Read Yucateco Levítico 1 Bible Online

Levítico 1 - Yucateco bible

Levítico 1

¹Yuumtzile' tu t'anaj Moisés tu noj Paselil Much'tal, ca tu ya'alaj ti':

²T'aanen yéetel le israelitaobo' ca'a a wa'al ti'ob, le quéen u taaso'ob teen ba'alche' u ti'al ti'ibil óolale' unaj u ch'aico'ob ti' u múuch'ul u wacaxo'ob wa ti' u j tamano'ob.

³Wa leti'e' ba'alche' tu táanbesaj u ti'al láaj tóocbil tu ch'a'aj ichil u yaalake', kabéet jun túul xiibil wacax láaj utz u wíinclil; u ti'al ca ka'amaque', unaj u ku'ubul tu jool u noj Paselil j muuch'tal, tu táan Yuumtzil,

⁴yaan u dzáic u kab tu yóokol u pool le ba'alche'o', beyo' le ba'alche'o' cu ka'amal ti' u ti'al u sa'atsa'al u si'ipilo'ob.

⁵Yaan u xotic u yúul le j xiibil wacaxo' tu táan Yuumtzil, cu dzo'ocole' le aj kiino'ob u paalal Aarone', cu kubico'ob le u ki'ikelo'. Yaan xan u widzib kabtico'ob yéetel le ki'iko' tu yóokol yéetel tu bakpach le u multuunil kultajo' yaan tu noj Paselil Much'talo'.

⁶Le máax táanbesic le ba'alche' láaj tóocbilo' yaan u dzíilic, cu dzo'ocole' u kéewelile' cu xo'oxo'otic,

⁷le aj kiino'obo' cu tzolico'ob u si'il yóokol le u multuunil kultajo', cu dzo'ocole' cu t'abico'ob

⁸u ti'al u dzáico'ob yóokole' unaj u xóoxot'al le ba'alche'o', pa'ate' yéetel u pool u tzaatzel yéetel u jobnel.

⁹Le máax táanbesic le láaj tóocbil ba'alche'o' unaj u p'o'ic yéetel ja' u jobnel bey xan u muuk yooco'ob le ba'alche'o', tuláacal lelo' yaan u tóoca'al tumen le aj kiin tu yóokol u multuunil kultaj bey jun p'éel qui'iboc ti'ibil óolal u ti'al Yuumtzil.

¹⁰Wa le ba'alche' cu taasic u kub u ti'al ti'ibil óolal tu ch'a'aj ichil u múuch'ul j tamano'ob wa u j yuuco'obe' u naj kabéet jun túul j xiibil ba'alche' láaj utz u wíinclil,

¹¹unaj u xotic u yúul tu xaman le u multuunil kultajo' tu táan Yuumtzil. Le aj kiino'ob u paalal Aarone', yaan u widzico'ob u ki'ikel le ba'alche'o' tu yóokol yéetel tu bakpach le multuunil kultajo',

¹²cu dzo'ocole' cu xotic u xéexet'al le ba'alche'o', le aj kiino' cu dzáic le u xóoxot'al yóokol le si' cu tóoch'bal te tu multuunil kultajo' tu tzéel u pool u tzaatzel yéetel u jobnel.

¹³Cu dzo'ocole', le máax táanbesic le ti'ibil óolalo' u naj u p'o'ic u jobnel yéetel ja', bey xan u muuk yooco'ob le ba'alche'o', tuláacal lela' yaan u tóoca'al tumen le aj kiino' tu yóokol le u multuunil kultaj bey jun p'éel qui'iboc tóocbil ti'ibil óolal ti' Yuumtzil.

¹⁴Wa le ba'alche' cu ku'ubul u ti'al ti'ibil óolal ti' u nojbe'enil Yuumtzil jun túul ch'íich'e' unaj u taasa'al jun túul mucuy wa jun túul u chichnil sacpacal.

¹⁵Le aj kiino' cu táanbesic le ch'íich' tu multuunil le kultajo': cu cotzic u pool, cu yedzic u ki'ikel tu tzéel le u multuunil kultajo', cu dzo'ocole' cu tóoquic yóokol.

¹⁶Cu lukesic u chíin yéetel tuláacal ba'ax u lukmaj ca'achi' cu dzo'ocole' cu pulic tu lakin u multuunil kultaj tu'ux cu dza'abal u ta'anil le káako';

¹⁷cu machic tu xiiko'obe' cu bujic, ba'ale' ma' bíin u jun páaycunt le ca'a xéet'elo'obo', cu dzo'ocole' cu tóoquic le ch'íich' yóokol u si'il le multuunil kultajo' bey jun p'éel tóocbil ti'ibil óolal qui'iboc tu táan Yuumtzil.