Read Yucateco Isaías 53 Bible Online

Isaías 53 - Yucateco bible

Isaías 53

¹¿Máax bíin u ocsaj óolt ba'axo'ob dzo'oc c u'uyic? ¿Ti' máax u ye'esmaj Yuumtzil u páajtalil?

²Yuumtzile' tu yóoltaj ca nojochchajac u palitzil je'el bix u ch'íijil muumun che' cu tabic u mootzo'ob ti' tiquin lu'ume'. Mina'an ca'ach u jadzutzil mix u qui'ichquelemil, tu wíinclile' mina'an ca'ach mix ba'al utz ca u cóol wíinico'ob tu yicnal;

³wíinico'obe' yéetel kex óolal cu sutico'ob ca'ach u paacho'ob ti'. Leti'e' jun túul máac chuup ca'ach yéetel ki'inamil, suucchaja'an u mukyaj. Bey máax ma' tu najmatic yila'ale', t sutaj c paach ti', ma' t táan óoltaji'.

⁴Ba'ale' leti'e' cuchmaj ca'ach tuláacal c mukyajo'ob, táan ca'ach u mukyajtic c ki'inalo'ob. To'one' t tucultaj ca'ach Ku beetmail loob ti'e', to'one' t tucultaj ja'adz ca'ach yéetel tu pajaj u subtal.

⁵Ba'ale' j lo'om tu yo'olal c ma' u'uyaj t'aanil, j beeta'ab u mukyaj tu yo'olal c kasa'anilo'ob; le jaadz tu mukyajtajo' tu taasaj ti' to'on jéedzel, tu yo'olal u loobilo'obe' j yanchaj ti' to'on toj óolal.

⁶Tuláacalo'on j sa'ato'on, bey u sa'atal j tamano'obe', t ch'aj c beel tu jujun túulilo'on, ba'ale' Yuumtzile' tu dzaj tu yóokol tuláacal c kasa'anil.

⁷Sen beeta'ab loob ti', ba'ale' tu láaj kamaj yéetel suuc óolal, mix tu dzajubáa j t'aani'; j bisa'ab je'el bix u bisa'al jun túul j taman tu cúuchil quíimsaje', leti'e' j p'áat x ma' t'aanil, ma' tu ya'alaj mix ba'ali'; j bisa'ab je'el bix u bisa'al jun túul j taman u ti'al j quíimsbile'.

⁸J ma'ach bisbil quex tumen mina'an u si'ipil, ma' j yanchaj máax toquiqui'; mix máac j tucult bix bíin dzo'ococ. Jo'oc u cuxtal way yóokolcaabe', j quíimsa'ab tu yo'olal u keban in caajal.

⁹J mu'uc tu tzéel loolob wíinico'ob, j mu'uc tu yéetel wíinico'ob táaj kasa'ano'ob, quex tumen mix jun téen u quíimsaj wíiniqui' yéetel mix jun teen jóok tuus tu chi'.

¹⁰Yuumtzile' tu yóoltaj u beet u mukyaj. Ba'ale' bey tumen leti' tu kubajubáa quíimil tu yo'olal kebane', bíin yanac chowac cuxtal ti', bíin kuchuc u yila'a u ch'i'ibalo'ob; tu yéetel leti'e' bíin jóokoc ma'alobil ba'axo'ob u jok jo'oltmaj Yuumtzil.

¹¹Cu dzo'ocol u sen mukyaje' bíin u yila'a sáasil, bíin qui'imacchajac u yóol le quéen u yojéelt; u toj palitzil Yuumtzilo', bíin u jáalkabt ya'abcach máaco'ob, tumen leti' bíin cuchic u kebano'ob.

¹²Tu yo'olal lelo', bíin dza'abac ti' tumem Yuumtzil jun p'éel cúuchil ichil nucuch máaco'ob, bíin pa'a muuknac ichil mu'uka'an máaco'ob, tumen leti'e' tu kubjubáa u ti'al j quíimil, xo'oc ca'ach ichil j loolob wíinico'ob, tu jaajile' leti'e' tu cuchaj u kebano'ob ya'abcach máaco'ob j káat óolnaj tu yo'olal aj kebano'obo'.