Read Yucateco Isaías 48 Bible Online

Isaías 48 - Yucateco bible

Isaías 48

¹U'uy le ba'ala' u ch'i'ibal Jacob, teech ca kaaba'intic Israel; u ch'i'ibalech Judaa' ca jalach t'aan tu kaaba' Yuumtzil; ca payalchi' tu kaaba' u Ku Israel, quex ma' tu beel ba'ax ca beetic, mix toj a cuxtali';

²ca wa'alicabáa quili'ich caaj yéetel ca wa'alic ca alab óoltic u Ku Israel máax Cu kaaba'intic Yahveh, u yuumil tuláacal páajtalil:

³Líikbal tu yáax chuun tin wa'alaj ti' teech tuláacal ba'axo'ob úuchtaco'ob; teen tin dzáa ojéeltbil. Séeba'an tin beetilac, ca láaj úuchi.

⁴Tu yo'olal in wojel ca'ach bixech ti' a dzu'uy poolile', tumen dzu'uyech je'el bix fieeroe' ma' xan ta wúudzul beyech broncee',

⁵dzo'oc u sen máan kiin in wa'al ti' teech tin dzáa a wojéeltej ma'ili' úuchuque'. Beyo' ma' bíin páatchajac a wa'alic: In patbil ku j beet ca úuchuc, le culub che' tin póolajo' leti' j beet ca úuchuc.

⁶Teche' ta wu'uyaj tuláacal lelo'; táan óolt le bala', bíin a éejemt jach tu jaajil. Bejela'e', bin in ca'aj in wa'al ti' teech ba'alo'ob túumbentac x mucul ba'alo'ob ma' a kaj óoltmajo'ob ca'achi',

⁷ba'alo'ob táant u beeta'alo'obe', ma' ti' úuchben kiino'obi', ba'alo'ob ma' a wu'uy ca'ach u ya'ala'alo'ob mix bejela'e'. Beyo' ma' bíin páatac a wa'alic: In wojel ca'achi.

⁸Teche' mix jun téen a wu'uymaj ca'ach u ya'ala'alo'obi', ma' a kaj óoltmajo'ob ca'achi', tumen tacáal cóoquil a xiquin. Tene' in wojeli' mina'an chuca'an óolale' ca kaaba'intic j dzu'uy pool líikbal tu kiinil síijiquech.

⁹Ba'ale' tene' yanchaj chuca'an óolal tu yo'olal in tziiquil, tu yo'olal in nojbe'enile', tin cóomquitaj in wóol, ma' tin xu'ulsajechi'.

¹⁰Tene' tin lukesaj a kaasil, ba'ale' ma' je'el bix u luksa'al u kaasil platae', tene' tin túuntaj óoltech yéetel mukyaj.

¹¹Tu yo'olal in tzicbe'enil, tu yo'olal in tzicbe'enil tin beetaj, tumen in kaaba'e' ma' tu páajtal u xanabcha'ata'al. Ma' bíin in cha'a' u dza'abal in nojbe'enil ti' mix máaqui'.

¹²U'uyeni' Israel, u caajil Jacob, teech in t'anmajech: Chéen teen u jaajil Ku, teen u yáax chuun teen xan u dzooc.

¹³Yéetel in kab tin jedzcuntaj lu'um, yéetel in kab tin sinaj ca'ano'; chéen p'elac tin wa'aljilac u kaaba'obe', jo'op' u yantalo'ob.

¹⁴Láaj much'aba'ex, ch'en xiquintene'exi': ¿Máax ichile'ex a'al ba'ax cu taal u kiinil: máax tin yéeyaje', bíin u beet ba'ax in tucultmaj in beetic ti' Babilonia yéetel ti' u ch'i'ibal le j caldeobo'?

¹⁵teen tin wa'alaj, tin t'aanaj, tin wa'alaj ca taalac, je'el tu'ux bíin xíique', yaan u bin utzil ti'.

¹⁶Nadzaba'ex tin wicnal ch'en xiquinte'ex le ba'ala': Tu yáax chuunili', mix jun téen t'aanaquen x mucul; ca'aliquil táan u yúuchul lela', tene' ti' yaneni'. Bejela'a' túune', teen Yuumtzile', dzo'oc in dzáic in páajtalil ti' dzo'oc xan in túuxtic.

¹⁷Yuumtzil u quili'ichil Israel le máax jáalkabtiquecho', cu ya'alic: Teen Yuumtzil a Ku; teen ca'anbesic ti' teech ba'ax unaj a beetic u ti'al a wutzil, teen e'esic ti' teech, tu'ux bejil unaj a bin.

¹⁸¡Quexi'i' ca'ach ca dzo'ocbese in túuchi' t'aano'obe'! A ma'alob yanile' bíin nojochchajac je'el bix u bin u nojochtal jun p'éel áalcab ja'e', u ya'abtal a nu'uculo'obe' bíin béeyac u cuclil ka'anabe',

¹⁹a ch'i'ibalo'obe' bíin sen ya'abchajac, ma' bíin páatac u xo'ocolo'obi' je'el bix u sa'am lu'umil ka'anab; tene' ma' u najmal ca'ach in xu'ulso'obi', mix bíin in lukeso'ob ca'ach tin táani'.

²⁰Jóokene'ex tu lu'umil Babilonia, púudzene'ex ti' le j caldeobo'. Ka'ayte'ex le péectzilo'ob yéetel u yawatilo'ob qui'imac óolal, dza'ex ojéeltbil tac tu xuul yóokolcaab. A'ale'ex: ¡Yuumtzile' dzo'oc u jáalkabtic Israel u palitzil!

²¹Quex tu beetaj u máano'ob ti' cúuchilo'ob x tocoyo'obe', ma' tu mukyajtajo'ob ukaji'; leti'e' tu buja le nojoch tuunicho', ca tu beetaj u jóokol ja'i'.

²²Ba'ale' ti' le kaakas máaco'obo', ma' bíin xi'ic utzili'. Yuumtzile', bey dzo'oc u ya'alico'.