Read Yucateco Isaías 58 Bible Online

Isaías 58 - Yucateco bible

Isaías 58

¹Yuumtzile' tu ya'alaj ti' teen: ka'am awatnaquech x ma' sajaquil, beet u juum a t'aan je'el bix u jóopsa'al tropetae'; a'al u nu'uc ti' in caajal tu yo'olal u si'ipilo'ob, ti' u caajil Jacobe' tu yo'olal u kebano'ob.

²Sáamsamal u caxtiqueno'ob, jach qui'imac u yóolo'ob tumen u kaj óolo'ob in beelo'ob, je'el u ya'ala'al jun p'éel caaj cu beetic utze' ma' bin tu náayal u yóol ti' u dzo'ocbesico'ob in wa'almaj t'aano'obi'; cu qui'imacchajal u yóolo'ob bin quéen u nadzuba'ob ti' teen,

³ba'ale' cu ya'alico'ob: ¿Ba'ax u biilal ca'a su'ukinaco'on wa ma' tu yila'al tumen Ku? ¿Ba'ax biilal c p'isicbáa, wa mix tu táan óoltic? U kiinil su'ukine', cu meyaj ti' te'ex u ti'al náajal u ti'al xan a wocoltique'ex u náajal a aj meyaje'ex

⁴tu kiinil su'ukine', te'exe' cu máante'ex kiin táan a ba'atel t'aane'ex yéetel a paaclan looxe'ex, a wolmaj a kabe'ex táan a kol quíimsicaba'ex. Ti' jun p'éel u kiinil su'ukin beyo' ma' tu páajtal a najmatique'ex ca in wu'uy a payalchi'exi'.

⁵¿Ca tucultique'ex wa utz tin wóol jun p'éel su'ukin chéen iquil a wóotzilcuntique'ex a wiche'ex, wa tumen ca chinique'ex a pole'ex bey u chíinil jun cúul jalale' yéetel tumen ca chitale'ex ich ta'anil káak a búuquintmaje'ex to'och nooko'ob? ¿Leti' wa le ba'ax ca wa'alique'ex: Su'ukin yéetel u Kiinil qui'imac óolal u ti'al Yuumtzil?

⁶Lelo' ma' su'ukini'. Le su'ukin utz tin wóolo', leti' lela': ca a cotze'ex u kaaxilo'ob ba'ax ma' tu beel', bey xan ca a wach'e'ex u kaaxilo'ob palitzilil; ca a jáalkabte'ex máaxo'ob yedza'ano'obo' yéetel ca a xu'uls tuláacal loolob méektáan;

⁷ca a táacbes u jaant a wo'och waaj máax wi'ij, ca a kam xan ta wotoch le óotzil mina'an tu'ux u bo'oybesicubáo'; ca dzáa a búucbes máax mina'an u nook yéetel ma' u ch'éenel a wáantic a wéet wíiniquilo'ob.

⁸Bíin jóom sáasac túun a sáasil je'el bix u taal u sáastale' bíin séeb utzac túun a yajilo'ob. U tojil a cuxtale' bíin xi'ic táanil ti' teech bíin xi'ic xan ta wéetel in nojbe'enil.

⁹Bey túuno', wa ca t'aniquene', bíin in núuque; wa ca wawat u ti'al a káatic áantaje', bíin in wa'al ti' teech: Je'el yanen waya'. Wa ca jáawsic a yedzic a wéet wíiniquil, ma' xan ta poch'ic u láak máaco'ob mix ta líiksaj t'aane',

¹⁰wa ca dzáic ba'al u jaant máax wi'ij wa xan ca wáantic máax óotzile', bíin juulnac a sáas ich éekjoche'enil, a bo'oyilo'obe' bíin u sutuba'ob sáasil bey chúumuc kiine'.

¹¹Teen bíin in nu'ucbes a beel mantadz, bíin in dzáa ti' teech ya'abcach janal te x tocoy lu'umo', bíin in dzáa u muuk a wíinclil, bíin béeyaquech jun p'éel x péet paach ma'alob jóoyabta'anile', bíin béeyaquech sayab ma'atech u sa'ap'ale'.

¹²A caajale' bíin u ca'a líikes u x lab caajilo'obo', bíin u ma'alob jedzo'ob u chuun pakilo'ob dza'ano'ob sen úucho'. A caajale' bíin dza'abac u kaaba'int Aj utzquinaj jeenel pako'ob, j ca'a líiksaj lúubul najo'ob.

¹³Ma' a manba'alcuntic u sabado; ma' a dzíicabáa j meyaj ti' in quili'ich kiinil. Tuculte, le kiino', u kiinil qui'imac óolal, jun p'éel kiin quili'ich u ti'al Yuumtzil, cu najmatic tzicbe'enil, tzique, ma' a beetic a ba'aluba'ob, mix a caxtic ba'axo'ob chéen a ti'al.

¹⁴Wa ca beetic ba'ax quin wa'alica', bíin caxant a qui'imac óolal ti' teen, tene' bíin in culquintech tu sen ca'analil le múuch' caajo'ob, bíin xan in dzáa ca p'áatac ti' teech u kamba'albáil Jacob. Yuumtzil tu ya'alaj tu chi'il.