Read Yucateco Isaías 50 Bible Online

Isaías 50 - Yucateco bible

Isaías 50

¹Yuumtzile' cu ya'alic: ¡Ma' a tucultique'ex wa tin xúunp'attaj a maamaex je'el bix u xúunp'atta'al jun túul atantzil tumen jun túul wíinique', wa tumen tin conaje'ex u ti'al palitzil tumen yaan in p'aax ti' wa máax! Te'exe' j cone'ex tu yo'olal tumen j kebanchaje'ex; Israel a maamaexe', j xúunp'atta'abi, tumen te'exe' dzu'uy a poole'ex.

²¿Ba'axten ma' tin nuptáantaj mix máac le ca j taalene'? ¿Ba'axten ma' j núuca'ab in t'aan le ca j t'aanajene'? ¿Ta tucultaje'ex ma' tu páajtal in ca'a toquique'ex? ¿Ta tucultaje'ex ca'ach ma' bíin páatac in jáalkabtique'exi'? Chéen yéetel in t'aan quin tiquincuntic ka'anabo' yéetel cu suut x tocoy lu'umil xan le áalcab ja'obo'; u ti'al ca quíimic u cayilo'ob yéetel u ti'al ca tu'uchajaco'ob tu yo'olal mina'an ja'.

³Teen búucbesic le ca'an yéetel u búuquil okom óolo', teen dzáic u nookil okom óol ti'.

⁴Yuumtzile' dzo'oc u tzol xiquintic ti' teen u ti'al ca xi'iquen in cho'o' u ya'alil u yich le máaxo'ob cananta'aco'ob yéetel u t'aanilo'ob dzáa óolal. Sáamsamal ja'atzcab kiin cu beetic in ch'en xiquin u ti'al ca chinlaquen in wu'uy u t'aan.

⁵Yuumtzile' dzo'oc u dzáic in na'at, tene' xane' ma' in peechinbáa ti' u t'aani' mix in sut in paach ti'i'.

⁶Tin síilaj in paach u ti'al a ja'adziquen, tin cha'aj u jo'ocol in me'ex. Ma' tin lukesaj in wich tu tojilo'ob máaxo'ob poch'iquen yéetel cu túubiqueno'obi'.

⁷Yuumtzile' leti' áantiquen: le t o'olal ma' tu loobiltiquen le pooch'ilo'obo'; le t o'olal jedzecbalen je'el bix jedzlic jun p'éel nojoch tuuniche', in wojel ma' bíin pa'ajac subtali'.

⁸Tin tzéel yaan in aj tocsaj. ¿Yaan wa máax cu taal u tac in pool? ¡Co'ox tu ca'a túulilo'on tu táan le aj p'is óolo'! ¿Yaan wa máax cu tucultic unaj u taquic in pool? ¡Taalac u ti'al ca u ya'alten!

⁹Yuumtzile' leti' áantiquen; ¿máax je'el u páajtal u xot kintiquene'? Tuláacal in aj p'eeco'ob bíin xu'uluco'ob je'el bix jun p'éel búuc cu jaanta'al tumen j kamase'.

¹⁰Te'ex máaxe'ex ca tziquique'ex Yuumtzil yéetel ca wu'uyique'ex ba'ax cu ya'alic u palitzile'; wa táan a xíimbale'ex ich éekjo'oche'enil x ma' sáasile', kub a wóole'ex ti' Yuumtzil; caxte'ex u yáantaj a Kuex.

¹¹Ba'ale' tuláacal máaxo'ob t'abic káak yéetel cu nu'ucbesico'ob x julubo'ob t'aba'antaco'obe', bíin lúubuco'ob ichil le káak u t'abmajo'obo', bey xan tu yáanal le x julubo'ob tu t'abajo'obo'. Yuumtzil bíin túuxtic le jaadza', u ti'al ca p'áataco'ob jaytal ich mukyajo'ob.