Read Yucateco Isaías 64 Bible Online

Isaías 64 - Yucateco bible

Isaías 64

¹Quexi'i' ca a jat le ca'an u ti'al ca éemequech u ti'al a beetic u quiquilaanquil tuláacal witzo'obo',

²je'el bix u quiquilaanquil x coj quéejo'ob cu tóocalo'ob tumen káak wa quex je'el bix u looc ja'e'. Bey túuno' a aj p'eeco'obe' bíin u kaj óolto'ob a kaaba' múuch' caajo'ob xane' bíin quiquilnaco'ob ta táan.

³Le ca ta beetaj sajbe'entzil ba'alo'ob ma' t p'áatic ca'ache'e', le ca j éemeche', witzo'obe' quíilbalnajo'ob ta táan.

⁴Mix jun téen u'uya'ac, mix jun téen ila'ac xan u láak Ku táanil wa pachal ti' teech ca u beet ba'alo'ob beyo', u ti'al u yutzil ti' máaxo'ob u yocsaj yóolo'ob ti'.

⁵Teche' ca kamic máax beetic utz yéetel qui'imac óol bey xan ti' máax cu ka'ajal u beet ba'ax a káati. Teche' kuuxchaja'anech tumen j kebanchajo'on; sen úuch jo'op'oc c poch'iquech.

⁶Tuláacalo'on beyo'on jun túul máac ma' utz yanile'; tuláacal c utzul meyajo'obe' bey x lab nook éeke'; tuláacalo'on dzo'oc c lúubul bey tiquin sojolo'one', c meen lo'obo'obe', cu jíiltico'on bey u jíiltaj iike'.

⁷Mix máac cu payalchi' ti' teech, mix ca u beet u muukil u ti'al u caxant a wáantaj; le t o'olal ta ta'acbesajabáa ti' to'on bey xan ta xúunp'attajo'on tu yo'olal c kasa'anil.

⁸Quex beyo', Yuumtzil teche' c yuumech; to'one' kato'on, teech c aj pat kat; ¡teech ta láaj beetajo'on!

⁹Yuumtzil ma' a sen p'u'ujul, mix xan ta ka'ajsic c loobilo'ob. ¡Il a wile', to'one' a caajalo'on!

¹⁰A quili'ich caajilo'obe', x tocoychaja'ano'ob, Jerusalene' láaj jeenel.

¹¹C quili'ich nojbe'en kul naj tu'ux ca'ach cu qui'iqui' t'antiquecho'ob ca'ach c taataobe' láaj jeenel tumen káak. ¡Tuláacal ba'axo'ob c asab yaabilmaj ca'ache' láaj kaschajo'ob!

¹²Yuumtzil ¿ma' wa bíin a beet mix ba'al tu yo'olal le ba'alo'oba'? ¿Bin a ca'aj wa j p'áatal x ma' t'aanil bin a ca'aj wa a jach paj subtal xan?