Read Yucateco Isaías 56 Bible Online

Isaías 56 - Yucateco bible

Isaías 56

¹Yuumtzile' cu ya'alic: Beete'ex ba'ax no'oja'an, cuxlene'ex je'el bix u najmale', tumen tene', séeba'an bíin ca cha'abaque'ex; bin in ca'aj in we'es u páajtalil in tocsajil.

²Utz yanil le j xiib cu beetic ba'ax cu ya'alic le nu'ucbe'en t'aana' cu dzo'ocbesico'ob xan yéetel chuca'an óolal, cu dzo'ocbesic u ya'almaj t'aanilo'ob in sábado'ob, mix tu maba'alcuntico'ob, cu cananticubáa ma' u beetic mix ba'al kaas.

³Wa jun túul j táanxel lu'umil cu kubicubáa ti' Yuumtzile', ma' u ya'alic: Yuumtzile' bíin u dzáen jun tzéelil ti' u caajal. Mix le j nuum ti' u j xibil ma' u najmal u ya'alic: Tene' jun cúulen j tiquin che'.

⁴Tumen Yuumtzile' cu ya'alic: Wa le j nuumo'ob ti' u j xiibilo'ob cu dzo'ocbesico'ob u ya'almaj t'aanil in sábado'ob, bey xan wa cu dzo'ocbesico'ob ba'ax in káate' yéetel cu kubic u yóolo'ob u dzo'ocbeso'ob in nup t'aane',

⁵tene' bíin in dzáa ti'ob jun p'éel ba'al asab ma'alob u ti'al u j xibil paalal yéetel ti' u x ch'upul paalal; bíin in beet u dzíibta'al u kaaba'ob u ti'al kiino'ob mina'an u xuul ichil in kulnaj, yaan ichil in tuulumo'obo'; bíin in dzáa jun p'éel kaaba' ti'ob u ti'al kiino'ob mina'an u xuul, mix bikin bíin tu'upuc.

⁶Bey xan le j táanxel lu'umilo'ob bíin u kubjuba'ob ti' teno', u ti'al u meyajteno'ob yéetel u yaabilteno'ob, u ti'al ca in palitzilto'obo', wa cu dzo'ocbesico'ob u ya'almaj t'aanilo'ob in sábado'ob ma' xan tu manba'alcuntico'ob, tumen cu kubicuba'ob tu jaajil u yóolo'ob u dzo'ocbeso'ob in nup t'aane',

⁷tene' bíin in taaso'ob tin quili'ich witzil, bíin in beet u qui'ital u yóolo'ob tin najil tu'ux cu yúuchul payalchi'. Tene' bíin in kam tu yóokol u multuunil in kulta'al u taasaj tóocbil ba'alche'ob yéetel quíimsbil ba'alche'ob, tumen in wotoche' bíin a'ala'ac leti' u cúuchil payalchi' u ti'al tuláacal caajo'ob.

⁸Tene' bíin in beet u suuto'ob u ti'al ca u much'juba'ob máaxo'ob ti'ili' yano'ob tu'ux bisa'ano'ob táanxel lu'ume'. Lela', bey u ya'alic Yuumtzil, máax beetic u ca'a much'icubáa le j israelitaob bisa'ano'ob ca'ach táanxel lu'umilo'obo'.

⁹Co'otene'ex j káaxil dzíidzic ba'alche'ex; co'otene'ex u ba'alche'ile'ex káax, co'otene'ex a jaante'ex u múuch'ulo'ob le j tamano'obo';

¹⁰tumen u aj cananilo'ob in caajale' ch'óoptaco'ob, ma' tu yilico'ob mix ba'al. Tuláacalo'obe' chéen beyo'ob peeko'ob toottaco'ob ma' tu páajtal u wowo' chi'ibalo'ob; chéen chital yéetel wayak cu beetico'ob; sen utz tu t'aano'ob u wenelo'ob.

¹¹Chéen beyo'ob peeko'ob wi'ijtaco'ob ma' tu na'ajtalo'obe', j canan j tamano'ob mina'an u na'ato'ob; tu jujun túulilo'ob cu beetico'ob ba'axo'ob utz u ti'alo'ob.

¹²Cu ya'alico'ob: Cone'ex caxant vino yéetel ukulo'ob cu cáalcunajo'ob. U ti'al ca cáalchajaco'on, sáamale' j ca'a ukul je'el bix bejela'e', wa c chan tip'ic jun p'íiti'.