Read Yucateco Isaías 45 Bible Online

Isaías 45 - Yucateco bible

Isaías 45

¹Yuumtzile' tu jun páaycuntaj Ciro u ti'al u beet u ajawil, tu dzaj u ti'al ca u t'onquint múuch' caajo'ob yéetel u ti'al u lukesic u nu'uculo'ob u ba'atelo'ob ajawo'ob. Yuumtzile' bíin u jáanilcunt u beel caajo'ob tu táan Ciro, mix máac bíin páatac u kalico'ob u beel. Bejela'e' cu ya'alic:

²Tene' bíin xi'iquen táanil ti' teech, bíin in táaxcunt witzo'ob, bíin in pa'aj u jool caajo'ob bronce u ca'ajo'ob yéetel bíin in ca'acach u katáabilo'ob fierro u ca'ajo'ob.

³Tene' bíin in kub ti' teech ba'alo'ob co'ojtaco'ob, ta'acbesa'ano'ob, ayikalilo'ob ta'aca'ano'ob ti' mucul cúuchilo'ob, u ti'al ca a wojéelt teen Yuumtzilen, u Ku Israel, cu t'aniquech ta kaaba'.

⁴Tu yo'olal in yaabilaj ti' in palitzil Jacob, u caajil Israele', tin yéeyajech, tin t'aanajech ta kaaba', tin dzaj ti' teech ma'ili' a kaj óoltiquene' jun p'éel pat kaaba', cu dzáic ti' teech tziiquil.

⁵Tene' Yuumtzilen, mina'an in jeel; mina'an u láak Ku táanil ti' teen mix pachal ti' teen. Tene' dzo'oc in nu'ucbesiquech u ti'al j ba'atel quex ma' a kaj óoltmaeni',

⁶u ti'al ca ojéelta'ac tumen j lakinilo'ob yéetel j chikinilo'ob, mina'an u láak Ku táanil ti' teen mix pachal ti' teen. Tene' Yuumtzilen, mina'an in jeel.

⁷Teen beetic sáasil yéetel éekjoche'enil, teen beetic u taal utz yéetel u taal loob. Tene' Yuumtzilen, teen beetic tuláacal le ba'alo'oba'.

⁸Tene' bíin in túuxt líikbal tin ca'anil in dzáanche'etajil, je'el bix u ye'ebil ca'an yéetel u ja'il múuyalo'obe', lu'ume' bíin ch'u'uluc; tu yo'olal lelo' bíin u dzáa tocsajil tu tzéele' u loolilo'ob nu'uca'an p'is óolal.

⁹Jun p'éel patbil kate', wa je'el ba'alac nu'uculile', ma' tu wa'atal j paaclan t'aan yéetel máax beetmajil. Le kato' ma' tu ya'alic ti' máax meyajtic: ¿Ba'ax ca beetic? mix xan jun p'éel nu'ucul ma' tu ya'alic ti' máax beete: Teche', ma' a wojel meyaji'.

¹⁰Jun túul paal xane', ma' tu páajtal u keyic u taata yéetel u maama, tu yo'olal taasa'abic yóokolcaab.

¹¹Yuumtzil, u quili'ich Ku Israel, le máax beete', cu ya'alic: ¿Bin a ca'aje'ex wa a káat chi'ite'ex ti' teen ba'ax tin beetaj yéetel in paalal, wa a ca'anbese'ex ti' teen bix bíin in beet in nu'uculo'ob?

¹²Teen j beet lu'um yéetel u cajnáalilo'ob, tin kabil tin sinaj ca'an, ca tin wa'alaj ca chíicpajac u eekilo'ob.

¹³Teen tin beetaj u chíicpajal Ciro u ti'al ca pa'a muuknac, bin in ca'aj in lukes ba'axo'ob katic u beelo'ob; leti'e' bíin u yutzquint in caajal bíin xan u beet u suut máaxo'ob kala'ano'ob ca'ach táanxel lu'umil, mix bíin u tzáa ca bo'ota'aqui', mix bíin u káat ca su'utuc u jeel u meen utzi'. Teen Yuumtzil u yuumil tuláacal páajtalil dzo'oc in wa'alic.

¹⁴Yuumtzile' cu ya'alic ti' Israel: U colnáalilo'ob Egipto, u aj coonolo'ob Etiopía yéetel u cajnáalilo'ob Sabá máaxo'ob ca'anal ba'alo'ob, bíin t'onlaco'ob ta táan, bíin a palitzilto'ob; bíin xi'ico'ob ta paach, kaxa'ano'ob yéetel x jokenjooko'ob, bíin xolaco'ob ta táan u ti'al u káat óolalo'ob ti' teech; Tu jaajile', ti' yaan Ku ichile'exe', mina'an u láak, mina'an u láak Ku.

¹⁵Ba'ale' teche' jun túulech Ku ma' ilajbe'eni', teech Ku u aj tocsajil Israel.

¹⁶Tuláacal máaxo'ob cu patico'ob beetbil kuob bíin pa'ajac u subtalo'ob, chéen ma' jaaj u yicho'ob quéen t'onquinta'aco'obi'.

¹⁷Ba'ale' Israele', Yuumtzil j toque, tu tocaj u ti'al kiino'ob mina'an u xuul, mix bikin bíin pa'ajac subtal, mix bíin t'onquinta'aqui'.

¹⁸Máax beet ca'ane'; leti'e' Ku, Yuumtzil xan, leti' máax beet lu'um, leti' j edzcunt; ma' chéen tu beetaji', ba'ale' u ti'al ca yanac u cajnáalilo'ob leti'e' cu ya'alic: Teen Yuumtzil, mina'an in jeel.

¹⁹Tene' ma' teech in x mucul t'aan mix ti' cúuchilo'ob u yéekjoch'e'enil yóokolcaab. Tene' ma' tin wa'alic ti' ch'i'ibalo'ob Jacob: Caxtene'ex tu'ux mix ba'al cu kiinanquil. Tene', Yuumtzilen, quin wa'alic ba'al jaaj, quin wa'alic ba'ax no'oja'an.

²⁰Co'otene'ex j much'tal, co'otene'ex, láaj nadzaba'ex u yalabile'ex le caajo'obo'. Le máaxo'ob xíibalcunsic le beetbil kuob che' u ca'ajo'obo' cu dzicuba'ob j payalchi' ti' jun túul ku ma' tu páajtal u tocsajo'ob.

²¹T'aanaco'ob, u taaso'ob u chíiculo'ob, wa u káato'obe' múuch' u ti'al u káat chi'iticuba'ob: ¿Máax yáax a'al le ba'alo'oba' máax ka'aynaj tu yáax chuun? ¿Ma' wa teen Yuumtzil, tin ka'aytaji'? Mina'an u jeel Ku táanil mix pachal ti' teen. Mina'an u láak Ku cu dzáic tocsajil je'el bixene'.

²²Co'otene'ex ti' teen, tumen tene', bíin in toque'ex, u caajile'ex u táanxel tzéelil lu'um, tumen tene' Kuen, mina'an u láak Ku.

²³Tene' tin jalach t'antaj tin kaaba', tin séeb chi'itaj jun p'éel pa'a' muuk, le séeb chi'o yaan u béeytal: bíin láaj xolaco'ob tin táan yéetel bíin láaj jalach t'aanaco'ob tin kaaba'

²⁴bíin u ya'alo'ob: Chéen ti' Yuumtzil yaan pa'a' muuk yéetel páajtalil. Tuláacal máaxo'ob p'ecmailene', bíin pa'ajac u subtalo'ob.

²⁵Chéen tin wo'olale', tuláacal Israel bíin pa'a' muuknac bíin ca'ana'alchajac xan u paacat tin wo'olal.