Read Yucateco Isaías 42 Bible Online

Isaías 42 - Yucateco bible

Isaías 42

¹Je'el in palitzila', máax quin lat'ab kabtic, leti' máax in yéeymaj, ti' máax quin qui'imac óolta'al. Dzo'oc in dzáic in pixan ti' u ti'al ca u taas ti'ibil bejil ti' tuláacal múuch' caajo'ob.

²Ma' bíin awatnaqui', mix bíin ka'amcach t'aanaqui', ma' bíin u beet u yu'uba'al u t'aan ti' bejo'obi',

³ma' bin dzo'ococ u cachic le sakab caachalo' mix bíin u tup le sáas chichan u káakilo'. jach tu jaajil bíin u taas ti'ibil óolal.

⁴Ma' bíin je'elequi', mix bíin lúubuc u yóol tac quéen u beet u yantal ti'ibil bejil yóok lu'um. U múuch' caajilo'ob ka'anabe' bíin u ma'alob u'uyo'ob u ca'anbesajo'ob.

⁵Ku Yuumtzil, le ca tu beetaj ca'ane' tu sinaj, le ca tu beetaj lu'um yéetel tuláacal ba'ax yaan tu yóokol, cu dzáic cuxtal yéetel u múusik u cajnáalilo'obe', cu ya'alic ti' u palitzil:

⁶Teen Yuumtzile', tin t'anajech ca tin machajech ta kab, u ti'al ca meyajnaquech u nu'ucul tocsajil; teen tin beetajech, tumen in káat ca a beetabáa u jedz u t'aanil in nup t'aan yéetel caaj, yéetel u sáasil múuch' caajo'ob.

⁷In káat ca a dzáa u sáasil yich ch'óopo'ob u ti'al xan ca jáalkabt máaxo'ob dza'ano'ob ti' kalabo'ob, ti' u kalab najilo'ob éekjoch'e'enil.

⁸Teen Yahveh, lela' leti' in kaaba', ma' bíin in cha'a' u dza'abal in nojbe'enil ti' u yaanali' mix ca tzi'iquic beetbil kuob cu jeelinten.

⁹Il a wile'ex bix béeychajic ba'axo'ob tin a'alaj cu taal u kiinil, bejela'e' in ca'aj in ka'ayt túumben péectzilo'ob; quin wa'alic ti' te'ex ma'ili' úuchuco'obi'.

¹⁰Kaye'ex ti' Yuumtzil jun p'éel túumben kaay; líikbal ti' asab náach lu'um, qui'iqui' t'ante'ex máaxe'ex ca bine'ex ti' cheem yóok ka'anab yéetel le ba'alche'ob yano'ob ichilo', u múuch' caajilo'ob ka'anab yéetel tuláacal u cajnáalilo'ob.

¹¹Qui'imacchajac u yóol x tocoy lu'um yéetel u caajilo'ob bey xan u péet caajilo'ob u ch'i'ibalo'ob Cedar. Kaaynaco'ob yéetel qui'imac óol u cajnáalilo'ob Sela; ka'am kaaynene'ex te tu jach ca'analil le pu'uco'obo'.

¹²U dza'ob nojbe'enil ti' Yuumtzil u tze'ecto'ob u qui'iqui' t'aanil ti' u múuch' caajilo'ob ka'anab.

¹³Yuumtzile' bíin jóokoc bey jun túul xiixib aj ba'atele' bíin ba'atelnac tu jaajil u yóol je'el bix jun túul aj ba'atele'; bíin ka'am t'aanac, bíin u dzáa u yawatil ba'atel bíin xan u pa'a u muuk u aj p'eeco'ob.

¹⁴Yuumtzile' cu ya'alic: Ya'abcach kiino'ob j p'áaten x ma' t'aanil, tin macaj in chi' ma' tin wa'alaj mix ba'ali'; ba'ale' bejela'e' in ca'aj awat, bey co'olel cu síijsaje', táan u yáacam, táan xan cu jajak iike'.

¹⁵Bin in ca'aj in jen witzo'ob yéetel jo'ol lu'umo'ob, bin ca'aj xan in beet u tijil tuláacal u yáakil lu'um; bin in ca'aj in beet u suut x tocoy tuláacal áalcab ja'ob yaan xan in cha'ic u tijil tuláacal xéel ja'ob.

¹⁶Bíin in bis ch'óopo'ob ti' bejo'ob yéetel ti' t'úut'ul bejo'ob ma' u kaj óoltmajo'ob ca'achi'. Éekjoch'e'enilo' bíin in sut sáasil tu táano'ob yéetel bíin in sut táax koom lu'umil le cúuchilo'ob kóomkom taamo'obo'. Mix jun p'éel ti' le ba'alo'ob bíin p'áatac ma' in beetico'

¹⁷Máaxo'ob cu yocsic u yóolo'ob ti' jun p'éel beetbil ku, máaxo'ob cu ya'alico'ob ti' jun p'éel póolbil che': Te'exe' c kuex, bíin náachaco'ob yéetel sublaquil.

¹⁸Cóoque'ex, u'uyajnaque'ex; ch'óope'ex p'iche'ex a wiche'ex u ti'al ca paacatnaque'ex.

¹⁹Mina'an u láak sen cóoc yéetel sen ch'óop je'el bix in palitzil, in aj túuchi'e', mina'an u láak sen ch'óop yéetel sen cóoc je'el bix in aj bisaj t'aan, u palitzil Yuumtzile'.

²⁰Dzo'oc u yilic ya'abcach ba'alo'ob, ba'ale' ma' tu táan óoltico'ob; je'el u páajtal u yu'ubaje', ba'ale' ma' tu táan óoltic mix ba'al.

²¹Yuumtzile' tu yo'olal jun túul Ku cu tocsaje', u nojochquint yéetel u nojbe'encunt u ca'anbesaj;

²²ba'ale' le caaja' cu yoocolta'al yéetel cu láaj to'ocol u ayikalil, tuláacalo'ob dzo'oc u ma'achalo'ob j kalbil, dzo'oc u ka'alalo'ob ichil x kalab najo'ob; cu ma'achalo'ob, ba'ale' mina'an máax jáalkabtico'ob, cu x mucul chu'uculo'ob, ba'ale' mina'an máax bo'otic u cha'akabta'alo'ob.

²³¿Ba'ale' máax ichile'ex táan óoltic le ba'alo'oba'? ¿Máax u dzaamaj u yóol u yu'ub ba'axo'ob bíin úuchuca'?

²⁴¿Máax cha'a' u pa'abal u muuk yéetel u yocolta'al Israel u caajil Jacob, ca palitzilta'ac yéetel ca x mucul chu'ucuc? ¿Ma' wa jaaj Yuumtzil j beet u yúuchul beyo'o'? Leti'obe' j kebanchajo'ob tu táan. ma' tu yóoltajo'ob j xíimbal ti' le bej tu ye'esaj ti'obo', mix tu yu'ubaj t'antajo'ob u ca'anbesajo'obi'.

²⁵Le t o'olal j kuuxchaj tu yéetelo'obe', ca tu jadzajo'ob yéetel jun p'éel yaayaj ba'atel u ti'al u beetic u yelelo'ob ich káak, ba'ale' mix bey tu yóoltilaco'ob u'uyaj t'aano'.