'ich Ku Israel.

¹⁷Óotzil máaco'ob mina'an mix ba'al u tzéenticuba'ob, ba'ale' ma' tu nuptáantico'ob. Tiquin u chi' tu yo'olal ukaj. ba'ale' teen Yuumtzil bíin in táanalto'ob, teen, u Junab Ku Israele', ma' bíin in xúunp'atto'obi'.

¹⁸Bíin in beet u tóop'ol ja' ti' le tiquin jo'ol lu'umo'obo', bíin xan in beet u yantal u sayabilo'ob ja', chúumuc le táax kóom lu'umo'obo'; bíin in sut áakalil le x tocoy lu'umo'obo', bíin in beet u yantal t'óot'ol ja'ob te j tiquin lu'umo'.

¹⁹Te x tocoy lu'umo' bíin in pak kuulche'ob, acaciaob, arrayano'ob yéetel olivo'ob; ti' le j tiquin lu'umo' bíin in beet u ch'íijil pino'obi' pa'ate' yéetel abeto'ob yéetel cipreso'ob,

²⁰tu yo'olal u yila'al yéetel u yojéelta'al tumen tuláacal yóokolcaab, yéetel u ti'al ca u ch'en xiquinto'ob yéetel u na'ato'ob, teen Yuumtzil, tin beetaj yéetel in páajtal, teen Junab Ku u quili'ichil Israel tin beetaj.

²¹Yuumtzil u ajawil Jacobe' cu ya'alic: Beetbil kuex co'otene'ex a we'ese'ex a kuile'ex, co'otene'ex a we'ese'ex ma' chéen tuutus kuexi'.

²²Co'otene'ex a dza'ex u péectzilil ba'ax bíin úuchuc yéetel ca a tzole'ex ti' to'on ba'axo'ob dzo'oc u yúuchule' beyo' bíin c ch'en xiquinte'ex; a'ale'ex ti' to'on ba'axo'ob cu taal u kiinil, u ti'al ca c ojéelt ba'axo'ob bíin úuchuc.

²³A'ale'ex xan ti' to'on ba'axo'ob cun j úuchul tu dzooc, e'ese'ex ti' to'on wa kuex tu jaajil. Beete'ex ba'axo'ob cu páajtal a beetique'ex, utz wa kaas, u ti'al ca ococ ti' to'on sajaquil yéetel jak óolal.

²⁴¡Ba'ale' te'exe' mix ba'ale'ex mix xan cu páajtal a beetique'ex mix ba'al! P'ecbe'en máax yéeyique'ex.

²⁵Tin beetaj u chíicpajal jun túul wíinic te j lakino; tin t'aanaj tu kaaba', ti' u taalbal j xamane'. Cu xanabcha'atic méektáano'ob je'el bix u xanabcha'ata'al kate'; je'el bix u beetic le j pat kat cu ya'ach'tic le kat yéetel u yooco'.

²⁶¿Máax ka'it tu yáax chuun, u ti'al ca c ojéelto'ob? ¿Máax a'al ma'ili' úuchuc ba'ax cu taal u kiin u ti'al ca a'al jaaj ba'ax cu ya'alic? Mix jun túul ti' te'ex a'al ba'ax cu taal u kiinil, mix máac j u'uy a wa'alique'ex mix ba'al.

²⁷Teen tin yáax a'alaj ti' Sión ba'ax cu taal u kiin, teen tin túuxtaj jun túul aj bisaj t'aan u ti'al u ya'al ti' séeba'an bíin suunac u cajnáalilo'ob.

²⁸Quin paacat, ba'ale' mix jun túul ti' le yaanal kuob cu chíicpajalo'; mix jun túul ti'ob cu páajtal u tzol xiquin, mix jun túul ti'ob cu páajtal u núuquico'ob in káat chi'ob.

²⁹¡Mix ba'al u biilal mix jun túul ti'obi'! Mix ba'al cu páajtal u beetico'ob; chéen jóojochil beetbil kuob.