Read Yucateco Levítico 16 Bible Online

Levítico 16 - Yucateco bible

Levítico 16

¹Yuumtzile' t'aanaj yéetel Moisés cu dzo'ocol u quíimil u ca'a túul paalal Aarón j quíimo'ob iquil úuchic u sen nadzicuba'ob tu táan Yuumtzil.

²Ca tu ya'alaj Yuumtzil ti' Moisés: A'al ti' a sucu'un Aarón ma' u yocol chéen je'el ba'ax súutuquil te j quili'ich cúuchil yaan tu paach le káasabo', mix tu táan le maac yaan yóokol le ba'asche'o', yo'olal ma' u quíimil; tumen tene' bíin in chíicbesimbáa ichil jun p'éel múuyal tu yóokol le maaco'.

³Aarone' unaj u yocol ichil le quili'ich cúuchil u ch'a'amaj jun túul chan wacax u ti'al u quíims tu yo'olal keban, bey xan jun túul j taman u ti'al u táanbes láaj tóocbil.

⁴Unaj u bin u búucbesmubáa yéetel le nook lino u ca'aj jun páaycuna'ano', bey xan u búuquintmaj u xuut' eexo'ob láili' lino u ca'ajo'obe', yaan u dzáic u kaxnak, bey xan le pix jo'ol lino u ca'ajo'. Le nook je'ela' jun páaycuna'an, let o'olal ma'ili' u búuquinte' kabéet u p'o'icubáa yéetel ja'.

⁵U ti'al u cajtalil le j israelitaobo', Aarone' bíin u ch'a'a ca'a túul j yuuco'ob u ti'al quíimsbil tu yo'olal keban yéetel jun túul j taman u ti'al j ku'ubul láaj tóocbil.

⁶Cu táanbesic túun le chan wacax u ti'al quíimsbil tu yo'olal u keban leti', tu yo'olal u kamic u sa'atsaj si'ipil u keban pa'ate' yéetel u yotoch.

⁷Cu dzo'ocole' cu ch'a'ic le ca'a túul j yuuco'obo', cu táanbesic tu jool u noj Paselil Muuch'tal;

⁸cu dzo'ocole' cu beetic u buulil le ca'a túul j yuuco'obo', jun p'éel buule' u ti'al Yuumtzil, u láake' u ti'al Azazel.

⁹Le j yuuc cu bin jóokol u ti'al Yuumtzilo', cu ku'ubul quíimsbil tumen Aarón tu yo'olal keban;

¹⁰le j yuuc cu bin jóokol u ti'alt Azazelo', cu táanbesic cuxa'an tu táan Yuumtzil u ti'al u kamic u sa'atsaj si'ipil kebano'ob, cu dzo'ocole' cu tojlic ca xi'ic x tocoy lu'um tu'ux yaan Azazel.

¹¹Aarone' cu kubic le chan wacax quíimsbil tu yo'olal u keban leti', u ti'al u kamic u sa'atsaj si'ipil u kebano'ob pa'ate' yéetel u yotoch.

¹²Cu dzo'ocole' cu ch'a'ic jun p'éel u nu'ucul u tóoca'al poom chuup yéetel t'aba'an chúuc ch'a'an tu yóokol u multuunil kultaj yaan tu táan Yuumtzilo', bey xan ca'a lóoch' qui'iboc juch'bil poom, cu bisic túun tu paachil ti' le káasabo';

¹³cu cha'ic u báanal le poom tu yóokol le káak tu táan Yuumtzilo', le buudzo' cu balic le maac yaan tu yóokol u ba'asche'il le nup t'aano'. Beyo' ma' bíin quíimic Aaroni'.

¹⁴Bíin u ch'a'a xan jun p'íit u ki'ikel le chan wacaxo', yéetele' cu widzic le maac tu tzéel j lakin yéetel u yaal u kab. Cu dzo'ocole' cu widzic yéetel u yaal u kab le ki'ik siete u téenel tu táan le maaco'.

¹⁵Cu dzo'ocole' cu quíimsic le j yuuc tu yo'olal u keban le caajo', cu bisic u ki'ikel ti' le cúuchil yaan tu paach le káasabo'; te j ichilo' cu widzic tu yóokol yéetel tu táan le maac je'el bix tu beetajil yéetel u ki'ikel le chan wacaxo'.

¹⁶Beyo' cu míistic le quili'ich cúuchil yéetel, ti' tuláacal u kaasilo'ob, u loobilo'ob yéetel u kebano'ob le j israelitaobo'. Bey xan unaj u beetic yéetel u Noj Paselil Muuch'tal, yaan chúumuc ti'ob yéetel chúumuc ti' u kaasilo'obo'.

¹⁷Ca'aliquil ti' yaan Aarón ichil le quili'ich cúuchil u ti'al u kamic u sa'atsaj si'ipil kebano'obo', wa ma' jóokoque', mix máac unaj u yantal tu noj Paselil Much'tal. Le quéen dzo'ococ u kamic u sa'atsaj si'ipil u kebano'ob leti' yéetel u yotoch bey xan u ti'al tuláacal u caajil le j israelitaobo',

¹⁸bíin jóokoc u ti'al u bin u beet u yutzil antal le multuunil kultaj yaan tu táan Yuumtzilo'. Cu ch'a'ic jun p'íit u ki'ikel le chan wacax yéetel le j yuuco' cu cu'ultic tu baaco'ob yéetel tu bakpach le u multuunil kultajo',

¹⁹cu widzic yéetel u yaal u kab le ki'ik tu yóokol u multuunil kultaj siete u téenel. Beyo' cu beetic u yutzil antal ti' tuláacal u kasa'anil le j israelitaobo', cu jun páaycuntic.

²⁰Le quéen dzo'ococ u beeta'al u yutzil antal tumen Aarón le quili'ich cúuchil, u noj Paselil Much'tal yéetel le u multuunil kultajo', cu túuchi'itic ca taasa'ac le j yuuc cuxa'ano'

²¹cu dzáic u kabo'ob tu yóokol u pool le ba'alche'o', cu cáantic tuláacal u kasa'anilo'ob, u loobilo'ob yéetel u kebano'ob le j israelitaobo'. Beyo' cu láaj dzáic le kebano'ob tu yóokol le j yuuco'; cu jóokesa'al jun túul máac u ti'al ca u bis u jáalkabt te x tocoy lu'umo'.

²²Beyo' le quéen sa'atac le j yuuc ti' le x tocoy lu'umo', cu láaj bisic u kasa'anilo'ob ti' le lu'umo'ob tu'ux mix máac cajnáalo'.

²³Cu dzo'ocole', cu yocol Aarón tu noj Paselil le Muuch'talo', cu pitic le nook lino u ca'aj tu búuquintaj le ca j ooc ti' le quili'ich cúuchilo', cu p'atic ichil.

²⁴Láili' ichil le quili'ich cúuchilo' cu p'o'icubáa yéetel ja', cu jelcuba'e', cu jóokol u táanbes u ti'al leti' le ba'alche' cu láaj tóoquico', bey xan le unaj u kubic u ti'al tuláacal u caajil le j israelitaobo', tumen beyo' cu kamic u sa'atsaj si'ipil leti' bey xan u ti'al le caajo'.

²⁵U tzaatzel le quíimsbil ba'alche' tu yo'olal kebano', unaj u tóoquic yóokol u multuunil kultaj;

²⁶le máax xan j bis le j yuuc u ti'al u jáalkabt ti' Azazelo', bíin u p'o' u nook yéetel u p'o'icubáa yéetel ja', cu dzo'ocole' je'el u páajtal u yocol ichil le x péetcaajo'.

²⁷Le chan wacax yéetel le j yuuc quíinsa'abo'ob tu yo'olal keban, bisa'ab u ki'ikelo'ob ichil quili'ich cúuchil u ti'al u ka'amal u sa'atsaj si'ipil kebano'obo', bíin bisa'ac tu paach le x péetcaaj, u kéewelil, u bakel yéetel u jobnele', yaan u láaj tóoca'al.

²⁸Le máax tóoco', unaj u p'o'ic u nook yéetel u p'o'icubáa yéetel ja', cu dzo'ocole' je'el u páajtal u yocol ichil le x péetcaajo'.

²⁹Lela' jun p'éel a'almaj t'aan a ti'ale'ex tuláacal kiino'ob: tu diez kiin ti' u siete mese' unaj a jun páaycuntique'ex u ti'al a su'ukine'ex ma' bíin a beete'ex mix jun p'éel meyaji', je'el bix le j israelitaobo', bey le j táanxel lu'umilo'ob cajnáalo'ob ichile'exo',

³⁰tumen ti' le kiin je'elo' bíin a kame'ex u sa'atsaj si'ipil a kebane'ex tu táan Yuumtzil, cu p'áatal x ma' si'ipil ti' tuláacalo'ob.

³¹Lelo' jun p'éel a'almaj t'aan u ti'al tuláacal kiin: Le kiin je'elo', chéen u ti'al sábado yéetel u ti'al a su'ukine'ex.

³²Le aj kiin yéeya'an ti' máax dza'an tuláacal páajtalil u ti'al u meyaj tu cúuchil u taata bey aj kiine', bíin u beet u kiinkujil u ti'al u ka'amal u sa'atsaj si'ipil keban; yaan u búuquintic le nook lino u ca'aj jun páaycunta'ano'.

³³Cu beetic u yutzul yantal le sen quili'ich cúuchilo', u noj Paselil Muuch'tal yéetel u multuunil kultaje', cu kamic u sa'atsaj si'ipil le aj kiino'ob yéetel tuláacal le caajo'.

³⁴Lela' jun p'éel a'almaj t'aan u ti'al tuláacal kiino'ob a ti'ale'ex: Jun téen ti' u jujun p'éelil ja'ab, bíin u kiinbeso'ob u kiinkujil u ka'ama'al sa'atsaj si'ipil u kebano'ob le j israelitaobo'. J beeta'ab jach je'el bix tu ya'alajil Yuumtzil ti' Moiseso'.