Read Yucateco Isaías 46 Bible Online

Isaías 46 - Yucateco bible

Isaías 46

¹Le ku Bel u kaaba'o' cu nóocol, le ku Nebo u kaaba'o' cu lúubul j lu'um. Le beetbil kuobo', cuchbil u bisa'alo'ob tu yóokol ba'alche'ob, aal cuch u ti'al ca'ana'an ba'alche'ob.

²Le kuobo' cu nóocolo'ob cu lúubulo'ob xan j lu'um, ma' tu páajtal u toquicuba'ob, tac leti'ob cu bisa'alo'ob táanxel lu'umil.

³U'uyene'exi' u ch'i'ibale'ex Jacob, tuláacal le u yalabe'ex u caajil Israel: Tene' tin cuchaje'ex ma'ili' síijique'exe'; méekbil tin bisajilaque'ex,

⁴láili' bey bíin in bise'ex tac quéen nuxibchajque'exe'; tac le quéen sacchajac u tzo'otzel a poole'ex bíin in wáante'ex. Teen tin beetaje'ex, ma' bíin in p'at in cuchique'exi'; teen bíin in láat'ab kabte'ex bíin xan in toque'ex.

⁵¿Máax yéetel je'el u páajtal a quetiquene'exe'? ¿Ti' máax ca tucultique'ex chica'anen?

⁶Yaan máaxo'ob cu jóokesico'ob ya'abcach oro ichil u to'il u taakino'ob, cu p'isico'ob u aalil plata tu x ch'uyub p'isibo'ob; cu dzo'ocole' cu bo'otico'ob jun túul j meen jadzutz ba'alo'ob u ti'al ca beeta'ac ti'ob jun túul u ku u ti'al ca noclaco'ob tu táan u kulto'ob.

⁷Cu cúuch queléembaltico'ob u ti'al u bisico'ob; cu dzáico'ob tu yóokol jun p'éel u nu'ucul u t'altal, ti' cu p'áatal x ma' péequili'. Quex buca'aj ca awatnaco'ob u ti'al u káatico'ob áantaj, ma' bíin núuca'ac ti'obi', mix tu páajtal u tze'elel ti'ob u yaj óolo'ob.

⁸Aj kebane'ex ka'ajac ti' te'ex le ba'ala', tuuculnene'ex tu beel, ma' a chéen cunel tuucule'ex;

⁹Ka'ajac ti' te'ex ba'axo'ob dzo'oc u yúuchla'ajal. Tene' Junab Kuen, mina'an in jeel; Junab Kuen, mina'an mix máac quetiquen.

¹⁰Líikbal tu yáax chuune' quin wa'alic ba'ax cu taal tu dzooc kiin; quin wa'alic ba'ax cu taal u kiin ma'ili' úuchuque'. Tene' quin wa'alic: Bíin béeychajac in jok jo'olo'ob; tene' quin beetic tuláacal ba'ax quin dzáiquinbáa in beete.

¹¹Dzo'oc in t'anic jun túul wíinic te j lakino', náach tu'ux bíin taalac, bey u taal jun túul j ch'úuye', bíin u dzo'ocbes ba'axo'ob in jokjo'oltmajo'ob. Bíin in beet je'el bix in wa'almajilo', in jok jo'ole' dzo'oc in beetic, yaan u béeytal.

¹²J dzu'uy poole'ex, ca tucultique'ex náach u taal a jáalkabile'ex, ma' jach náachil, u'uyene'exi':

¹³Tene' táan in beetic u náadzal a jáalkabile'ex; in tocsaje' ma' bíin xáanac u kuchbali'. Tene' bíin in dzáa u tocsajil Sión, teen bíin in dzáa u tziiquil Israel.