Read Yucateco Isaías 51 Bible Online

Isaías 51 - Yucateco bible

Isaías 51

¹Ch'en xiquintene'ex tuláacal le máaxo'ob u káato'ob toj cuxtalo'ob, le xan cu caxtico'ob tojil. Yuumtzile' cu ya'alic: Il a wile'ex le nojoch tuunich tu'ux jo'oque'exo', tu cúuchil t'oj tuunich tu'ux jóoksa'abe'exo';

²il a wile'ex Abraham a taataex yéetel x Sara máax dzáa a cuxtale'ex. Le ca tin t'aanaje' chéen tu jun ca'achi, ba'ale' tin qui' t'antaje' ca tin dzaj ya'ab u ch'i'ibalo'ob.

³Tene' bíin in ch'a'a óotzilil ti' Sión, le caaj suunaja'an jeenel caajilo'. Le j tiquin lu'umo'obo' bíin in suto'ob u lu'umil u pakalo'ob, je'el bix le j pa'ak tumen Yuumtzil te j Edeno'. Te'elo' bíin yanac sen nojoch qui'ima'ac óolali', bey xan u kaayilo'ob qui'iqui' t'aano'ob yéetel u juum paax.

⁴Caaje'ex, u'uyene'exi', ch'en xiquintene'exi' múuch' caaje'ex: tene' bíin in ka'ayt in ca'anbesaj, in túuchi' t'aano'obe' bíin u sáasilcunt caajo'ob.

⁵Nadz yanil u kiinil in dza'an che'etajil, in tocsajile' ti' yaan j beje', táan u taal; yéetel in páajtalil bíin in méektáant caajo'ob. U múuch' caajilo'ob ka'anabe', bíin u alab óolteno'ob bíin u yocsaj óolto'ob in páajtalil.

⁶Líikes a wiche'ex ca'an, paacatnene'ex j lu'um: ca'ano' bíin samkajac je'el bix u yúuchul ti' buudze', lu'ume' cu xu'upul je'el bix u xu'upul jun p'éel búuque', u cajnáalilo'obe' bíin quíimico'ob bey u quíimilo'ob koxolo'obe'. Ba'ale' in tocsajile' u ti'al kiino'ob mina'an u xuul, in dzáanche'etajile'; mina'an xu'ulul ti'.

⁷Te'ex le caaj a wojele'ex ba'ax toj, ma' báaxal yanilte'ex in ca'anbesajo'obe', u'uyene'exi'. Ma' a sajactale'ex ti' u ya'alaj ba'alo'ob le wíinico'obo', ma' u lúubul a wóole'ex tu yo'olal u pooch'ilo'ob,

⁸tumen bíin xu'uluco'ob bey jun p'éel búuc yaan u j kamasile', bey tzo'otz j taman ku'ukuxa'an tumen x nookolo'obe'. Ba'ale' in dzáanche'etajile' yéetel in tocsajile' u ti'al tuláacal kiino'ob mina'an u xuul.

⁹Aajen, aajen u kab Yuumtzil, mu'uka'anchajaquech; aajen je'el bix ta beetajilac úuche', ti' le úuchben kiino'obe'. Teech ta xe'exe'et'aj Rahab u ba'aba'alil ka'anab;

¹⁰ta tiquincuntaj ka'anab, ta tiquincuntaj u ja'il taamtam lu'um, ca ta sutaj bejil u taamil ka'anab u ti'al u máan le máaxo'ob ta jáalkabtajo'obe'.

¹¹Bey xan bíin suunaco'ob máaxo'ob loja'ano'ob tumen Yuumtzil, bíin ococo'ob Sión yéetel u yawatil qui'imac óolal; bíin ila'ac qui' yóol u yicho'ob mantadz; bíin qui'imacchajac u yóolo'ob, bíin xi'ic xan utzil ti'ob, bíin jáawac u mukyajo'ob yéetel u yokolo'ob.

¹²Teen dzáic a wóol. ¿Máax ti' sajaquech, ti' wíinico'ob? ¿Ti' quíimilbe'en wíinico'ob beyo'ob xíiwe'?

¹³¿Bin a ca'aj a tu'ubs Yuumtzil máax beetmailech, máax sinmail le ca'an máax xan jedzcuntmail lu'um? ¿Bin a ca'aj quiquilaanquil tu yo'olal u p'uja'anilo'ob máaxo'ob yedzmailech u nu'ucbesmajuba'ob u xu'ulsiquecho'ob? ¿Ba'ale' tu'ux yaan le p'uja'anilo'?

¹⁴Máax mukyajtic u ye'edzele' séeba'an bíin jáalkabta'ac; ma' bíin quíimic ich x kalab naji', mix bíin p'áatac x ma' waajili'.

¹⁵Teen Yuumtzil a Ku, Yahveh in kaaba' u yuumil tuláacal páajtalil; teen tin beetaj u líikil u ja'ilo'ob ka'anabo', ca juumnaj u cuclilo'ob,

¹⁶tin sinaj le ca'ano' tin edzcuntaj xan yóokolcaab. Tene' tin dzáa ta chi' in t'aano'ob, tin balajech yéetel in kab. Tene' tin wa'alaj ti' Sión: Teech in caajal.

¹⁷Aajen, aajen, Jerusalén líiken. Teche' ta mukyajtaj u p'uja'anil Yuumtzil, ta jéentantaj u jaadzil, ta wu'uyaj u ki'inamil, bey u yu'ukul ba'al seten káaje' cu láaj jalak calta'al tac quéen cáalchajac.

¹⁸Ti' buca'aj a paalal dzo'oc u yantale', mina'an mix jun túul u ti'al nu'ucbesic a beeli'; ichil tuláacal le paalal ta tzéentajo'obo', mina'an mix jun túul machic a kab u ti'al u bisechi'.

¹⁹Le ca'a p'éel loobo'oba' j taalo'ob ta wóokol: a múuch' caajalo'obe' j kascunta'ab j ocolta'ab xan, a wéet caajalo'obe' j quíimo'ob yéetel wi'ij tac xan ich ba'atel. ¿Máax bíin ch'a'ic óotzilil ti' teech? ¿Máax bíin qui'imaccuntic a wóol?

²⁰Bey quéejo'ob cu lúubulo'ob ti' léeche', a paalale' mina'an u muuko'ob, jayacbalo'ob tu ti'itz je'el ba'axac bejile' láaj loobilta'ano'ob tumen u p'uja'anil Yuumtzil, tu yo'olal núumsaj yaj Ku.

²¹Le t o'olale', óotzil caaj, u'uy le ba'ala', teche' cala'anech ba'ale' ma' yéetel vinoi';

²²Yuumtzil a Ku, máax toquic u caajale', cu ya'alic: Bin in ca'aj in lukes ta kab u nu'ucul le ukul j cáalcunsecho'; ma' bíin a ca'a uk u vinoil in p'uja'anili'.

²³Tene' bíin in dzáa ti' máaxo'ob j loobiltech, máaxo'ob tu ya'alajo'ob: Pulabá j lu'um tumen bíin máanaco'on ta wóokol; teche' j chilajech lu'um u ti'al ca xanabcha'ataquech bey ma'ay lu'ume'.