Read Yucateco Isaías 47 Bible Online

Isaías 47 - Yucateco bible

Isaías 47

¹Éemen, x lo'obayan Babilonia ma' yanac a wíichami', culen ich u ma'ay lu'um; éemen ta jalach káanche' x lo'obayan Caldea, culen j lu'um, tumen ma' bíin ca'a a'ala'ac ti' teech x muun óol yéetel x utzul óol.

²Ch'a'a u ca'il le juuch'o', juch' le ku'umo', lukes a bóoch', síil a piic, ma' a pixic a tzeleco'ob, ch'act xíimbal ooquil le áalcab ja'obo';

³ila'ac chacnul a wíinclil, p'áatac x ma' piixil a x ch'uupil. Bin in ca'aj in sut ti' teech u jeel loob, mix máac bíin páatac u wet'ic yéetel u káat óolo'ob.

⁴C aj jáalkabtaj, u quili'ich Ku Israel cu kaaba'intic Yahveh u yuumil tuláacal páajtalile' cu ya'alic:

⁵Culen x ma' t'aanil x lo'obayan Caldea, jupabáa ich éekjoche'enil, tumen mix bikin bíin ca'a t'a'anaquech u x ajaw múuch' caajo'obi'.

⁶Le ca j p'u'ujen ti' in caajale', tin kubaj in múuch' caajalo'ob ti' pajsublaquil, ca tin cha'aj u lúubul ta kab. Teche' ma' ta ch'a'aj óotzilil ti' leti'obi', ca ta dzáa yaayaj meyaj ti' u nuxibilo'ob.

⁷Ta wa'alaj: Teen bíin in beet in x ajawil jun puli' Ma' ta ma'alob máansaj a tuucul ti' le ba'alo'oba' mix ta tucultaj bix bíin dzo'oclajaqui'.

⁸Le t o'olale', bejela'e' u'uy le ba'ala', x ch'uup utz tu yich ba'alo'ob co'oj u tojol, culucbalech ta jalach káanche', ca tucultic ta baatzil: Teen, chéen teen, mina'an u láak máac beyene'; ma' bíin p'áataquen x ma' íichamili' mix bíin p'áataquen x ma' paalalo'obi'.

⁹Ti' jun p'éelili' kiin bíin taalac ti' teech ca'a p'éel loobo'ob: bíin p'áataquech x quimen íicham yéetel x ma' paalal, quex tumen ya'ab a x wáayil yéetel mina'an u xooquil a pulya'ajilo'ob.

¹⁰Teech ca'ache' ca tucultic jach utz yanilech ichil a meen kaas, ta wa'alaj ca'ach: Mix máac iliquen. Tu tusajech a ojéelajilo'ob yéetel a kaj óolilo'ob. Ta tucultaj ta baatzil: Teen, chéen teen, mix máac je'el bixene'.

¹¹Ba'ale' bin u ca'aj taal loob ta wóokol, ma' bíin páatac a wet'ic yéetel a pulya'aji'; bíin taalac ta wóokol jun p'éel num yaj ma' bíin a jechi'; jun p'éel muuk yaj mina'an ca'ach ta tuucul bíin téec taalac ta wóokol.

¹²Ma' p'atic a x pulya'ajil mix a sen x wáayil je'el bix a beetic ca'ach ta x lo'obaynile', co'ox ilic wa yaan ba'ax u biilal ti' teech, co'ox ilic wa je'el u ch'a'ico'ob teech sajaquil le máaco'obo'.

¹³Dzo'oc u sen ya'abchajal a tzol xiquinilo'ob, dzo'oc tac u náacsico'ob a wóolo'ob. ¡Taalaco'ob ta wicnal u aj na'atilo'ob eeko'ob, le máaxo'ob cu chuchuc na'ato'ob iquil u yilico'ob le eeko'obo', le máaxo'ob cu ya'alico'ob ba'ax cu taal u kiin tu jujun winal, u ti'al ca u yilo'ob bix bíin u toquecho'ob!

¹⁴Ba'ale' pacto'ob ma'alob, láajqueto'ob ti' sojol: káak cun xu'ulsico'ob, ma' tu páajtal u toquicuba'ob ti'. Tumen ma' u káakil chúuc u ti'al kíichi'.

¹⁵Bey bíin úuchuc ti' tuláacal a j pulya'ajo'ob, tu bisajuba'ob ta wéetel tuláacal u kiinilo'ob a cuxtal. Tu jujun túulilo'ob j bino'ob tu j keechel beelo'ob mix máac yaan u ti'al toquiquech.