Read Yucateco Isaías 54 Bible Online

Isaías 54 - Yucateco bible

Isaías 54

¹X ma' paal co'olel, awat kaaynen yéetel qui'imac óolal; wéekec a kaay yéetel qui'imac óolal, teech mix jun téen síisajnaquech, tumen Yuumtzile' cu ya'alic ti' teech: Co'olel p'ata'an tumen u yíichame', bíin asab ya'abchajac u yaalo'ob, ti' co'olel yaan u yíicham.

²Nojochquint a chuybil naj, ma' a ch'a'ic sajaquil a cóochquintic u bo'oyil tu'ux cajacbalech; chowaccunt u suumilo'ob, pak ma'alob u che'ilo'ob a sinic,

³tumen bin u ca'aj xíit'il a cajtalil x no'ojil yéetel x dzíiquil; a ch'i'ibalo'obe' bíin u ch'a'ob ya'abcach múuch' caajo'ob bíin cajcunto'ob x tocoy caajo'ob.

⁴Ma' a ch'a'ic sajaquil, ma' bíin che'ejta'aquechi', ma' bíin po'och'oquechi', mix bíin yanac ba'ax o'olal a ch'a'ic subtali'. Bíin tu'ubuc ti' teech u sublaquil a x lo'obaynil mix xan bíin ka'ajac ti' teech u x paj subtalil p'áatiquech x ma' íichamil.

⁵Tumen máax beetmajileche', bíin dzo'ococ u beel ta wéetel. U kaaba'e' Yahveh, u yuumil tuláacal páajtalil; Ku, u quili'ichil Israele' leti' a jáalkabtajil, leti' u Kuil tuláacal yóokolcaab.

⁶Beyech ca'ach jun túul x okom óol lo'obayan atantzil p'ata'an tumen u yíichame', ba'ale' Kue' dzo'oc u ca'a t'aniquech yéetel cu ya'alic ti' teech:

⁷Chéen jun súutuc tin p'atajech, ba'ale' yéetel ya'abcach ch'a'a óotzilil bíin ca'a suunaquen ta wéetel.

⁸Tu yo'olal jun téec p'u'ujule', tin satajinbáa jun súutuc ti' teech, ba'ale' yéetel mina'an u xuul yaacunaje' tin ch'a'aj teech óotzilil. Lelo' Yuumtzil máax jáalkabtiquech a'alic.

⁹Je'el bix tin jalach t'antilac ti' Noé tu kiinilo'ob búulcabile', ma' bíin in ca'a búul yóokolcaabi', bey u jalach t'antic bejela'e' ma' bíin ca'a p'u'ujuquen ti' teech mix bíin in ca'a a'al in jadziquechi'.

¹⁰Quex ca kexpajac tu cúuchil le pu'uco'ob quex xan jenchajac le múulo'obo', in yaabilaj ti' teche' ma' bíin kexpajaqui' mix bíin p'áatac x ma' biilal in jéedzel nup t'aani'. Bey u ya'alic Yuumtzil máax ch'a'ic teech óotzilil.

¹¹¡Óotzil caaj, táan u ja'adzal tumen chac ikal, mina'an máax qui'imaccuntic u yóol! Tene' bíin in dzáa a tuunichilo'ob tu yóokol jadzutz box tuunich, bey xan bíin in dzáa a chuunpakilo'ob tu yóokol jadzutz ch'ooj tuunich;

¹²yéetel jadzutz chac tuunicho'ob bíin in beet a witzil najilo'ob bey xan bíin in beet yéetel jadzutz ya'ax tuunicho'ob a jool caajilo'ob, bíin xan in beet yéetel co'ocoj tuunicho'ob tuláacal a tuulumilo'ob.

¹³Tene' bíin in ca'anbes tuláacal a paalal, tuláacalo'ob bíin yanac ya'abcach u ayikalilo'ob.

¹⁴Ti'ibil bejil bíin u mu'uka'ancuntech, bíin ch'éenec a ye'edzel yéetel dza'abal tech sajaquuil, ma' bíin u ca'a sajaccunsech noj jak óolali'.

¹⁵Wa yaan máax cu taal u ba'atelteche', ma' teen bíin beetic u taal ba'ateltbilechi', ba'ale' teche' bíin a pa'a u muuk máax cu taal u ba'ateltech.

¹⁶Il a wile', teen j beet j meen máascab máax jóopsic u káakil le chúuc, u ti'al u beetic jejeláas, u nu'uculo'ob ba'atel; teen xan j beet le wíinic cu jut caajo'ob u ti'al u taasic nakan óotzilil;

¹⁷ba'ale' ma' yanac máax beetic u nu'ucul ba'atel u ti'al a xu'ulsa'ali'. Bíin a mac u chi' tuláacal máax cu táabal u tac a pool. Je'el ba'ax bíin in dzáic ti' tuláacal máaxo'ob meyajtiquena': Bíin in beet ca pa'a muuknaco'on. Yuumtzile' leti' máax jéedz t'antic.