Read Yucateco Isaías 6 Bible Online

Isaías 6 - Yucateco bible

Isaías 6

¹Tu ja'abil quíimic ajaw Uziase', tin wilaj Yuumtzil ti' culucbal ti' jun p'éel ca'anal jalach káanche', le kulnajo' láaj chu'up yéetel u sáab chi' u suyem.

²Ti' yaan ca'ach tu yóokole' dze'edzec aj cuxa'ano'ob beyo'ob káake'. Tu jujun túulile' yaan ca'ach seis u xiiko'ob. Yéetel ca'a p'éel u xiike' cu pixic ca'ach u yicho'ob, yéetel u láak ca'a p'éele' cu pixic u yooco'ob, yéetel u láak ca'a p'éele', yéetel cu xiknalo'ob.

³Cu ya'alico'ob ca'ach tu báilo'ob: Quili'ich, quili'ich, quili'ich Yuumtzil u yuumil tuláacal páajtalil; tuláacal lu'ume' chuup yéetel u nojbe'enil.

⁴Le ca juumnaj le t'aano', u jool najilo'ob le kulnajo' quíilbanaji', ca j chu'up le kulnaj tu yéetel buudz.

⁵Tene' tin tucultaj: ¡Dzo'oc teen beya', bin in ca'aj quíimil! Dzo'oc in wilic tin wichil le Ajawo', Yuumtzil u yuumil tuláacal páajtalil; tene' chéen jun túulen wíinic ma' utz yanileni', cajnáalen chúumuc ti' jun p'éel caaj ma' utz yanil xani'.

⁶Ti' le súutuco' jun túul ti' le aj cuxa'ano'ob bey káake', xiknalnaj tac tin wicnal. U machmaj jun p'éel x nat'ab tu yéetele' tu ch'a'aj t'aba'an chúuc, yóokol u multuunil le kultajo',

⁷ca tu nacaj tin chi' ca tu ya'alaj ti' teen: Il a wile, le chúuca' dzo'oc u náacal tu bóoxol a chi'. Dzo'oc u lukesa'al a kasa'anil, dzo'oc xan u sa'atsa'al a si'ipilo'ob.

⁸Tin wu'uyaj túun u t'aan Yuumtzile', ca tu ya'alaj ti' teen: ¿Máax bíin in túuxte? ¿Máax bíin u beetjubáa c aj bisaj t'aan? Tene' tin núucaj: Je'elena', túuchi'iten.

⁹Leti'e' tu ya'alaj ti' teen: Xeen a wa'al ti' le caaj le t'aano'oba': Quex ca'a sen u'uyajnaque'exe', ma' bíin a na'ate'ex mix ba'ali'; quex ca sen paacatnaque'exe', mix ba'al bíin a ch'a'a nu'ucte'ex.

¹⁰Xa'akbes u tuucul le caaja'; tzuutz u xiquino'ob, pix u yicho'ob tu yo'olal ma' u paacato'ob mix u yu'ubajo'ob, mix u ch'a'a nu'uctico'ob t'aano'ob, tu yo'olal ma' u sutkajalo'ob ti' teen u ti'al ma' in dzaquico'ob.

¹¹Tene' tin káat chi'itaj: ¿In Yuum ba'ax kiin bíin úuchuc beyo'? Leti'e' tu núucaj ti' teen: Tac quéen je'enec le caajo'obo' u ti'al u p'áatalo'ob x ma' cajnáalilo'ob, tac quéen suunac x tocoyil le káaxo'obo',

¹²Yuumtzil túune' bíin u beet u bisa'al le caaj táanxel lu'umil, ca p'áatac jach mix máac yaan te j caajo'oba'.

¹³Quex wa ca p'áatac chéen jun jaatz ti' diez jaatzal ti' le caajo', bíin ca'a ju'uju'ute bey je'el bix u cúul ch'acta'al jun cúul béec wa jun cúul ja'abin chéen cu p'áatal u chuune'. (Ba'ale' ti' le chuuno', bíin jóokoc jun p'éel quili'ich ku'uk.)