Read Yucateco Isaías 49 Bible Online

Isaías 49 - Yucateco bible

Isaías 49

¹U'uyene'exi' u múuch' caajile'ex ka'anab, náanach múuch' caaje'ex, u'uyene'exi': Yuumtzile' tu t'anajen ma'ili' síijiquene'; tu ya'alaj in kaaba' ma'ili' síijiquene'.

²Tu sutaj in t'aan bey máascab ma'alob jóoksa'anil u yeje', tu ta'acbesajen yéetel u kab, tu sutajen jun p'éel x julub pupudzquile', ca tu dzajen ichil u nu'ucul tu'ux cu ta'acbesic ca'ach u x julubo'ob.

³Tu ya'alaj ti' teen: Israel teech in palitzil, ta cuxtal bíin in we'es in nojbe'enil.

⁴Tene' dzo'oc ca'ach in tucultic: Chéen cunel úuchic in máansic óotzilil, mix ba'al u biilal úuchic in xupic in muuk. In tocsajile' ti' yaan tu kab Yuumtzile', in bo'olale', ti' yaan tu kab in Kue'.

⁵Dzo'oc in kamic tziiquil tu táan Yuumtzil in Ku, tumen leti' dzaamail in muuk. Le Yuumtzil máax beeten líikbal tu jobnel in maama u ti'al u palitziltiquen, u ti'al ca u beet u suut Israel u caajil Jacob ti' leti',

⁶cu ya'alic beya': Ma' chuca'an chéen ca a beetabáa in palitzil chéen u ti'al a much'quint u ch'i'ibalo'ob Jacobi' wa u ti'al a beet u suut u yalab u cajnáalilo'ob Israeli'; tene' bíin in beet a beeticabáa u sáasil múuch' caajo'ob, u ti'al ca a bis in tocsajil tac tu asab náachilo'ob lu'um.

⁷Yuumtzil máax cu jáalkab, u quili'ich Ku Israele' cu ya'alic ti' le caaj láaj kex óolta'abo', le caaj dzo'oc u p'ecta'al tumen u láak caajo'ob, le caaj palitzilta'an tumen kaakas máaco'ob: Le quéen ila'aquech tumen ajawo'ob yéetel u paalalo'obe', bíin líikico'ob u ti'al ca noclaco'ob ta táan tumen teen Yuumtzil, u quili'ich Ku Israele', tin yéeyajech cu dzo'ocole' tin béeycuntaj in séeb chi'ob.

⁸Yuumtzile' cu ya'alic: Tu chucaj u súutuquil in ca'a ch'a'ic óotzilil, ca tin ch'a'aj teech óotzilil; j kuch u súutuquil tocsajil ca tin wáantajech. Tene' tin ta'acbesajech u ti'al in ca'a beetic in nup t'aan tu yéetel caaj, u ti'al in wutzquintic le múuch' caajo'ob, u ti'al ca in beet u cajtalo'ob ti' le lu'umo'ob kascunta'ano'obo',

⁹u ti'al ca in wa'al ti' máaxo'ob kala'ano'ob: P'áatene'ex jáalkabil. yéetel le máax yano'ob ich éekjo'och'e'enilo': Cha'a a wila'ale'ex. Tu jáal bejo'ob bíin u nuptáanto'ob xíiw u ti'al u tzéentico'ob u yalak ba'alche'ob, bey xan ti' tuláacal x tocoy káaxe', bíin yanac janal u ti'al u wacaxo'ob.

¹⁰Ma' bíin u mukyajto'ob wi'ij yéetel ukaji', ma' bíin chi'ichnaccuntaco'ob tumen u yooxow kiini', tumen tene' in yaabiltmajo'ob quin nu'uctic xan u beelo'ob, bíin in biso'ob tu'ux yaan u sayabilo'ob ja'.

¹¹Bíin in je'e' jun p'éel bej tu chúumuc le witzo'obo' bíin in táaxcunt xan t'úut'ul bejo'ob.

¹²¡Il a wile'ex! Asab náach tu'ux u taalo'ob: dze'edzec cu taalo'ob j xamani', u láako'obe' j chikin lukbalo'ob u láak jun jaatze' tu lu'umilo'ob Asuani u taalo'ob.

¹³¡Ca'an, awat t'aanen yéetel qui'imac óolal! ¡Lu'um sen qui'imacchajac a wóol! ¡Witze'ex, ka'amcach awatnaque'ex yéetel qui'ima'ac óolal! Tumen Yuumtzile', dzo'oc u cho'ic u ya'alil u yich u caajal, dzo'oc u ch'a'ic óotzilil ti', tumen táan ca'ach u sen mukyaj.

¹⁴Sione' cu ya'alic ca'achi: Yuumtzile' tu xúunp'attajen, In Kue' tu tu'ubsajen.

¹⁵Ba'ale' ¿je'el wa u tu'ubsa'aj jun túul maamatzile' je'el wa u táabal u xúunp'at jun túul u paale'? Quex leti' ca u tu'ubse, tene' ma' bíin in tu'ubse'echi'.

¹⁶Tene' in t'al dzíibtmajech tin kab, mantadz ti' yaan tin tuucul a tuulumilo'obe'.

¹⁷Le máaxo'ob utzquintiquecho', asab séeb u meyajo'ob ti' le máaxo'ob kascuntecho'; dzo'oc u binelo'ob máaxo'ob jenech.

¹⁸Líikes a wich u ti'al a paacat ta bakpach, il a wil bix u much'icuba'ob u ti'al u suuto'ob ti' teech. Teen Yuumtzile', quin jalach t'antic tin kaaba' bíin meyajnaco'ob ti' teech u ti'al a jadzutzquinticabáa, bíin a búuquinto'ob je'el bix u búuquinta'al jadzutz ba'alo'ob tumen jun túul x ch'úupal bin u ca'a dzo'ocol u beele'.

¹⁹A múuch' caajo'obe' ju'uju'ut yanilo'ob ca'achi, pa'ano'ob yéetel jena'ano'ob; ba'ale' bejela'e', a lu'ume', chichan u ti'al a cajnáalilo'ob. Máaxo'ob jeneche' náach yanilo'ob.

²⁰A paalalo'ob ta tucultaj saatal yanilo'ob ca'ache', bíin u x mucul a'alo'ob ta xiquin: Le múuch' caajo'oba' sen chichan c ti'alt to'on; beet cúuchilo'ob u ti'al ca cajlaco'oni'.

²¹Teche' bíin a wa'al ta baatzil. ¿Máax dzáa ti' teen le paalalo'oba'? Tene' mina'an ca'ach in paalal, mix tu páajtal u yantalo'ob ca'achi; bisa'anen ca'ach táanxel lu'umil yéetel náachcunta'anen, ¿máax tzéento'ob? J p'a'aten ca'ach tin juun, ¿tu'ux u taalo'ob?

²²Yuumtzile' cu ya'alic: Bin in ca'aj in tusbelt ti' le múuch' caajo'obo', bin in ca'a in dzáa jun p'éel chíiculal ti' le caajo'ob u ti'al ca u méeko'ob a paalalo'ob u taaso'ob ti' teech, a x ch'upul paalalo'obe' bíin u taaso'ob tu queléembalo'ob.

²³Ajawo'ob, bíin a j majan yuuminto'ob, u x ch'upul paalal le ajawo'ob bíin u beetjuba'ob a x canan paalalo'ob. Bíin noclaco'ob tac j lu'um ta táan, bíin u léedzo'ob u lu'umil a wooco'ob. Beyo' bíin a kaj óolt teen Yuumtzil, cu dzo'ocole' máaxo'ob cu kubico'ob u yóolo'ob ti' teno' ma' bíin p'áataco'ob kaasili'.

²⁴¿Je'el wa u páajtal u lukesa'al tu kab jun túul j mu'uka'an wíinic ba'ax tu tocaj ich ba'atele'? ¿Je'el wa u páajtal u púudzul tu kab jun túul kaakas méektáan jun túul máac kala'ane'?

²⁵Yuumtzile' cu jéedz a'alic beya': Máac mu'uka'ane' bíin lukesa'ac tu kab le ba'ax u tocmajo', le kaakas méektáano' bíin lukesa'ac ti' le ba'ax u jáanpaytmajo'. Teen bíin ba'atelnaquen tu yéetel le máaxo'ob cu caxan ba'atelo'obo'; teen tin kabil bíin in toc in paalalo'ob.

²⁶Le máaxo'ob yedzmailecho' bíin in beet u jaantico'ob u bakelo'ob tu baatzilo'ob bey xan bíin in beet u cáaltalo'ob iquil u yukico'ob u ki'ikelo'ob, je'el bix u cáaltalo'ob yéetel vinoe'. Beyo' tuláacal wíinic bíin ojéeltic teen Yuumtzil máax toquiquech; yaan u yojéelta'al teen u Aj Páajtalil Jacob jáalkabtiquech.