Read Yucateco Isaías 43 Bible Online

Isaías 43 - Yucateco bible

Isaías 43

¹Ba'ale' Israel u caajil Jacob, Yuumtzil le máax beetmailecho' cu ya'alic ti' teech: Ma' a sajactal, tumen dzo'oc in jáalkabtiquech; teen tin t'aanajech ta kaaba', in ti'alech.

²Wa yaan a ch'aacat ich ja'e', bíin ti' yanaquen ta wéetel, wa kabéet a ch'actic áalcab ja'obe', ma' bíin búuluquechi'; wa yaan a máan ich káake' ma' bíin elequechi', ma' bíin tóoch'banac káako'ob ti' techo'.

³Tumen teen a Yuumtzil a aj tocsajil, u quili'ich Ku Israel. Tene' dzo'oc in maniquech; tin dzáa Egipto, Etiopía yéetel Sabá, u ti'al u tojol a bo'olil,

⁴tumen utz a lúubul ti' teen, co'oj a tojol in ti'al, tene' in yaabilmajech. Tu yo'olal in ti'alintiquech, yéetel u ti'al in toquic a cuxtale', quin kubic wíinico'ob yéetel múuch' caajo'ob.

⁵Ma' a ch'a'ic sajaquil tumen tene' ti' yanen ta wéetele' Líikbal j lakin yéetel j chikine', bíin in beet u suut a caajal u ti'al j much'tal.

⁶Bíin in wa'al ti' j xaman: Suto'ob ti' j noojol: Ma' a p'áatalo'ob yéetelo'ob. Taas ti' teen in j xibil paalal yéetel in x ch'upul paalal líikbal náachil, líikbal tu xuul u yóokolcaab,

⁷ti' tuláacal máaxo'ob dza'an in kaaba' ti'ob, máaxo'ob tin beetaj u síijilo'ob yéetel in nu'ucbesmajo'ob, máaxo'ob tin beetajo'obe', u ti'al in nojbe'enile'.

⁸Beete'ex u taal in caajal, tumen in caajale' ch'óop quex tumen yaan u yicho'ob cóoc quex tumen yaan u xiquino'ob.

⁹U much'jubáa tuláacal caajo'ob, u much'jubáa tuláacal múuch' caajo'ob. ¿Máax ichilo'ob a'al yaan u taal u kiin le ba'alo', wa tu ka'aytaj le ba'axo'ob dzo'oc u yúuchulo'obo'? u taaso'ob u aj jaajcunajo'ob, u ye'eso'ob jaaj ba'ax cu ya'alico'ob, u ti'al ca u'uya'ac yéetel ca a'ala'ac jach jaaj.

¹⁰Yuumtzile' cu ya'alic: Te'exe' in aj jaajcunaje'ex, te'ex in yéeybil palitzile'ex u ti'al ca a kaj óoltiquene'ex yéetel a wocsaj óoltiquene'ex, yéetel ca a na'ate'ex máaxen teen. Ma' yanac mix jun túul ku táanil ti' teni', mix paachil ti' teen bíin yanac u láak.

¹¹Chéen teen Yuumtzil; Mix máac jun páay ti' tene' mina'an mix máac cu páajtal u tocsaj.

¹²Yuumtzile' cu ya'alic: Teen tin wa'alaj ba'ax cu taal u kiin tin ka'aytaj xan: tene' dzo'oc in toquique'ex; lelo' ma' jun túul j yaanal ku beetmaili', te'ex in aj jaajcunaje'ex.

¹³Ti' ja'abo'ob mina'an u xuule', tene' Junab Kuen. Mix máac cu páajtal u toquicubáa ti' in páajtalil. Mix máac bíin páatac u mixba'alcuntic ba'ax quin beetic.

¹⁴Yuumtzil, u quili'ich Ku Israel, máax jáalkabte'exe', cu ya'alic: U ti'al in toquique'exe' bíin in túuxt máaco'ob Babilonia, u ti'al ca in beet u je'ebel u joolcaajilo'ob, u qui'imac óolal le j caldeobo' bíin suunac ki'inamil.

¹⁵Teen Yuumtzil, teen j beet Israel, teen a quili'ich Junab Kuex a ajawe'ex.

¹⁶Yuumtzile' tu je'aj jun p'éel bej ichil le ka'anabo', tu je'aj jun p'éel bej ichil dzíidzic ja'ob;

¹⁷tu beetaj u jóokol jun p'éel nojoch múuch' aj ba'atelo'ob, u ch'a'amajo'ob u bolano'ob yéetel u tzíimino'ob u ti'alo'ob j quíimil. Le ca j lúubo'obe' ma' páatchaj u ca'a líikilo'obi'; j xu'ulo'ob bey u tu'upul u káakil jun p'éel sáase'.

¹⁸Bejela'e' Yuumtzile' cu ya'alic ti' u caajal: Ma' u ka'ajal teech ba'axo'ob dzo'oc u máano'ob u kiin, ma' tucultic ba'axo'ob dzo'oc u máan kiin úuchla'ajac.

¹⁹Tene' bin in ca'aj in beet jun p'éel túumben ba'al, jach ti' le súutuc bíin chíicpajaca'. Bin in ca'aj in je'e' jun p'éel bej te x tocoy lu'umo', yéetel áalcab ja'o' ti' le j tiquin lu'umo'.

²⁰Bíin u tziqueno'ob u ba'alche'ilo'ob káax, bey xan u peekilo'ob káax yéetel avestruso'ob, tumen bíin in beet u jóokol ja' ti' le x tocoy lu'umo', bey xan áalcab ja'ob ti' le j tiquin lu'umo', u ti'al ca in dzáa ja' u yuk in caajal in yéeymaj,

²¹le caaj in nu'ucbesmaj u ti'al u ka'ayt in qui'iqui' t'aanilo'.

²²Ba'ale', teech israel, u caajil Jacob, teche' ma' payalchi'inajech ti' teni', teche' j náac a wóol ti' teen.

²³Ma' ta kubaj ti' teen tóocbil j tamano'obi', mix ta tzicajen yéetel tóocbil ba'alche'obi'. Tene' ma' tin náacsaj a wóol u ti'al in káatic ti' teech ti'ibil óolo'obi', mix tin sen babal káataj ti' teech poomi'.

²⁴Ma' kabéetchaj a manic qui'iboc jalal u ti'al a taas ti' teen u ti'ibil óolili', mix kabéetchajac a qui'imaccuntic in wóol yéetel u tzaatzel ba'alche'ob quíimsa'ano'ob in ti'ali'. Ba'ale' ta chi'ichnaccunsaj in wóol yéetel a kebano'ob; ta beetaj in p'u'ujul yéetel a kasa'anilo'ob.

²⁵Ba'ale' bey tumen teen a Junab Kueno' quin lukesic a kasa'anilo'ob u ti'al ma' in ka'ajsic mix jun p'éel a kebano'ob.

²⁶Wa cu tucultic yaan ba'ax in beetmaj ti' teech ma' utz ta t'aane', co'ox tu táan jun túul aj p'is óol. Co'oten a taas a tacpoolo'ob ca c ila'a wa jaaj mina'an a si'ipil.

²⁷A yáax máanja'an ch'i'ibale' j kebanchaji', a aj ca'anbesajo'obe', tu pechajuba'ob ti' teen,

²⁸a méektáano'obe' tu kascuntajo'ob in kulnaj, le t o'olal tin p'ataj u po'och'ol Israel u caajil Jacob.