Read Yucateco Isaías 44 Bible Online

Isaías 44 - Yucateco bible

Isaías 44

¹Bejela'e' u'uyeni', Israel u caajil Jacob, in palitzil, in aj yéeyaj.

²Teen Yuumtzil máax beetmailech, tu patajech ma'ili' síijiquech mix u yáantech ca'ache'e'. Ma' a ch'a'ic sajaquil Jesurún u caajil Jacob, in palitzil in yéeymajech,

³tumen bin in ca'aj in beet u yáalcab ja'ob x tocoy lu'umo', bin in ca'aj in beet u yantal áalcab t'o'ol ja'ob te j tiquin lu'umo'. Teen bíin in dzáa túumben cuxtal ti' a ch'i'iba'alo'ob, bíin in túuxt qui' t'aano'ob ti'ob.

⁴Bíin ch'íijico'ob je'el bix u ch'íijil xíiwo'ob ma'alob joyabta'anilo'obe', beyo'ob cóopo'ob tu jáal u yáalcab ja'obe'.

⁵Jun túule' bíin u ya'ale': Tene' u ti'alen Yuumtzil, u láak jun túule' bíin u kaaba'int u ch'i'ibal Jacob, u láak jun túule' xane' bíin u dzíibt tu muuk u kab: Yuumtzil in yuumil, tu dzooque', bíin u tzay Israel ti' u kaaba'.

⁶Yuumtzile', u ajaw yéetel u aj tocsaj Israel, u Yuumtzilil tuláacal páajtalile', cu ya'alic: Teen u yáax chuun yéetel u xuul tuláacal ba'al; mina'an u láak ku quetiquen.

⁷¿Máax je'el u queticubáa tin wéetele'? T'a'anac u ti'al ca u tzol ti' teen. ¿Máax a'almail líikbal tu yáax chuun ba'ax bíin taalac u kiinil u ti'al u ka'aytic ba'ax ta'itac u yúuchul?

⁸Ba'ale', ¡yanac a wóol, ma' a ch'a'ic sajaquil! Teen tin wa'alaj beyo', teen tin ka'aytaj sen úuchi, te'ex in aj jaajcunaje'ex. ¿Yaan wa u láak Ku jun páay ti' teen? Mina'an u láak ta'acbejsajbáil; ma' in kaj óoltmaj u láaki'.

⁹Mix jun túul yaan u tojol ti' le cu póolico'ob beetbil kuobo', cu dzo'ocole' mix ba'al xan u biilal le j beetbil kuob u sen yaabiltmajo'obo'. Máaxo'ob kultico'obe' ch'óoptaco'ob yéetel jach j ma' na'ato'ob, le t o'olal bíin pa'ajac u subtalo'ob.

¹⁰Máax cu póolic jun p'éel che' u ti'al u kult je'el bix u kue', mix ba'al u biilal ba'ax cu beetic.

¹¹Tuláacal máaxo'ob kultique' bíin pa'ajac u subtalo'ob. Máaxo'ob beetic póolbil che'obe' chéen wíinico'ob. Wa ca láaj much'laco'ob u ti'al p'is óoltbilo'obe', je'el u p'áatalo'ob t'onocbalo'ob yéetel sen jak óolale'.

¹²Co'ox ilic ba'ax cu beetic j meen máascabo': cu ch'a'ic u nu'ucul u meyaj, bey xan cu chacjole'enquintic le fierro ichil chúuc, cu baxic u ti'al u meyajtic. Cu baxic yéetel u muuk u kab. Ba'ale' wa ma' tu janal le j meen máascabo', cu mina'anchajal u muuk, wa ma' tu yukic ja'e', cu xu'ulul yóol.

¹³Co'ox ilic xan le j póol che'o': cu ch'a'ic u p'iste' u ti'al u jóokesic u p'iisilo'ob, cu chíicultic yéetel dzíib bix u najmal u póolic, cu dzo'ocole' cu machic u nu'ucul póol che'e' cu póolic; cu dzo'ocole' cu p'atic je'el bix jadzutzil jun túul wíinique', cu wa'acunsic ichil jun p'éel kulnaj.

¹⁴Bey xan cu yantal máax pakic kuulche'ob, ba'ale' le ja' cu káaxalo' leti' beetic u ch'íijilo'ob, cu dzo'ocole' cu yantal kuulche'ob u ti'al u ch'aque. Ba'ale' wa asab utz tu yich cipreso'ob yéetel béeco'obe', cu canantico'ob te j káax u ti'al ca polocchajalo'obo'.

¹⁵Cu dzo'ocole' cu meyaj ti' wíinico'ob u ti'al u tóoco'ob; cu bisico'ob dze'edzec u si'il u ti'al u kíicho'ob, u láak dze'edzeque', u ti'al u póoquico'ob waaj, u láak u xóot'olo'obe' cu ch'a'abal u ti'al u beeta'al jun túul ku, cu dzo'ocole' cu noctalo'ob tu táan u ti'al u kultico'ob.

¹⁶Wa xan: cu ch'a'ico'ob táancoch ti' le che'o' u ti'al j elel te j káako', cu káabtic bak tu yéetel, cu jaantic le bako' cu na'ajtal. Cu dzo'ocole' cu kíichintic xan, ca'aliquile' cu ya'alic: ¡Buca'aj qui'il u kíich máac tu chuun káak, táan in kíintal!

¹⁷Ba'ale' ti' u yalab le che'o', cu póolic jun p'éel ku, cu noctal u ti'al u kulte, cu káat óol tu táan, cu payalchi' ti' beya': ¡Toquen ti' quíimili' tumen teech in ku!

¹⁸Wíinico'ob beya', mix ba'al u yojelo'ob, mina'an u na'ato'ob; ma' tu paacato'ob tumen sen ch'óoptaco'ob, ma' tu na'atico'ob mix ba'al tumen sen tzuutzul u tuuculo'ob.

¹⁹Ma' tu tucultico'ob, cu bineltic na'at ti'ob u ti'al ca u ch'a'a nu'ucto'ob u ti'al ca páatac u ya'alico'ob: Táancoch ti' le che'o' tin chokaj ich káak u ti'al j elele', ca tin póocaj in wo'och waaj yéetel u chúuquil, tin káabtaj xan bak tu yéetele' cu dzo'ocole' ca tin jaantaj; ti' le j p'áato' tin beetaj le sen p'ecbe'en ba'ala', ¡le ba'al quin kultica' chéen jun cáach che'!

²⁰Jach tu jaajile' óoli' bey ca jaanta'ac ta'anil káake'. Cu cha'ic u tu'usul tumen u keechel tuuculo'ob. Le wíinico'obo' ma' bíin u jecho'ob le quíimilo'. Mina'an ti'ob u na'atil u ti'al u ch'a'a nu'uctico'ob chéen tuutus kuob le yaan tu kabo'obo'.

²¹Israel u caajil Jacob, ka'ajac ti' teech in palitzilech; teech in palitzil tumen teen beetmailech. Israel ma' a tu'ubsiquen.

²²Tene' tin beetaj u samkajal a si'ipilo'ob yéetel a kebano'ob, je'el bix u samkajal múuyalo'obe'. Suunen tin wicnal tumen dzo'oc in lojiquech.

²³¡Ca'an, awatnen yéetel qui'imac óolal tu yo'olal ba'ax dzo'oc u beetic Yuumtzil! ¡U taamile'ex lu'um ka'amcach kaaynene'ex! ¡Witze'ex bey xan káaxo'ob pa'ate' yéetel u che'ilo'ob, awatnaque'ex yéetel qui'imac óolal, tumen Yuumtzile' dzo'oc u ye'esic u nojbe'enil tu yo'olal tu lojilac Israel u caajil Jacob!

²⁴Yuumtzil a aj lojil, leti' máax patech ma'ili' síijiqueche', cu ya'alic: Teen Yuumtzil máax beetmail tuláacal ba'alo'ob, teen tin jayaj ca'an, teen xan tin jedzcuntaj lu'um, mix máac j áanten.

²⁵Tene' ma' tin cha'ic u yúuchul ba'axo'ob cu ya'alico'ob bíin úuchuc tumen j tuutus aj bóobato'obo'; tene' quin beetic u sa'atal u yóolo'ob aj chuchuc na'ato'ob. Teen beetic u paaclan ba'atel t'aano'ob aj ojéelajo'ob u ti'al ca u ya'alo'obo' chéen chocopoolal u kaj óolalo'ob.

²⁶Ba'ale' quin béeycuntic ba'axo'ob cu ya'alic in palitzilo'ob u ti'al ca dzo'ocpajac ba'ax u jok jo'oltmajo'ob in aj túuchi'ob. Teen a'alic bíin ca'a cáajbesa'ac Jerusalén yéetel bíin ca'a utzquinta'ac u caajilo'ob. Teen bíin in beet u ca'a líikesa'al u pakilo'ob juutulo'obo'.

²⁷Tene' cu páajtal in wa'alic ca tijic le nojoch ka'anab u ti'al ca p'áatac x ma' ja'il u yáalcab ja'ilo'ob.

²⁸Tene' quin wa'alic ti' Ciro: Teech in aj canan j taman, teche' bíin a beet tuláacal ba'ax bíin in wóolte; tene' quin wa'alic ti' Jerusalén: Bíin ca'a utzquinta'aquech; quin wa'alic ti' kulnaj: Bíin ca'a dza'abac a chuun pakilo'ob.