Read Yucateco Isaías 66 Bible Online

Isaías 66 - Yucateco bible

Isaías 66

¹Yuumtzile' cu ya'alic: Ca'ano' in jalach káanche' lu'ume' u cúuchil u jedztal in wooc. ¿Tu'ux bíin páatac u beeta'al ti' teen jun p'éel kulnaje'? ¿Tu'ux bíin páatac u beeta'al jun p'éel u cúuchil je'elel in ti'al?

²¡Teen tin kabil in beetmaj tuláacal le ba'alo'oba', bey úuchic u chu'unpajalo'obo'! Teen Yuumtzil a'alic. Le j xiib quin pactico' leti'e' óotzil yaj xan u yóol, cu tziquic in t'aan.

³Ba'ale' yaan máaxo'ob quíimsic jun túul wacax, ba'ale' cu quíimsico'ob xan jun túul máac; cu xotico'ob u caal jun túul j taman ba'ale' cu cachico'ob xan u caal jun túul peek; cu kubico'ob jejeláas janalbe'en neeko'ob, ba'ale' cu kubico'ob xan u ki'ikel jun túul kéeken; cu tóoquico'ob poom, ba'ale' cu kultico'ob xan jun túul beetbil ku. Le máaxo'ob tu yéeyajo'ob u beetico'ob le p'ecbe'en tich' kabo'obo', utz tu t'aano'ob u beetico'ob tuláacal le ba'alo'obo'.

⁴Teen xane' bíin in yéey ba'ax mukyajil bíin in dzáa ti'ob, bíin in taas tu yóokolo'ob le ba'ax ti' sen sajaco'obo'. Tumen tin t'aanajo'obe' ba'ale' mix jun túul ti'ob tu yóoltaj u núuc in t'aani'; tu beetajo'ob ba'ax in p'ectmaj, tu yéeyajo'ob ba'ax kaas u lúubul ti' teen.

⁵Ch'enxiquinte'ex u t'aano'ob Yuumtzil, te'ex ca tziquique'ex u t'aano'obe': Dze'edzec a wéet caajale'ex máaxo'ob p'ecmaile'ex, máaxo'ob ch'a'apachtique'ex tumen ca payalchi'ex tin kaaba'e', cu ya'alico'ob: U ye'es u nojbe'enil Yuumtzil; c káat ila'ob qui'imac yóolo'ob. Ba'ale' leti'obe' bíin p'áataco'ob kaasil.

⁶Le ka'amcach juum cu taal te j caajo', ka'amcach juum cu taal te j kulnajo', leti' le juum cu beetic Yuumtzil iquil u dzáic ba'ax cu najmatic u aj p'eeco'obo'.

⁷Sione' síijsajnaj ca'aliquil ma' u mukyajt u ki'inamil síijsaji'.

⁸¿Yaan wa máax u'uymajil u tzicbalil u láak ba'al beyo'? ¿Máax ilmajil u láak ba'al beyo'? ¿Cu síijil wa jun múuch' caajo'ob chéen ti' jun p'éelili' kiin? ¿Cu síijil wa jun p'éel caaj jun súutuc? Ba'ale' Sione', chéen p'elac úuchic u cáajal u ki'inamile' tu jáan síijsaj u paalalo'ob.

⁹¿Bix bíin in wet' ca'ach le síijilo' wa teen beetic u yúuchule'? Yuumtzil a Ku dzo'oc u ya'alic.

¹⁰Qui'imacchajac a wóole'ex tu yéetel Jerusalén, qui'imacchajac a wóole'ex yéetel tuláacal máaxo'ob yaamajil; much'aba'ex ti' u qui'imac óolal yéetel máaxo'ob oktic ca'achi;

¹¹leti' bey jun túul maamae', bíin u tzéento'ob yéetel qui' óolquinaj.

¹²Tumen teen Yuumtzile', teen a'alic: Tene' bíin in beet u taal jéedzel tu yóokol je'el bix jun p'éel áalcab ja'e', bíin taalac xan u ayikalilo'ob múuch' caajo'ob je'el bix u taal ya'abcach ja' cu tuule'. Leti' bíin tzéentique'ex, méekbil bíin u bise'ex bíin xan u culquinte'ex tu píixo'ob u ti'al u qui'imaccunt a wóole'ex.

¹³Je'el bix u qui'imaccunta'al u yóol jun túul paal tumen u maamae', bey bíin in qui'imaccunt a wóole'exo', bíin xan a nuptáante'ex u qui'imac óolal Jerusalén.

¹⁴Le quéen a wile'ex le ba'ala', bíin qui'imachajac u yóol a pucsi'ikale'ex; bíin ca'a mu'uka'anchajac a wíinclile'ex je'el bix u ya'axtal xíiwe'. Yuumtzile' bíin u dzáa kaj óoltbil u páajtalil ichil u palitzilo'ob, bey xan u ye'es u p'uja'anil ichil u aj p'eeco'ob.

¹⁵Tumen Yuumtzile' cu kuchul tu chúumuc jun p'éel káak, u bolano'obe' beyo'ob mosono'obe'; bin u ca'aj u láal u sen p'uja'anil bey xan u yaachilo'ob u káakilo'ob u jaadz.

¹⁶Yuumtzile' bin u ca'aj xot kiin yéetel káak, bin u ca'aj u p'is óolt tuláacal yóokolcaab yéetel u máascab, bíin u beet u quíimil ya'abcach máaco'ob.

¹⁷Yuumtzile' cu ya'alic: Le máaxo'ob cu jun páaycunticuba'ob yéetel cu yutzquiticuba'ob u ti'al u manba'al kultajo'ob ichil u x péet paachil nicte'ob táan u t'u'ulpachtico'ob jun túul máac cu bin chúumuc, le máaxo'ob cu jaantico'ob u bakel kéeken, u bakel ch'o' wa u bakel u láak ba'alche'ob ma' utz yanilo'obe', bíin láaj xu'ulsa'aco'ob jun páaquili', tumen tene' in wojel tuláacal ba'ax cu beetico'ob bey xan in kaj óol u tuuculo'ob. Bíin taalaquen túun in much'quint caajo'ob yéetel múuch' caajo'ob, cu dzo'ocole' bíin taalaco'ob u yilo'ob in nojbe'enil.

¹⁹Teen bíin in dzáa jun p'éel chíiculal ti'ob: bíin in cha'a u púudzul dze'edzec ti'ob u ti'al ca in túuxto'ob te j múuch' caajo'ob: Tarsis yéetel Libia, tu múuch' caajil Libia tu'ux ojéelan bix u yúuchul ba'atel tu yéetel x p'úunche', bey xan Tubal yéetel Grecia yéetel tu náanach múuch' caajilo'ob ka'anab, le mix jun téen yu'ubo'ob u tzicbalil yéetel mix u yilmajo'ob in nojbe'enili'; leti'ob bíin ka'aytic in nojbe'enil ti' múuch' caajo'ob.

²⁰Bíin u beeto'ob u taal tuláacal múuch' caajo'ob tuláacal xan a wéet caajale'ex, yóokol tzíimino'ob, ti' bolano'ob, ti' kóoch che'ob cucha'ano'ob tumen tzíimino'ob, tu yóokol tzímino'ob yéetel tu yóokol camello'ob. Bíin u beetuba'ob jun p'éel ti'ibil óolal in ti'al tu caajil Jerusalén, tin quili'ich pu'uc, je'el bix le ti'ibil óolalo'ob cu taasa'al tumen le j israelitaob tin kulnaj ti' nu'uculo'ob p'o'antaco'obo'. Teen Yuumtzil dzo'oc in wa'alic.

²¹Dze'edzec ti' leti'ob bíin in yéeyo'ob u ti'al u beeto'ob u aj kiinilo'ob yéetel u ti'al u beeto'ob u j levitailo'obi'. Teen Yuumtzil dzo'oc in wa'alic.

²²Yuumtzile' cu ya'alic xan: Je'el bix bin in ca'aj in beet jun p'éel túumben ca'an yéetel jun p'éel túumben lu'um u ti'al mina'an u xuule', bey xan bíin xaanac a ch'i'ibalo'ob bey xan a kaaba'.

²³Tu jujun winal tu kiinil chichan uj, yéetel tu jujun p'éelil sábado, tuláacal le j xiibo'ob bíin taalaco'ob j noctal tin táan. Teen Yuumtzil dzo'oc in wa'alic.

²⁴Bíin taalaco'ob u ti'al ca u yilo'ob u j quimen wíinclilo'ob le máaxo'ob tu ma' u'uyaj t'anteno'obo'. X nookolo'ob jaantico'obe', ma' bíin quíimico'obi', u káakil xan máaxo'ob tóoquico'obe', ma' bíin tu'upuqui'. ¡Bíin p'áataco'ob p'ecbe'en ba'alil u ti'al tuláacal u wíiniquilo'ob yóokolcaab!