Read Yucateco Levítico 17 Bible Online

Levítico 17 - Yucateco bible

Levítico 17

¹Yuumtzile' tu t'anaj Moisese' ca tu ya'alaj ti':

²A'al ti'ob Aarón yéetel ti' u paalalo'ob bey xan ti' tuláacal le j israelitaobo', dzo'oc u dzabal tumen Yuumtzil le tzol t'aano'ob je'ela'.

³Je'el máaxac j israelil ca u quíims jun túul chan wacax, jun túul chan j taman wa jun túul x yuuc, ichil wa tu paach x péetcaaje',

⁴ma' u taasic tu jool u noj Paselil Muuch'tal u táanbes u ti'al ti'ibil óolal ti' Yuumtzil tu táan quili'ich cúuchile', bíin sipa'anchajac tumen tu wecaj ki'ik, let o'olale' yaan u tzéelel ichil u caajal.

⁵Beyo' le j israelitaobo', bíin u kubo'ob ti' Yuumtzil le ba'alche'ob cu quíimsico'ob tu'ux jóompike'en, u ti'al u biso'ob ti' le aj kiin tu jool u noj Paselil Muuch'tal u ti'al ca u kub leti' tu yo'olal leti'ob quíimsbil u ti'al ca'a bisajbáil.

⁶Le aj kiino' bíin u widz le ki'ik tu yóokol u multuunil u kulta'al Yuumtzil tu jool u noj Paselil Muuch'tal, cu dzo'ocole' cu tóoquic le tzaatz u ti'al qui'iboc ba'al kambe'en ti' Yuumtzil.

⁷Beyo' mix bikin bíin u ca'a táanbeso'ob quíimsbil ba'alche'ob ti' le kaasil ba'alo'ob tu kulto'ob ca sen kaschajo'obo'. Lela' jun p'éel u a'almaj t'aanil tuláacal kiino'ob a ti'ale'ex bíin máanac ti' taataob tac ti' u paalal.

⁸A'al xan ti'ob je'el máax j israelil wa j táanxel lu'umil cajnáal ichile'exe' ca u táanbes je'el ba'ax láaj tóocbil wa je'el ba'alac quíimsbil ba'alche'e',

⁹wa ma' tu bisic tu jool u noj Paselil Muuch'tal u ti'al u táanbes ti' Yuumtzile', bíin tze'elec ichil u caajal.

¹⁰Tene' bíin xi'iquen tu yóokol tuláacal j israelil wa j táanxel lu'umil cajnáal ichile'ex ca u jaant ki'ik, je'el bixac ca u jaante'.

¹¹Tumen tuláacal ba'ax cuxa'ane', cuxa'an tumen yaan u ki'ikel, tene' dzo'oc in dzáic ti' te'ex tu yóokol u multuunil kultaj u ti'al a bo'otique'ex u lojil a cuxtale'ex, tumen leti' le ki'ik bo'otic u lojil le cuxtalo'.

¹²Le t o'olal quin wa'alic ti' j israelitaob: Mix jun túul ti' te'ex, mix le j táanxel lu'umilo'ob cajnáal ichile'ex unaj jaantic ki'ik.

¹³Je'el máax j israelil wa j táanxel lu'umil cajnáal ichile'ex ca u dzoon jun túul ba'alche' wa jun túul ch'íich' janalbe'ene', unaj u wequic u ki'ikel le ba'ax tu dzoonajo', ca u muc yéetel lu'um,

¹⁴tumen le ki'iko' u cuxtal tuláacal ba'ax cuxa'an. Let o'olal dzo'oc in wa'alic te'ex ma' a jaantique'ex ki'ik, tumen leti' u cuxtal tuláacal ba'ax cuxa'an, je'el máax ca u jaante', bíin tze'elec.

¹⁵Je'el máax j israelil wa j táanxel lu'umil ca u jaant wa ba'ax quimen ba'alche' xe'exet'a'an tumen jun túul dzíidzic ba'alche'e', unaj u p'o'ic u nook yéetel u p'o'icubáa yéetel ja', cu ya'alal ma' utz yanil tac u yoocbal kiini'. Cu dzo'ocole' cu p'áatal utza'an yanil.

¹⁶Ba'ale' wa ma' tu p'o'ic u nook mix xan tu p'o'icuba'e', bíin u cuch u kasa'anil.