Read Yucateco Isaías 52 Bible Online

Isaías 52 - Yucateco bible

Isaías 52

¹Aajen Sión, aajen, ch'a'a a muuk; Jerusalén, quili'ich caaj, búuquint a asab qui'ichquelem nook, tumen le ma' ocsaj óolo'ob, le máaco'ob ma' utz yanilo'obo', ma' bíin ca'a ococo'ob ichil a caaji.

²Líiken Jerusalén, tíit a lu'umil, culen ta jalach káanche'. Sión, x lo'obayan x ch'úupal luba'anech tu kab a aj p'eeco'ob, lukesabáa ti' x palitzililo'.

³Yuumtzile' cu ya'alic: Mix jun p'éel chan box taakin tin kamaj tu kiinil ca j bisa'abe'ex palitziltbil; ma' xan bíin in dzáa mix jun p'éel chan box taakin quéen in toque'ex.

⁴Úuch ca'ache', j bin in caajal tu lu'umil Egipto, le cajlajic bey j táanxel lu'umile'; cu dzo'ocole' j ye'edz tumen Asiria quex ma' unaj u ye'edzel ca'achi'.

⁵¿Ba'ax túun quin wilic bejela'e'? Mina'an ba'ax o'olal bisa'abic in caajal Babilonia. Máaxo'ob t'onquintmaile', cu yawato'ob tu yéetel ca'anal ichil, cu sen a'alico'ob ba'alo'ob tin wo'olal.

⁶Ba'ale' bíin taalac u kiinil quéen utzil kaj óolta'aquen tumen in caajal bíin xan u yojéelt, teen máax t'antmail, teen Yuumtzilen.

⁷¡Buca'aj jadzutzil u yila'al u kuchbal te jo'ol lu'umo'ob máax taasic ma'alob péectzilo'ob, máax taasic u péectzilo'ob jéedzel, máax taasic u péectzilo'ob jáalkabil bey xan cu ya'alic ti' Sión: Kue' leti' ajaw!

⁸¡Ch'en xiquint! A aj canano'ob táan u ka'am awato'ob cu múuch' ka'am awattico'ob dzáanche'etajil, tumen táan u yilico'ob tu yichilo'ob bix u suut Yuumtzilil tu caajil Sión.

⁹¡Juumnac a waawtique'ex dzáanche'etajil, u jenel caajil Jerusalén, tumen Yuumtzile' dzo'oc u ch'a'ic óotzilil ti' u caajal, dzo'oc u dzáic jáalkabil ti' Jerusalén!

¹⁰Yuumtzile' dzo'oc u ye'esic u páajtalil tu táan u yich tuláacal múuch' caajo'ob. Ti' tuláacal yóokolcaab bíin ojéelta'ac dzo'oc u toquico'on c Ku.

¹¹¡Jóokene'ex, jóokene'ex tu lu'umil Babilonia, ma' a machique'ex mix ba'al manba'alcunta'an, jóokene'ex tu lu'umil Babilonia! ¡Te'ex ca bisique'ex u nu'uculo'ob Yuumtzilo', ma' a cha'ique'ex a manba'altale'ex!

¹²Ba'ale' ma' bíin jóokoque'ex áalcabili', ma' púudzul bíin a beete'exi', tumen Yuumtzil u Ku Israele', leti' bíin canantique'ex tuláacal tu'ux.

¹³In palitzile' bíin xi'ic utzil ti', bíin líikesa'ac u ti'al j dzaabil sen ca'anal.

¹⁴Je'el bix úuchic u ja'akal u yóolo'ob tu yo'olal leti'e' le ca tu yilajo'ob u táan ich sen loobilta'ane' ma' chica'an ti' wa u yich wíiniqui',

¹⁵Bey xan sen ya'abcach múuch' caajo'ob bíin ja'akac u yóolo'ob; le ajawo'ob, quéen u yilo'obe', ma' bíin páatac u t'aanobi', tumen le quéen u yilo'obe' bíin u na'ato'ob ba'ax mix jun téen u yu'ubmajo'ob.