Read Yucateco Isaías 60 Bible Online

Isaías 60 - Yucateco bible

Isaías 60

¹Jerusalén, líiken, bakpachtmajech sáasil, tumen dzo'oc u kuchul a sáasil u nojbe'enil Yuumtzil xane' táan u jóopbal ta wóokol.

²Éekjoch'e'enile' cu balic lu'um, áakabe' cu éekjoch'e'encuntic múuch' caajo'obo', ba'ale' Yuumtzile' bíin léembalnac ta wóokol bíin chíicpajac u nojbe'enil ta wóokol.

³Múuch' caajo'obe' bíin taalaco'ob tu tojil a sáasil, ajawo'obe', bíin taalaco'ob tu tojil u juul a sáastal.

⁴Líikes a wich, paacatnen ta bakpach: tuláacalo'ob cu much'icuba'ob u ti'al u taalo'ob ta tojil. A j xibil paalale', bíin taalaco'ob náach líikbalo'ob; a x ch'upul paalale', méekbil bíin taasa'aco'ob.

⁵Teche' quéen a wilo'obe', bíin sen qui'imacchajac a wóol, bíin chu'upuc a pucsi'ikal yéetel qui'imac óolal; bíin u taaso'ob ti' teech u ayikalil u múuch' caajilo'ob ka'anab, bíin u kubo'ob ti' teech u ayikalilo'ob múuch' caajo'ob.

⁶Bíin a wilabáa bakpachta'anech tumen ya'abcach camello'ob cu taalo'ob Madián yéetel Efa; bíin taalac tuláacal u cajnáalilo'ob Sabá, alcuchil u taalo'ob yéetel oro bey xan yéetel poom, bíin xan u kayo'ob u nojbe'enilo'ob Yuumtzil.

⁷Tuláacal u yalak ba'alche'ilo'ob Cedar bíin a ti'alinte; u j tamanilo'ob Nebaiote' bíin p'áataco'ob ta kab u ti'al a kub ti' Yuumtzil tu yóokol u multuunil u kulta'al ti'ibil óolo'ob utz u lúubul ti', cu dzo'ocole' bíin u asab jadzutzquint u kulnaj.

⁸¿Máaxo'ob cu xiknalo'ob bey múuyalo'ob, cu bino'ob bey sacpacalo'ob tu'ux u dzaamajo'ob u ku'ob?

⁹Lelo'obo', cheemo'ob cu taalo'ob múuch'ul, táanil ti'obe' cu taalo'ob cheemilo'ob Tarsis, táan u taasico'ob náachil a paalal yéetel ya'ab oro' bey xan ya'ab plata, tu nojbe'enil Yuumtzil, u quili'ich Ku Israel, tu beetaj u sen yantal ti' teech tziiquil.

¹⁰Táanxel lu'umilo'ob bíin ca'a utzquintic a tuulumilo'ob, bíin meyajta'aquech tumen u ajawilo'ob; tumen quex tu jadzajech Yuumtzil ichil u p'uja'anile', bejela'e' ichil u yutzile' dzo'oc u ch'a'ic teech óotzilil.

¹¹U joolo'ob a caajale', mantadz bíin p'áataco'ob je'ekab; ma' bíin ka'alaco'ob yéetel kiini', mix yéetel áakabi', u ti'al u taasa'al ti' teech u ayikalilo'ob múuch' caajo'ob u ti'al xan ca ococ ajawo'ob yéetel máaxo'ob láakintico'ob.

¹²Múuch' caaj ma' bíin u meyajteche', bíin xu'ulsa'ac; túulis múuch' caajo'ob bíin xu'ulsa'aco'ob.

¹³Yuumtzile' cu ya'alic ti' Jerusalén: U ayikalilo'ob Líbanoe' bíin taalaco'ob ta wicnal: pino'ob, abeto'ob yéetel cipreso'ob, u ti'al u jadzutquintic in kulnaj, u ti'al ca u dzáa nojbe'enil tu'ux quin pe'echak.

¹⁴U paalalo'ob máaxo'ob j palitzilteche', bíin taalaco'ob j t'ontal ta táan, tuláacal máaxo'ob cúulpachtiquech ca'ache', bíin taalaco'ob j xoltal tu ni' a wooc bíin u dza'ob xan a kaaba'int u Caajal Yuumtzil, U Sión Ku, u Quili'ich Israel.

¹⁵Ma' bíin xúunp'atta'aquech, p'eca'anech yéetel ta juunal, ba'ale' bíin in beet u p'áatal tzica'anech u ti'al mina'an u xuul, u ti'al ca qui'imacchajac a wóol jun tiich'.

¹⁶Múuch' caajo'obe', bíin u dza'ob ti' teech u asab ma'alobil janalo'ob bey xan ajawo'obe' bíin u taaso'ob ti' teech ayikalilo'ob; cu dzo'ocole' bíin a táan óolt teen Yuumtzil, a aj tocsajil, teen u muuk Jacob, teen jáalkabtiquech.

¹⁷Tu jeel broncee', bíin in dzáatech oro tu jeel fierroe', bíin in dzáatech plata, tu jeel che'e', bíin in dzáatech bronce tu jeel tuunicho'obe', bíin in dzáatech fierro. Bíin in beet a méektáanta'al tumen jéedzel, le tojilo' cu bíin u nu'uctic a beel.

¹⁸Ta lu'ume' ma' bíin ca u'uya'ac u juum loobiltáanbali', mix bíin xu'ulsa'aqui' mix bíin kascunta'ac a lu'umo'obi', ba'ale' bíin dza'abac u kaaba'int a tuulumo'obe': Tocsajil, ti' a jool najilo'obe': Qui'iqui' t'aan.

¹⁹Ma' bíin kabéetchajac a ju'ulul tumen le kiin je'ela', mix bíin kabéetchajac a ju'ulul tumen uj yéetel áakabi', tumen teen Yuumtzile', teen a sáasilen u ti'al mina'an u xuul; teen a Junab Ku, teen bíin beetic a jóopbal.

²⁰A kiine', mix bikin bíin t'úubuc mix a uj bíin sa'atac u sáasil, tumen teen, Yuumtzile', bíin sáasilnaquen a ti'al mina'an u xuul; u kiinilo'ob a okom óole', bíin xu'uluco'ob.

²¹Tuláacal u cajnáalilo'ob a caajale', bíin u beeto'ob ba'ax tu beel, leti'ob bíin u yuumilto'ob u lu'umo'ob jun puli', u ku'ukilo'ob jun p'éel che' teen j pake', leti'ob u meeyjulo'ob in kab u ti'al in we'esic in nojbe'enil.

²²Le jun chan láap'a' bíin sen ya'abchajac; le jun p'íit máaco'oba' bíin suunac jun p'éel nojoch múuch' caajo'ob. Teen Yuumtzil, teen bíin in beet u séeb úuchul, jach tu kiinil.