Read Yucateco Isaías 57 Bible Online

Isaías 57 - Yucateco bible

Isaías 57

¹máaxo'ob beetic ba'axo'ob tu beele' cu quíimilo'ob, ba'ale' mix máac tucultico'ob; utzul máaco'obe' cu samkajalo'ob, ba'ale' mix máac na'atic wa mix jun p'éel loob cu mukyajtico'ob tu kiinil u quíimilo'ob

²cu yantal jéedzel ti'ob. Toj úuchic u xíimbalo'ob, ba'ale' bejela'e' ti' cu je'elelo'ob tu mucnalo'obe'.

³Nadzaba'ex u paalale'ex x pul ya'aj, sijnale'ex ti' jun túul j nup keban wíinic yéetel jun túul x cáacbach:

⁴¿Te'exe' máax o'olal ca p'a'ase'ex? ¿Máax ca wéedztique'ex iquil a poch'ique'ex? ¿Máax ti' ca dzitique'ex a waake'ex? Te'exe' u paale'ex keban, aj tuus wíinique'ex;

⁵tu yáanal béeco'ob yéetel tu yáanal búuc le' che'ob ca beetique'ex ba'alo'ob subtzil u yila'alo'ob, ca quíimsique'ex a mejen paalale'ex u ti'al a kube'ex bey ti'ibil óolal tu t'o'ol ja'ob, yéetel tu yáam tuunicho'ob,

⁶Israel, teche' ca dzáic a wóol a kult u yuyulqui tuunichilo'ob t'o'ol ja', tumen ti' yaan jun p'éel cúuchil a ti'alinti'. Ti' leti'ob ta wecaj u ti'ibil óolalilo'ob vino, bey xan ta kubaj ti'ob u jejeláasil janalbe'en neeko'ob. ¿Bíin qui'imacchajac wa túun in wóol tu yo'olal tuláacal ba'ax ca beetic?

⁷Tu p'iich jun p'éel j ca'anal witz ta dzáa u nu'ucul a chital j wenel, ti' xan j na'aquech a kub quíimsbil ba'alche'obi'.

⁸Tu paach u jool najil a wotoch ta dzaj a subtzil beetbil kuob. Ta tu'ubsajen, ta pitaj a nook ca j p'áatech chacnul, ca j chilajech ta cóococh x táas che'; éet t'aanajech yéetel j xiibo'ob, yéetel le máaxo'ob ta wóoltaj chitale', táan a cha'antic ca'ach a j beetbil ku.

⁹Áalcabnajech tu tojil ku Mélec u ti'al a bis aceite yéetel ya'abcach qui'iboc ba'alo'ob; ta túuchi'itaj aj bisaj t'aano'ob tac asab náachil, ta beetaj u yéemelo'ob tac tu ajawil quíimil.

¹⁰Ta ca'anbesabáa ti' a sen bin yéetel a suut, ba'ale' ma' ta táan óoltaj wa mix ba'al u biilal ba'ax ca beetiqui'. Ta kab ca'ach yaan u ca'a líikil a muuk let o'olal ma' ta ca'anal ca'achi.

¹¹¿Máacalmáac ti' le kuob sajaquech ca'ach yéetel ca tziquico'ob xan, u ti'al ca kexen, yéetel u ti'al ca jach tu'ubsen? Tu kiinilo'ob ca'ach ma' ta tziquiquene', tene' quin p'áatal ca'ach x ma' t'aanil u ti'al in x mucultic.

¹²Ba'ale' tene' bin in ca'a in we'es ba'ax ca beetic, quex tumen táan a tucultic jach toj a cuxtal.

¹³Le quéen awatnaquech u ti'al a káatic áantaje', a beetbil kuobe' ma' bíin u yáantecho'obi' mix bíin u toquecho'obi'. Tuláacalo'ob bíin bisa'aco'ob tumen iik; chéen yéetel jun p'éel ustaj bíin p'áatac mix ba'alo'ob. Ba'ale' le máax u yoquesmaj u yóol ti' tene' bíin cajlac ti' le lu'umo'oba' bíin cajlac xan tin quili'ich pu'uc.

¹⁴Bíin u'uya'ac u ya'ala'al túun: Nu'ucbese'ex jun p'éel bej ma'alob táaxil, lukese'ex tuláacal ba'al kaatal quéen máanac in caajal.

¹⁵Tumen Aj sen ca'anal, máax cuxa'an mantadze', cu kaaba'intic quili'iche', cu ya'alic: Tene' ti' cajnáalen ti' jun p'éel quili'ich ca'anal cúuchile', ba'ale' ti' xan yanen tu yicnal óotzil cu mukyaje', u ti'al ca in dzáa u yóol yéetel ca in beet u ch'a'ic u yiik.

¹⁶Ma' bíin in tac u pool mantadz in caajali', mix bíin p'áataquen kuuxen tu yéetel sáamsamali'; tumen wa beyo' je'el in beetic u lúubul u yóolo'ob tin táan le wíinico'ob in beetmajo'.

¹⁷Tu yo'olal u keban Israele' j kuuxchajen jun jeedzac, tin jadzaj, tin tzelajinbáa xan ti'; ba'ale' leti'e' tu beetaj u j ma' u'uyaj t'aanile' ca tu cha'aj u jíilta'al tumen ba'axo'ob tu yóoltaj.

¹⁸Dzo'oc in wilic bix u cuxtal, ba'ale' bíin in dzaquej, bíin in beet xan u je'elsicubáa yéetel chuca'an jóom óolal. Teen bíin in qui'imaccunt u yóol le óotzil u yóolo'obo',

¹⁹bíin in wa'al ti' tuláacalo'ob: ¡Yanac jéedzel ti' le máaxo'ob yano'ob náacho', yanac xan jéedzel ti' le máaxo'ob yano'ob nadzo'! ¡Tene' bíin in dzac in caajal!

²⁰Ba'ale' j loolob wíinico'obe' beyo'ob ka'anab bo'oka'ane' ma' tu páajtal u p'áatal yedzecnac ichil u cuclilo'obe' cu láalic ba'alo'ob tu'.

²¹Mina'an utzil u ti'al j loolob wíinico'obo'. Kue' dzo'oc u ya'alic.