Read Yucateco Isaías 65 Bible Online

Isaías 65 - Yucateco bible

Isaías 65

¹Yuumtzile' cu ya'alic: Máaxo'ob ma' u káatmajo'ob ti' teen mix ba'al ca'ache' leti'ob j taalo'ob u káato'ob áantaj ti' teen; máaxo'ob ma' u caxanteno'ob ca'acho' leti'ob j nuptáanteno'ob. Ti' jun p'éel caaj ma' payalchi'inac ti' teen ca'ache' ti' leti' tin wa'alaj: Je'el yanen waya'.

²Bul kiin tin tich'aj in kab u ti'al in t'anic tin wicnal jun p'éel caaj ma' u'uyaj t'aan, cu bin ti' j keechel bejo'ob, chéen tu juunal yóolo'ob;

³jun p'éel caaj mantadz cu poch'iquen tin táan; tumen cu kubic quíimsbil ba'alche'ob ti' kuob, ichil u x péet paachil nicte'ob bey xan cu tóoquic ca'ach poom tu yóokol u multuunil kultajo'ob beeta'ano'ob yéetel pak lu'um;

⁴cu cutal ca'ach tu cúuchil mucnalo'ob, cu máansic áakab ti' ta'acbil cúuchilo'ob; cu jaantico'ob u bakel kéeken cu chupic xan u cuumo'ob yéetel u kaab janal ma' utz yanilo'obi'.

⁵Cu ya'alico'ob: P'áataquech te'elo', ma' a machiquen; sen quili'ichen u ti'al ca a machen. Le wíinico'obo', beyo'ob káak cu tóoch'bal bul kiine'; cu chi'ichnaccuntiqueno'ob je'el bix u yocol buudz tu joolo'ob in ni'e'.

⁶Ba'ale' tuláacal láaj dzíibta'an tin táan, ma' bíin p'áatac chéen x méek kabili', bin in ca'aj in dzáa le jaadzo'ob cu najmatico'obo',

⁷tu yo'olal u loobilo'ob, bey xan tu yo'olal le tu beetajo'ob u taataobo'. Leti'obe' cu tóoquico'ob poom ca'ach tu yóokol witzo'ob yéetel cu poch'iqueno'ob te jo'ol lu'umo'obo'. Táanil unaj in wilic buca'aj u p'aaxo'ob cu dzo'ocole' quin dzáic le jaadzo'ob cu najmatico'obo'. Yuumtzil a'alic.

⁸Yuumtzile' cu ya'alic: Tu kiinil sen yaan u kaab uvaobe' ma' tu kascunta'al tumen le wíinico'obo', tumen cu páajtal u jóokesico'ob ya'ab vino. Bey xan tene' bíin in beet tu yo'olal in yaabilaj ti' in palitzilo'ob; ma' bíin in job tuláacal le múuch' caajo'obo'.

⁹Bíin in beet u yantal u ch'i'ibalo'ob Jacob, bey xan ca yanac máaco'ob tu caajil Judá u ti'al ca cajlaco'ob tin pu'uquilo'ob. In aj yéeyajo'obe' bíin u ti'alinto'ob le lu'umo', ti' bíin cajlaco'ob in palitzilo'obi'.

¹⁰U táax koomilo'ob Sarone' bíin chu'upuco'ob yéetel u múuch'ul j tamano'ob yéetel tu táax koomil Acore' bíin janac le wacaxo'ob le bíin yanac ti' caaj cu caxtiquen.

¹¹Ba'ale' te'ex máax ca náachtale'ex ti' Yuumtzil yéetel ca tu'ubsique'ex in quili'ich pu'uc bey xan ca kubique'ex waaj yéetel vino ti' Gad yéetel Meni, u kuilo'ob u yúuchul buul,

¹²u buulil ba'axo'ob cu taal u kiinile', kaas ba'axo'ob cu taasic: bíin in beet a quíimile'ex yéetel u ch'aac máascab. Tumen tene' tin páay t'antaje'ex, ba'ale' te'exe' ma' ta éejemtaje'exi'; tin t'aanaje'ex ba'ale' ma' ta wu'uye'exi'; ta beetaje'ex ba'axo'ob ma' utz tin t'aano'obi', ta yéeyaje'ex ba'axo'ob kuuxiltiquen.

¹³Tu yo'olal lelo' Yuumtzile' cu ya'alic: In palitzilo'obe' bíin yanac ba'al u jaanto'ob, ba'ale' te'exe' bíin a mukyajte'ex wi'ij; leti'obe' bíin yanac ja' u yuko'ob, ba'ale' te'exe' bíin a mukyajte'ex ukaj; leti'obe' bíin qui'imacchajac u yóolo'ob, ba'ale' te'exe', bíin a ch'a'ex subtal;

¹⁴leti'obe' bíin kaaynaco'ob yéetel u qui'imac óolalil u pucsi'ikalo'ob, ba'ale' te'exe', bíin awat okolnaque'ex yéetel u okom óolalil a yaj óole'ex.

¹⁵Máaxo'ob in yéeymajo'obe', bíin u ch'a'a chi'ito'ob a kaaba'ex u ti'al u loolob t'aano'ob u ti'al xan u dzíiboltico'ob quíimil ti' u láako'ob, ba'ale' in palitzilo'obe' bíin in kex u kaaba'ob.

¹⁶Je'el máaxac ich caajil ca u káat jun p'éel qui' t'aane', bíin u káat ti' u jaajil Ku; yéetel máax bíin u beet jun p'éel séeb chi' ti' caaje', bíin u beet tu kaaba' u jaajil Ku. Le úuchben mukyajo'obo', dzo'oc u tu'ublajlo'ob, dzo'oc u náachtalo'ob ti' teen.

¹⁷Il a wile'ex, tene' bin in ca'aj in beet jun p'éel túumben ca'an yéetel jun p'éel túumben lu'um. Le ba'ax dzo'oc u yúuchulo' bíin tu'ubsa'ac, ma' bíin ka'ajac ti' mix máaqui'.

¹⁸Qui'imacchajac u wóole'ex jun puli' tu yo'olal ba'ax quin in beete, tumen bin in ca'aj in beet jun p'éel Jerusalén qui'imac u yóol yéetel jun p'éel caaj qui'imac u yóol ichil.

¹⁹Teen xane' bíin qui'imacchajac in wóol tu yo'olal Jerusalén, bíin qui'imacchajac in wóol tu yo'olal in caajal. Ichile' ma' bíin u'uya'ac u ca'a úuchul okol yéetel u yawatilo'ob yaj óoli'.

²⁰Te'elo' ma' bíin quíimic mejen paalalo'ob chéen jun p'íit u kiinilo'obi', mix nuxibo'ob ma' chúucbeso'ob u kiinilo'ob u cuxtalo'obi'. Máax cu quíimil yaan cien u ja'abilo'obe' táanquelem úuchic u quíimil, máax ma' tu chuquic cien u ja'abilo'obe', loolob t'anta'an.

²¹Máaxo'ob cu beetico'ob u yotocho'obe' bíin cajlaco'ob ichilo'ob, máaxo'ob pakic uvaobe' bíin u jaanto'ob u yich.

²²Ma' bíin cajlac yaanal máac ti' le naj cu beeta'al tumen u láak máaqui', wa ca jaanta'ac u yich u pakal uva tumen u yaanal. In caajale' bíin chowacchajac u cuxtal je'el bix u cuxtal jun cúul che'e'; le máaxo'ob in yéeymajo'obe' bíin u jaanto'ob u yich u meyajo'ob.

²³Ma' bíin meyajnaquech chéen cuneli' mix bíin yanac u séeb quíimil a paalalo'obi', tumen leti'obe' u ch'i'ibalo'ob máaxo'ob qui' t'anta'ano'ob tumen Yuumtzil, bey xan u ch'i'ibalo'ob leti'ob.

²⁴Ma'ili' u t'aaneno'obe' teen bíin in núuc ti'ob; ma'ili' dzo'ococ u t'aano'obe' teen bíin in wu'uyo'ob.

²⁵J coj yéetel j tamane' bíin múul janaco'ob, león yéetel wacaxe' bíin u múul jaanto'ob xíiw, caane' bíin u tzéentubáa yéetel lu'um. Ma' bíin yanac ichil in quili'ich pu'uc mix máac u ti'al meen loobi'. Lelo' Yuumtzil dzo'oc u ya'alic.