Read Yucateco Isaías 55 Bible Online

Isaías 55 - Yucateco bible

Isaías 55

¹Tuláacal máaxo'ob ukajo'obe', taalaco'ob u yuko'ob ja'; máaxo'ob mina'an taakin ti'obe', taalaco'ob, mole'ex trigo x ma' bo'olal u ti'al a jaante'ex; ch'a'ex vino bey xan leche x ma' bo'olal.

²¿Ba'ax ten ca xupique'ex a taakine'ex ti' ba'alo'ob ma' u ti'al waaji'? ¿Ba'ax ten ca kubique'ex a náajale'ex tu yo'olal ba'alo'ob ma' tu náachcuntique'ex? U'uye'ex ma'alob ba'ax quin wa'alic u ti'al ca jaante'ex ma'alob janalo'ob, bíin a jaante'ex qui'iqui' janalo'ob.

³Co'otene'ex tin wicnal u ti'al ca a wu'uyene'ex ma'alob, ch'en xiquintene'ex u ti'al ca cuxlaque'ex. Tene' bíin in beet ta wéetele'ex jun p'éel nup t'aan mina'an xuulul ti', u ti'al in dzo'ocbesic in séeb chi'ob tu yo'olal in yaabilaj ti' David.

⁴Tene' tin dzáa u ti'al u beet u aj jaacunaj ti' tuláacal múuch' caajo'ob, tin dzáa u ti'al u méektáan yéetel u aj ca'anbesajil caajo'ob.

⁵Bíin a t'aan caajo'ob ma' u kaj óoltmaecho'obi'; caajo'ob ma' xan u kaj óoltmecho'obi' bíin taalac áalcabil ta wicnal. tumen teen a Yuumtzil, u quili'ich Ku Israele', dzo'oc in tziquiquech.

⁶Caxante'ex Yuumtzil ca'aliquil cu páajtal a nuptáantique'ex, t'aane'ex ca'aliquil naadz yanil.

⁷J loolob wíinique' u p'áat kaakas cuxtal, j kaakas tuucule', u p'at u kaakas tuuculo'ob; suunaque'ex ti' Yuumtzil u ti'al ca u ch'a'a ti' te'ex óotzilil; suunene'ex ti' c Ku, leti'e' nojoch u sa'atsaj.

⁸Tumen in tuuculo'obe', ma' bey je'el bix a tuucule'exe', in meyaje', ma' bey je'el bix a meyaje'exe'. Je'el bix ca'an náach yanil ti' u yóokol lu'ume', bey xan in tuuculo'ob yéetel ba'axo'ob quin beetique', asab ca'ana'altaco'ob ti' le a ti'ale'exo'ob. Yuumtzil a'alic.

¹⁰Je'el bix ja' yéetel ye'eb cu yéemel j ca'an, ma' tu ca'a na'acal, wa ma' táanil cu ch'ulic lu'um, u ti'al u beetic u jóokol pakalo'ob, u ti'al ca ichnaco'ob u ti'al ca'a pakbil u ti'al xan ca yanac waaj u ti'al jaantbil,

¹¹bey xan le t'aan cu jóokol tin chi'o', ma' bíin ca'a suunac tin wicnal wa ma' u beet u meyaji', ba'ale' bíin u beet ba'ax in káate, bíin xan u dzo'ocbes ba'ax quin wa'alique'.

¹²Te'exe' bíin jóokoque'ex yéetel qui'imac óolal te tu'ux yane'exo', bíin suunaque'ex yéetel jéedzel ta lu'ume'ex. Le quéen ila'ac tumen pu'uco'ob bey xan tumen jo'ol lu'umo'ob bíin wéekec u qui'iqui' kaayo'ob tuláacal túun u che'ilo'ob káaxe' bíin lalaj kabnaco'ob.

¹³Tu cúuchil x coj quéeje', bíin ch'íijic pino'obi', tu cúuchil láale' bíin ch'íijico'ob arrayani'; lelo' u nojbe'enil u kaaba' Yuumtzil bíin beetic, lelo' bíin meyajnac bey chíicul mina'an u xuule', ma' bíin manba'alchajaqui'.