Read Yucateco Isaías 9 Bible Online

Isaías 9 - Yucateco bible

Isaías 9

¹Tu yáax chuune', Kue' tu pajaj u subtal Galilea, u lu'umilo'ob Sabulón yéetel Neftalí, máaxo'ob cajacbalo'ob tu tzéel u caajo'ob j ma' ocsaj óolo'ob líikbal tu táanxel tzéelil u yáalcab ja'il Jordán tac tu jáal ka'anab; ba'ale' cu dzo'ocole' tu dzaj nojoch tziiquil ti'ob.

²Le caaj cu xíimbal ca'ach ich éekjoch'e'enile', tu yilaj nojoch sáasil; dzo'oc u jóopbal jun p'éel sáasil ti' le máaxo'ob cajnáalo'ob ca'ach ich éekjoch'e'enilo'.

³Yuumtzile', dzo'oc a taasic jun p'éel nojoch qui'ima'ac óolal; jach sen nojoch le qui'imac óolalo'. Tuláacal máax cu qui'imactal u yóol je'el bix tu kiinilo'ob jooche', je'el bix u qui'imacchajal u yóolo'ob le máaxo'ob cu t'oxicuba'ob tu yéetel nucuch ayikalilo'obe'.

⁴Tumen teche', dzo'oc a xu'ulsic le palitzilil cu beetic ca'ach u mukyaj le caajo', mukyaj cu beetic u yokol ca'achi, ti' le loolob méektáan yanilo'ob ca'acho'. Ti' le kiino'ob ca ta xu'ulsaj Madiano'.

⁵U juum u xanabo'ob u taalbal le aj ba'atelo'ob, u búuco'ob boonolo'ob yéetel ki'ike', bíin tóoca'aco'ob, bíin su'utuco'ob ta'anil tumen káak.

⁶Tumen c ti'ale' dzo'oc u síijil jun túul chan xi'ipal, Kue', dzo'oc u dzáic ti' to'on jun túul paal, ti' máax dzo'oc u dza'abal u páajtalil u méektáan. Bíin dza'abac le kaaba'ob ti'a': Ilajbe'en tu yo'olal ba'axo'ob cu beetic, Ku ma' ilajbe'eni', u Yuumbil mina'an xu'ulul ti', u ajawil jéedzel.

⁷Bíin culac tu jalach káanche' David; u páajtalil u ajawile', bíin ki'itpajac tuláacal tu'ux ma' xan bíin xu'uluc u jéedzeli'; u ajawile' bíin ma'alob cúuluc, u culubilo'obe' bíin jéedzec ti' ba'ax tu beel yéetel ti' tojil u ti'al tuláacal le ja'abo'oba' ti' xan le cu taalbalo'obo'. Lela', bíin béeyac tu yo'olal u nojoch yaacunaj Yuumtzil u yuumil tuláacal páajtalil.

⁸Yuumtzile', dzo'oc u túuchi'itic jun p'éel péectzil ti' Israel, ti' u caajil Jacob;

⁹tuláacal u caajil Efraín, ki'itpaja'ano'ob tu lu'umil Samariae', dzo'oc u ch'a'a nu'uctic. Leti'obe', cu ya'alico'ob ichil nonojbáilo'ob yéetel u ca'anal ichilo'ob:

¹⁰Dzo'oc u lúublajal u pak lu'umilo'ob, ba'ale' bíin c beet u jeelo'ob yéetel tuunich. Dzo'oc u ch'a'acal u quelem che'ilo'ob tu'ux c jóokesic u che'ilo'ob c otoch, ba'ale' co'ox kexic yéetel kuulche'ob.

¹¹Yuumtzile' dzo'oc u beetic u taal sajbe'entzil aj p'eeco'ob; leti'e' dzo'oc u ya'alic ti'ob ca u taalaco'ob j ba'atel.

¹²J lakine' bíin talac j siriob, j chikine' bíin talac j filisteob. Israele' chéen bey jun níich' waaj u ti'alo'obe'. Ba'ale' u p'uja'anil Yuumtzile' ma' ch'éenequi'; láili' xi'ic u bin u ya'alic bíin jaadznaque'.

¹³Ba'ale' le caajo', ma' j suunaj ti' Ku le máax jadzic ca'acho'; ma' tu caxtaj le Yuumtzil yaan tuláacal páajtalil ti'o'.

¹⁴Yuumtzil túune' tu beetaj ti' israel je'el bix u beeta'al ti', jun túul ba'alche' cu cúul ch'acta'al u nej yéetel u caale', je'el bix u ch'a'acal xa'an pa'ate' tu yéetel jalale'. ¡Tuláacal lela', jun p'éelili' kiin bíin úuchuc!

¹⁵(U poole' leti' le u nuuquilo'ob caaj yéetel le u jalach najilo'obo', u neje' leti' le aj bóobato'ob cu ca'anbesico'ob tuuso'obo'.)

¹⁶U nuuquilo'ob le caaja', dzo'oc u beetico'ob sa'atal le caaja', máaxo'ob cu caxtico'ob u aj bejo'obe', dzo'oc u sa'atalo'ob.

¹⁷Le t o'olal Yuumtzile', ma' tu ch'a'aj óotzilil ti' táaquelem j xi'ipalalo'obi', mix ti' j ma' taataob yéetel x quimen íichamo'obi'. Tuláacal le caajo', j ma' ocsaj óolo'obi' táaj kaas xan u cuxtalo'ob, chéen binqui' ba'alo'ob cu ya'alico'ob. Ba'ale', u p'uja'anil Yuumtzile' ma' ch'éenequi'; láili' xi'ic u bin u ya'alic bíin jaadznaque'.

¹⁸Loolob cuxtale' cu beetic ya'ab kaas je'el bix le tóoc cu beetic u jáabal ki'ixo'ob yéetel le poc che'obo', cu beetic xan u yelel u che'ilo'ob káax, cu dzo'ocole' cu líikesic tu yóol iik ichil u mosonil buudz.

¹⁹Tu yo'olal u p'uja'anil Yuumtzil u yuumil tuláacal páajtalile', táan u yelel le múuch' caajo', le káako' cu beetic u ta'antal le caajo'; cu jaantico'ob tac u bakel u paalalo'ob ma' tu ch'a'ico'ob óotzilil ti' u láako'ob. Waye' yaan jun túul cu lukic u yo'ochi', ba'ale' láili' wi'ij u p'áatale', te'elo' yaan u láak jun túul cu janal, ba'ale' ma' tu na'ajtal.

²¹Manasese', cu xu'ulsic Efraín, Efraine', cu xu'ulsic manasés, ba'ale' cu much'icuba'ob u ba'atelto'ob Judá. Ba'ale', u p'uja'anil Yuumtzile' ma' ch'éenequi'; láili' xi'ic u bin u ya'alic bíin jaadznaque'.