Read Yucateco Isaías 62 Bible Online

Isaías 62 - Yucateco bible

Isaías 62

¹Tu yo'olal in yaabilaj ti' teche' Sión, ma' bíin in mac in chi'i'; tu yo'ola'al in yaabilaj ti' teche' Jerusalén, ma' bíin je'elequen p'elac u léembal a pa'aj muuk je'el bix u taal u sáastale' a tocsajil xan bey taj che' t'aba'ane'.

²Le múuch' caajo'obo' bíin u yilo'ob a tocsajil, tuláacal ajawo'ob bíin u yilo'ob a tziiquil. Bíin túun yanac ti' teech jun p'éel túumben kaaba', Yuumtzil bíin u dzáa ti' teech.

³Teche' bíin quili'ich jalach péet jo'olchajaquech tu kab Yuumtzil a Ku.

⁴Mix jun téen bíin ca'a a'ala'ac teech: Co'olel xúunp'atta'an, mix ti' a lu'um bíin a'ala'ac: Lu'um kascunta'an, ba'ale' bíin a kaaba'int: Co'olel yéeya'an yéetel ti' a lu'ume' bíin u kaaba'int In watan tumen teech u yéeymajech Yuumtzil, leti' bíin u betjubáa íichamtzil ti' a lu'um.

⁵Tumen je'el bix u dzo'ocol u beel jun túul j xi'ipal yéetel jun túul x ch'úupale', bey bíin u ch'a'ech Ku u ti'al u yatantech, bíin u ca'a utzquint a pakilo'ob, bíin u ca'a qui'imaccuns u yóol ta wéetel, je'el bix qui'imaquil u yóol jun túul íichamtzil yéetel u yatane'.

⁶Jerusalén ta tuulumilo'obe', dzo'oc in dzáic aj canano'obi' ma' bíin ch'éenec u ya'alico'ob bul kiin yéetel bul áakab: Ma' u p'áatal maacal u chi'ob máaxo'ob kultic Yuumtzil,

⁷ma' u cha'abal u je'elel wa ma' dzo'ococ u yutzquinta'al u pakilo'ob Jerusalén wa ma' u beet u qui'iqui' t'anta'al tumen tuláacal u yóokolcaabi'.

⁸Yuumtzile' tu líiksaj u x no'oj kab yaan u páajtalil, ca jalach t'aan: Mix bikin bíin in cha'aj u jaanta'al a wo'och trigo tumen a aj p'eeco'ob, mix u yu'ukul a wo'och vino tumen j táanxel lu'umilo'ob dzo'oc a meyajtic yéetel a muuk;

⁹ba'ale' te'exe', ta kabile'ex bíin a joche'ex, bíin a jaante'ex, bíin xan a qui'iqui' t'antene'ex; bíin a mole'ex u yich uva, bíin xan a wuke'ex vino ichil u sujuy táancabilo'ob in quili'ich kulnaj.

¹⁰Jóokene'ex, jóokene'ex tu jool caaj, nu'ucbese'ex u beel in caajal. Beete'ex cóococh sac le bejo', láaj mole'ex u tuunichilo'ob; líikese'ex jun p'éel chíicul u ti'al a t'anique'ex múuch' caajo'ob.

¹¹Yuumtzile' cu dzáic ojéeltbil le ba'ala', tac tu xuul yóokolcaab. A'ale'ex ti' u caajil Sión dzo'oc u kuchul u aj tocsajil. Yuumtzile' cu taasic u caajal cu dzo'ocol u toquic.

¹²Le j israelitaobo' bíin u kaaba'into'ob: Quili'ich caaj. U aj jáalkabo'ob Yuumtzil, ti' Jerusalene' bíin u a'ala'ac: Caaj dzíibolta'an, Jun p'éel caaj ma' xúunp'atta'ani'.