Read Yucateco Isaías 59 Bible Online

Isaías 59 - Yucateco bible

Isaías 59

¹U páajtalil Yuumtzile' ma' chichanchajac u ti'al cap'áatac ma' tu páajtal u dzáic tocsaj, mix p'áatac cóoqui' cu páajtal u yu'ubic t'aan.

²Ba'ale' le loobo'ob a beetmaje'exe', dzo'oc u líikesic jun p'éel pak, jun páaycuntique'ex ti' Ku; a kebane'exe' dzo'oc u beetic u pixic u yich ma' xan u káat u yu'ube'exi'.

³Te'exe' papak ki'ik a kabe'ex, u yaal a kabe'exe' papakqui yéetel u ki'ikel quimeno'ob; tu bóoxel a chi'exe' cu jóokol tuuso'obi, a waake'exe' cu beetico'ob loob.

⁴Mix máac cu toj tac pool, mix tu bin tu táan aj p'is óol u ya'al ba'al jaaj. Cu yu'ubico'ob tuuso'ob yéetel keechel t'aano'ob; chuup yanilo'ob yéetel kasa'anil u kubmajuba'ob ti' quíimsaj wíiniquil.

⁵Cu júuquico'ob u ye'el caan, cu jit'ico'ob u kaan j am; máax bíin jaantic le je'obo' bíin quíimico'ob, wa cu pu'uch'ul le je'ob tumen wa máaxe' cu jóokol j chi'ibal caano'obi'.

⁶Ma' tu páajtal u beeta'al búuco'ob yéetel u kaan j amo'ob; mix máac je'el u páajtal u búucbesicubáa yéetel ba'axo'ob cu jit'ico'obo'. Chéen j meen loob cu beetico'ob: u kabo'obe' cu péeco'ob u ti'al j meyaj loob,

⁷u yooco'obe' kabéet ti'ob u ti'al u bino'ob áalcabil ich kaas, u ti'al u séebcuntico'ob u bino'ob u weco'ob u ki'ikel máax mina'an u si'ipil. Chéen meen loob cu tucultico'ob le tu'ux cu máano'obe' chéen kascunaj yéetel óotzilil cu p'atico'ob.

⁸Ma' u kaj óolo'ob u bejil jéedzeli', ma' tu beetico'ob mix ba'al toj. Láaj keechel le bejo'ob tu'ux cu bino'ob; máaxo'ob cu máano'ob ti' le bejo'obo', ma' bíin yanac jéedzel ti'obi'.

⁹Le t o'olal dzo'oc u náachtal tocsajil ti' to'on jáalkabil xane' ma' tu náadzal t icnal; táan ca'ach c pa'atic sáasile', ba'ale' chéen éekjoche'enil bakpachtico'on; táan ca'ach c pa'atic sáasjome'enile', ba'ale' ich éekjoche'enil yano'on.

¹⁰T'at'al kabil c máan je'el bix u máan ch'óop tu jáal pake', bey mina'an c iche', quex sáasil kiine' c t'óochpajal, bey yéetel áakabe'; quex tooj c óole' beyo'on quimeno'obe'.

¹¹Tuláacalo'on jéemcalnajo'on beyo'on osoe', okolnajo'on beyo'on sacpacalo'obe' táan c páatic tocsaje' ba'ale' ma' tu kuchul táan c pa'atic jáalkabile' ba'ale' náach yanil.

¹²To'one' t sen po'opoch'ajech. cu dzo'ocol xane' c kebano'on taquic c pool; c ojel yaan c si'ipil, c kaj óoltmaj c kasa'anilo'ob.

¹³T beetaj c ma' u'uyaj t'aanil, t kexaj c Yuumtzil, ma' t óoltaj tzay pacht c Kui', chéen c tzicbaltic meyaj loobo'ob yéetel c beetic kaas cúulpachil, t jok jo'oltaj c tusic u láak máaco'ob.

¹⁴Ti'ibil bejile' kex óolta'an, tojil cuxtale' ma' t cha'ic u náadzal, jaajile' ti' cu náacal chúumuc kíiwique' u beeta'al xan ba'ax tu beele', náach yanil.

¹⁵Dzo'oc u xu'ulul jun óolalil, le máax cu tzelcubáa ti' kaase' cu yoocolta'al ba'ax yaan ti'. Yuumtzile' kuuxchaja'an tu yo'olal mina'an ti'ibil bejil.

¹⁶Yuumtzile' jela'an u yilic mix máac cu yóoltic u yutzquinte; ca túun tu yutzquintaj yéetel u páajtalil, leti'e' tu jaajil béeychaji.

¹⁷Tu búucbesubáa yéetel dzáanche'etajil, bey yéetel jun p'éel u chimalil ba'atele', tu dzaj tocsajil tu yóokol, je'el bix u dza'abal u p'óoquil ba'atele' tu búuquintaj sut jeel loobil, je'el bix jun p'éel suyeme', ca tu tep'ajubáa yéetel u p'uja'anil, je'el bix u tep'icubáa yéetel jun p'éel teep'e'.

¹⁸Yuumtzile' bíin u bo'ot ti' tu jujun túulal ba'ax cu najmatic; bíin u jadz u aj p'eeco'ob. Ti' máaxo'ob p'ectmaile' bíin u dzáa ba'ax cu najmatico'ob; tac máaxo'ob cajnáalo'ob tu múuch' caajilo'ob ka'anab.

¹⁹Tuláacal wíinico'ob, líikbal j lakin tac j chikine', bíin u tzico'ob Yuumtzil le quéen u yilo'ob u nojbe'enil. tumen leti'e' bíin talac je'el bix jun p'éel áalcab ja' cu tuule' péecsa'an tumen jun p'éel ka'amcach iike'.

²⁰Bíin taalac bey u aj tocsajil Sión yéetel ti' tuláacal u ch'i'ibalo'ob Jacob cu yaj óoltico'ob u si'ipilo'obe'. Lelo' Yuumtzil a'alic.

²¹Yuumtzile' cu ya'alic: Tene' quin beetic jun p'éel nup t'aan ta wéetele'ex, quin séeb chi'itic xan bíin yanac ta wéetele'ex in páajtalil yéetel in ca'anbesajo'ob in dzaamaj te'exo' ma' bíin u xúunp'atte'ex mix bikini', mix bíin u xúunp'at a ch'i'ibale'ex mix bikini'.