Read Yucateco Levítico 15 Bible Online

Levítico 15 - Yucateco bible

Levítico 15

¹Yuumtzile' tu t'anaj Moisés yéetel Aarone' ca ya'alaj ti'ob:

²A'ale'ex ti' le j israelitaobo' le quéen koja'anchajac jun túul j xiib tu yo'olal cu ya'alal u pujil u j xiibile', le puj cu jóokolo', ma' utzi'.

³Le j xiib ma' utz yanil tu yo'olal cu pujanquil je'el bix wa tu ya'alal tu j xiibile', bey xan wa tzuutzul tumen. Je'el bix ca úuchuque' leti'e', ma' utz yanili'.

⁴Tuláacal tu'ux ca chilac le j xiib yéetel je'el tu'ux cu ch'áajal u koja'anile' cu p'áatal ma' utz yanili'. Ti' je'el ba'alac ca culaque', yaan u ya'alal ma' utz yanil le nu'uculo'.

⁵Je'el máaxac ca cóojoc ti' le cúuchil tu'ux chilaj le j xiibo', u najmal u p'o'ic u nook bey xan u p'o'icubáa yéetel ja', cu ya'alal ma' utz yanil tac u yocbal kiin.

⁶Je'el máaxac ca culac tu'ux culaj le j xiibo' u najmal u p'o'ic u nook bey xan u p'o'icubáa yéetel ja', cu p'áatal ma' utz yanil tac u yocbal kiin.

⁷Je'el máax bíin machic le máax cu chooj le puj ti'o', u najmal u p'o'ic u nook bey xan u p'o'icubáa yéetel ja', cu p'áatal ma' utz yanil tac u yoocbal kiin.

⁸Wa le máax cu mukyajtic u chooj pujil u j xiibil cu túub tu yóokol jun túul máax utz yanile', le máaco' yaan u p'o'ic u nook bey xan u p'o'icubáa yéetel ja', cu ya'ala'al ma' utz yanil tac u yocbal kiin.

⁹Je'el ba'ax jéequeb xéec ca meyajnac ti' le máax koja'an ti' u yáalal u pujil u j xiibilo', yaan u ya'ala'al ma' utz yanili'.

¹⁰Je'el máaxac ca u mach wa ba'ax tu'ux culaj le j xiib koja'an ti' u pujanquil u j xiibilo' cu ya'alal ma' utz yanil tac u yocbal kiin. Je'el máaxac ca u bis wa ba'ax ti' le ba'alo'obo', u najmal u p'o'ic u nook bey xan u p'o'icubáa yéetel ja', cu ya'alal ma' utz yanil tac u yocbal kiin.

¹¹Je'el máaxac bíin ma'achac tumen le máax koja'an ti' u pujanquil u j xiibil ca'aliquil ma' u p'o'o u kabe', unaj u p'o'ic u nook yéetel u p'o'icubáa yéetel ja', cu ya'alal xan ma' utz yanil tac u yocbal kiin.

¹²Le u cuumil kat cu ma'achal tumen le máax koja'an ti' u pujil j xiibilo' unaj u pa'abal; le ba'alo'ob beeta'an che' u ca'ajo'obo' unaj u p'o'obol.

¹³Wa cu yutztal le j xiib máax cu yáalal u pujil u j xiibilo', unaj u xoquic siete kiino'ob u ti'al u páatal utz yanil; unaj u p'o'ic u nook yéetel u p'o'icubáa yéetel u ja'il sayab, bey túuno' cu p'áatal utz yanil.

¹⁴Tu ocho kiine' cu ch'a'ic ca'a túul mucuy wa ca'a túul mejen sacpacale', cu bin tu jool u noj Paselil Muuch'tal u ti'al ca u láaj kub ti' aj kiin tu táan Yuumtzil.

¹⁵Le aj kiino' cu quíimsic jun túul ti'ob u ti'al u kub tu yo'olal keban, u láak jun túulo' cu láaj tóoquic, beyo' cu dzo'ocbesic tu táan Yuumtzil le ba'ax kabéet u ti'al u p'áatal utz yanil le máax koja'an ti' u pujanquil u j xiibilo'.

¹⁶Le quéen koja'anchajac jun túul j xiib ti' u yáalal u pujil u j xiibile', bíin u láaj p'o' u wíinclil yéetel ja', bey xan yaan u ya'alal ma' utz yanil tac u yocbal kiin.

¹⁷Je'el ba'axac nookil wa kéewel tu'ux bíin ch'áajac u pujil u j xiibilo', unaj u p'o'obol yéetel ja' bey xan cu p'áatal ma' utz yanil tac u yocbal kiin.

¹⁸Wa cu núupcubáa jun túul xiib yéetel jun túul co'olele', tu ca'a túulal unaj u p'o'icuba'ob yéetel ja', cu p'áatalo'ob xan ma' utz yanilo'ob tac u yocbal kiin.

¹⁹Wa jun túul co'olel cu yilic u nook je'el bix suuquil u yilique', bíin a'ala'ac ma' utz yanil siete kiino'obi'. Je'el máaxac bíin machique', yaan u ya'alal ma' utz yanil tac u yocbal kiin.

²⁰Je'el ti' ba'ax bíin chilac tu kiinilo'ob cu yilic u nooke', yaan u ya'alal ma' utz yanili'. Ti' je'el ba'axac bíin culaque', bíin a'ala'ac ma' utz yanili'.

²¹Je'el máaxac bíin machic tu'ux chilaj x letie', unaj u p'o'ic u nook u p'o'icubáa yéetel ja', bíin a'ala'ac ma' utz yanil tac u yocbal kiin.

²²Je'el máaxac bíin machic tu'ux culaj x letie', unaj u p'o'ic u nook u naj xan u p'o'icubáa yéetel ja', cu ya'alal ma' utz yanil tac u yocbal kiin.

²³Quex chéen ca u mach wa tu'ux chilaj le co'olelo', bíin a'ala'ac ma' utz yanil tac u yocbal kiin.

²⁴Wa jun túul j xiib cu nupicubáa x yéetele', cu táacpajal ti' u kaasil yanil, yaan xan u ya'alal ma' utz yanil siete kiino'ob, bey xan bíin a'ala'ac ti' le tu'ux j chilajo'.

²⁵Wa cu máansic ki'ik jun túul co'olel quex ma' kuchuc u kiinil u yilic u nook, bey xan cu ya'abtal u kiinilo'ob je'el bix wa cu máan u kiinil táan u yilic u nooke', bíin a'ala'ac ma' utz yanil tuláacal u kiinil u máansic ki'ik je'el bix wa táan u yilic u nooke'.

²⁶Je'el tu'ux ca wenec leti, wa je'el ba'ax ti' bíin culac tu kiinil u máansic le ki'iko', bíin a'ala'ac ma' utz yanil je'el bix wa táan u yilic u nooke'.

²⁷Je'el máaxac ca u mach le ba'alo'oba', yaan u ya'alal ma' utz yanili'. U najmal u p'o'ic u nook bey xan u p'o'icubáa yéetel ja', cu ya'alal ma' utz yanil tac u yocbal kiin.

²⁸Le quéen jáawac u máansic ki'ike', je'el u páajtal u xoquic siete kiino'obe', cu dzo'ocole' cu p'áatal utz yanil.

²⁹Cu máan ocho kiino'obe' cu ch'a'ic ca'a túul mucuy wa ca'a túul mejen sacpacale', cu bisic ti' le aj kiin tu noj Paselil Muuch'tal.

³⁰Le aj kiino', cu quíimsic jun túul tu yo'olal keban yéetel u láak jun túulo', cu láaj tóoquic. Beyo' le aj kiino' cu dzo'ocbesic tu táan Yuumtzil u ti'al u yutztal le co'olel ti' u máansic u ki'ikelo',

³¹bey túuno' ca náachcuntique'ex le j israelitaob ti' u kaasilo'ob tu yo'olal ma' u quíimilo'ob iquil u kascuntico'ob yéetelo'ob in cúuchil tu'ux quin cajtal ichile'ex.

³²Lelo'oba' u tzol xiquinilo'ob u ti'al máaxo'ob koja'ano'ob ti' u máansic ki'ik yéetel máaxo'ob cu yáalal u pujil u j xiibilo'ob, cu p'áatalo'ob ma' utz yanilo'ob tu yo'olali';

³³tac xan tu yo'olal co'olelo'ob cu u yilico'ob u nooko'ob, bey xan ti' tuláacal máaxo'ob mukyajtic u máansico'ob ki'ik, je'el bix j xiibe' bey x co'olel, bey xan le j xiibo'ob cu chitalo'ob yéetel jun túul co'olel táan u yilic u nooko'.