Read Yucateco Levítico 11 Bible Online

Levítico 11 - Yucateco bible

Levítico 11

¹Yuumtzile' tu t'anaj Moisés yéetel Aarone' ca tu ya'alaj ti'ob:

²A'ale'ex ti' le j israelitaob ba'ax ba'alche'ilo'ob ti' yóok lu'um je'el u páajtal u jaantico'obe',

³bíin u jaanto'ob le cu ca'a jach'o'ob yaan xan ca'a xa'ay u maayo'obo';

⁴Ba'ale' ma' u najmal u jaantico'ob le ba'alche'ob beyo'oba', quex cu ca'a jach'o'ob wa quex ca'a xa'ay u maayo'ob; Le camello' cu ca'a jach'o', ba'ale' ma' ca'a xa'ay u maayo'obi'. Unaj u ya'alico'ob ma' janalbe'en ba'alche'i'.

⁵Le j chi'ico', quex cu ca'a jach'e', ba'ale' ma' ca'a xa'ay u maayi'. Unaj u ya'alico'ob ma' janalbe'en ba'alche'i'.

⁶Le j tzuubo', cu ca'a jach', ba'ale' ma' ca'a xa'ay u maayi'. Unaj u ya'alico'ob ma' janalbe'en ba'alche'i'.

⁷Le kéekeno' quex tumen yaan u maayo'ob ca'a xa'aye', ma' tu ca'a jach'. U najmal u ya'alico'ob ma' janalbe'en ba'alche'i'.

⁸Ma' unaj u jaantico'ob u bakel le ba'alche'ob je'elo'oba', mix unaj u machico'ob u quimenilo'obi'. Unaj u ya'alico'ob ma' janalbe'en ba'alche'i'.

⁹U ba'alche'ilo'ob ja' cajnáalo'ob ti' ka'anab wa ti' áalcab ja'e', chéen bíin páatchajac u jaantico'ob le yaan u xiiko'ob u ti'al u báabo'ob yéetel yaan u sóolo'ob.

¹⁰Ba'ale' le mina'an u xiiko'ob u ti'al u báabo'ob mix yaan u sóolo'obe', unaj a wa'alique'ex p'ecbe'en ba'alche'ob, je'el bix wa u ba'alche'ilo'ob ka'anabe', bey wa u ba'alche'ilo'ob áalcab ja', je'el bix le mejen ba'alche'obo', bey le nuuctaco'obo'.

¹¹Ma' unaj a jaantique'ex u bakeli', unaj a wa'alique'ex p'ecbe'en ba'alche', yaan xan a p'ectique'ex le quimentaco'obo'.

¹²Tuláacal u ba'alche'ilo'ob ka'anab mina'an u xiik u ti'al u báabo'ob mix yaan u sóolo'obe', unaj a wa'alique'ex p'ecbe'en ba'alche'ob.

¹³Le ch'íich'o'ob je'ela' ma' unaj a jaantique'exi'; lelo'oba' unaj a wa'alique'ex p'ecbe'eno'ob: Le j cooto', le j cach baaco', le j cootil ka'anabo',

¹⁴le j ch'úuyo' yéetel u jejeláasil j e'epíip,

¹⁵tuláacal u jejeláasil j ch'oomo'ob,

¹⁶le j noj áalcab ch'íich'o', le xooch'o', le sac boco',[4] tuláacal u jejeláasil j ch'úuyo'ob,

¹⁷le tunculuchujo', le j ch'oomo', le j sac boc box u poolo',

¹⁸le cuutzil ja'o', le p'óonto', le siidz kuuxo',

¹⁹tuláacal u jejeláasil sac boco'ob, le p'oot x cosamo' yéetel le soodzo'.

²⁰Tuláacal mejen ikelo'ob cu xiknalo'ob wa cu xíimbale', unaj u ya'alico'ob p'ecbe'en,

²¹ba'ale' je'el u páajtal u jaantico'ob le cu xiknalo'ob yéetel cu xíimbalo'ob yaan u muuk u yooco'ob núupul ti' u yooco'ob u ti'al u síit'o'ob yóok lu'ume'.

²²Ti' le je'elo'obo' je'el u páajtal u jaantico'ob u jejeláasil sáako'obe.

²³Ba'ale' tuláacal u láak mejen ikelo'ob cu xiknal wa cu xíimbale', unaj u ya'alico'ob p'ecbe'entzil.

²⁴Je'el ba'axo'ob bíin u p'at ma' utz yanile'exe': Je'el máax ca u mach jun túul u quimenil le ba'alche'obo', cu p'áatal ma' utz yanil tac u yoocbal kiino'.

²⁵Je'el máax bíin ch'úuyic jun túul ti' le ba'alche'obo', kabéet u p'o'ic u nook, cu p'áatal ma' utz yanil tac u ocbal kiino'.

²⁶Tuláacal ba'alche'ob yaan u maayo'ob ba'ale' ma' ca'a xa'ayo'ob mix tu ca'a jaach'o'obe', unaj u ya'alal ma' janalbe'en ba'alche'i', je'el máaxac ca u mache' cu p'áatal kaas yanil.

²⁷Tuláacal ba'alche' can dzíit yooc cu jedzic u táan yooc j lu'um u ti'al u xíimbale', unaj u ya'alal ma' janalbe'en ba'alche'i'; je'el máaxac ca u mach jun túul u quimenilo'obe', cu p'áatal ma' utz yanil tac u yocbal kiin.

²⁸Le máax xan bíin ch'úuyic jun túul u quimenilo'obe', yaan u p'o'ic u nook, cu dzo'ocole' cu p'áatal ma' utz yanil tac u yocbal kiini', tumen te'exe' unaj a wa'alique'ex ma' janalbe'en ba'alche'obi'.

²⁹Ti' le ba'alche'ob cu jíilticuba'ob j lu'umo', unaj a wa'alique'ex ma' janalbe'en le je'elo'oba': sáabino'ob, ch'o'ob, yéetel tuláacal u jejeláasil ba'alche'ob cu jíiltcuba'ob,

³⁰je'el bix péedz kiin, áayino'ob, x méemecho'ob yéetel juujo'ob.

³¹Ichil tuláacal ba'alche'obe', le je'elo'oba', unaj a wa'alique'ex ma' janalbe'eno'obi'. Je'el máax ca u mach u quimenilo'obe', cu p'áatal ma' utz tac u yocbal kiin.

³²Yaan xan u p'áatal ma' utz yanil je'el ba'alac ca lúubuc ti' yóokol le j quimen ba'alche'obo'. Je'el bix jun p'éel ba'al beeta'an yéetel che'e', bey jun p'éel búuc beeta'an yéetel kéewel, jun p'éel ba'as wa je'el ba'alac nu'uculil kabéete', unaj u dza'amal ich ja', yéetel cu p'áatal ma' utz yanil tac u yocbal kiin, cu dzo'ocol lelo', cu p'áatal utz yanil.

³³Wa u quimen wíinclil je'el ba'ax ba'alche'il cu lúubul ti' jun p'éel cuum beeta'an yéetel kate', tuláacal ba'ax yaan ichil le cuumo' cu kastal yanil, unaj u pa'abal.

³⁴Tuláacal janal tu'ux bíin wéequec u ja'il le cuumo', cu p'áatal ma' utz yanili'; bey xan bíin p'áatac tuláacal ukul yaan ichil.

³⁵Yóokol tuláacal ba'ax bíin lúubuc u quimen wíinclil jun túul ti' le ba'alche'obo', bíin p'áatac ma' utz yanili'; quex jun p'éel chujcab, quex jun p'éel chan x loot chujcab; unaj u pa'abal. Unaj a wa'alique'ex ma' utz yanil le ba'alo'obo'.

³⁶Ba'ale' le sayab wa le ch'e'en tu'ux cu yu'ukul ja'e', cu p'áatal utz yanil; chéen ba'ale' le máax machic u quimenil le ba'alche'obo', cu kastal yanil.

³⁷Wa u quimen wíinclil le ba'alche'ob cu lúubul tu yóokol i'inaj bin u ca j pakbile', le i'inajo' láili' utz yanil u p'áatale';

³⁸ba'ale' wa dzo'oc u dzabal ja' ti' le i'inaj quéen lúubuc le quimen ba'alche' yóokolo', unaj u ya'alal ma' utz yanili'.

³⁹Wa cu quíimil jun túul ti' le ba'alche'ob ca bin a jaante'ex ca'acho', le máax bíin machique' cu p'áatal ma' utz yanil tac u yocbal kiin;

⁴⁰le máax bíin jaantic u bakel le ba'alche'o' unaj u p'o'ic u nook, bey xan cu p'áatal ma' utz yanil tac u yocbal kiin; bey xan le máax bíin jóoksic u quimen wíinclil le ba'alche'o', unaj u p'o'ic u nook, yéetel cu p'áatal ma' utz yanil tac u yocbal kiin.

⁴¹Ma' unaj a jaantique'ex mix jun túul ba'alche' cu jilaanquil j lu'ume', tumen p'ecbe'en ba'alche'.

⁴²Ti' tuláacal le ba'alche'ob cu jilaanquilo'ob j lu'ume', ma' unaj a jaantique'ex mix jun túuli', je'el bix wa cu jilaanquil tu nake', bey wa cu xíimbal yéetel u ca'a dzíit ooc, tumen p'ecbe'en ba'alche'ob.

⁴³Ma' p'ecbe'encunsique'ex a wanile'ex, mix u p'áatal ma' utz yanile'ex yéetel mix jun túul ba'alche' cu jilaanquil,

⁴⁴Tumen tene' Yuumtzilen a Kuex. Te'exe', unaj a wutzquinticaba'ex yéetel unaj a quili'ichcunticaba'ex, tumen tene' quili'ichen. Ma' a beetique'ex u p'áatal kaas yanile'ex yéetel mix jun túul ba'alche' cu jilaanquil j lu'um.

⁴⁵Teen Yuumtzilen, máax beet a jóokole'ex Egipto u ti'al in beetiquimbáa a Kuex. Let o'olale' te'exe' unaj quili'iche'ex, tumen tene' quili'ichen.

⁴⁶Lela' u ya'almaj xiquinilo'ob tu yo'olal ba'alche'ob, ch'íich'o'ob yéetel tuláacal ba'ax cuxa'an yéetel cu péec yóok ja', bey xan tuláacal ba'alche'ob cu péec yóok lu'um.

⁴⁷Yo'olal u páajtal a kaj óoltique'ex ba'ax utz yéetel ba'ax kaas, bey xan máacalmáac ba'alche' u ti'al jaantbil yéetel máacalmac ma' u ti'al jaantbili'.