Read Yucateco Levítico 18 Bible Online

Levítico 18 - Yucateco bible

Levítico 18

¹Yuumtzile' tu t'anaj Moisese' ca tu ya'alaj ti':

²A'al ti' le j israelitaobo': Tene' Yuumtzilen a Kuex.

³Ma' a cuxtale'ex je'el bix u yúuchul cuxtal Egipto le tu'ux cajnáale'ex ca'acho'. Ma' a cuxtale'ex je'el bix u yúuchul cuxtal Canaán le lu'um tu'ux bíin in bise'exo', mix a dzo'ocbesique'ex u ya'almaj t'aano'ob.

⁴Dzo'ocbese'ex in túuchi' t'aano'ob, cuxlene'ex ichil in wa'almaj t'aano'ob; cuxlene'ex je'el bix u ca'ansico'obe'. Tene' Yuumtzilen a Kuex.

⁵Dzo'ocbese'ex in wa'almaj t'aano'ob bey xan in túuchi' t'aano'ob. Le j xiib bíin dzo'ocbesique', bíin cuxlac. Tene' Yuumtzilen.

⁶Mix jun túul j xiib unaj u nadzicubáa ti' jun túul co'olel wa u láaktzil, u ti'al u nupicubáa x yéetel. Tene' Yuumtzilen.

⁷Ma' a pajic u subtal a taata iquil a nupicabáa yéetel a maama; yéetel u láak ba'ale' a maama, ma' unaj a beetic ba'al beyo'.

⁸Ma' a pajic u subtal a taata iquil a nupicabáa yéetel u yatan.

⁹Ma' a nupicabáa yéetel a quiic wa a wíidzin. Je'el bix wa u x ch'upul paal a taatae', bey wa u x ch'upul paal a maama; je'el bix wa sijnal ta wotoch, wa quex sijnal táanxel tu'ux, ma' unaj a nupicabáa x yéeteli'.

¹⁰Ma' a pajic a subtal iquil a nupicabáa yéetel a x ch'upul áabil, quex u x ch'upul paal a j xibil paal, quex x ch'upul paal a x ch'upul paal. Ma' unaj a nupicabáa x yéeteli.

¹¹Ma' a nupicabáa yéetel u x ch'upul paal u yatan a taata. Leti'e' u x ch'upul paal a taata, jach a quiic wa jach a wíidzin. Ma' unaj a nupicabáa x yéeteli'.

¹²Ma' a nupicabáa yéetel u quiic wa u yíidzin a taata; letie' u yéet ki'ikel a taata.

¹³Ma' a nupicabáa yéetel u quiic wa u yíidzin a maama; letie' u yéet ki'ikel a maama.

¹⁴Ma' a pajic u subtal a dzeyum iquil a nupicabáa yéetel u yatan, tumen u yatan a dzeyum.

¹⁵Ma' a nupicabáa yéetel a wilib, tumen u yatan a paal; ma' unaj a nupicabáa x yéeteli'.

¹⁶Ma' a pajic u subtal a sucu'un tu yo'olal a nupicabáa yéetel u yatan.

¹⁷Wa ca nupicabáa yéetel jun túul co'olele' ma' nupicabáa yéetel u x ch'uupul paal le co'olelo', mix u yáabil x ch'úupalo', ux ch'upul paal u j xiibil pal wa u x ch'upul paal u ti'al a nupicabáa x yéetel. Lelo' jun p'éel talam kaakas cuxtal tumen leti'obe' jun p'éelili' u ki'ikelo'ob.

¹⁸Ma' u dzo'ocol a beel yéetel u quiic wa u yíidzin a watan, mix a nupicabáa x yéetel ca'aliquil cuxa'an a watan, tu yo'olal ma' a beetic u p'ecticuba'ob.

¹⁹Ma' a nupicabáa yéetel jun túul co'olel tu kiinilo'ob u yilic u nook.

²⁰Ma' a chital yéetel u yatan a láaktzil mix a nupicabáa x yéetel, tu yo'olal ma' a kascunticabáa tu yo'olal lelo'.

²¹Ma' a kubic mix jun túul a paalal u ti'al ti'ibil óolal ti' ku Moloc. Ma' a poch'ic u kaaba' Ku beyo'. Tene' Yuumtzilen.

²²Ma' a chital yéetel jun túul j xiib je'el bix wa táan a chital yéetel jun túul co'olele'. Lelo' ba'al talam kaas.

²³Ma' a nupicabáa yéetel mix jun túul ba'alche', tu yo'olal ma' a kascuntic a wanil beyo'. Mix le co'olel unaj u kubicubáa ti' jun túul ba'alche'. Lelo' jun p'éel ba'al talam kaas.

²⁴Ma' a kascunticaba'ex ti' mix jun p'éel le ba'alo'oba'. Yéetel leti'obe' tu kascuntuba'ob le caajo'ob bíin in ca'aj in tzéel ta táane'exo',

²⁵j p'áat xan kaas yanil u lu'umo'ob; ba'ale' tene' tin káat chi'itaj ti'ob tuláacal u kasa'anilo'obe' ca j áalcabansa'abo'ob tumen u lu'umo'ob.

²⁶Ba'ale' te'ex j israelita'ex, yéetel le j táanxel j lu'umilo'ob cajnáal ichile'exo', dzo'ocbese'ex in wa'almaj t'aano'ob yéetel in túuchi' t'aano'ob, ma' a beetique'ex mix jun p'éel ti' le ba'alo'ob talam subtzilo'oba'

²⁷tumen tuláacal le ba'alo'ob talam subtzila', j beeta'ab tumen le máaxo'ob yáax cajlajo'ob táanil ti' te'ex te j lu'umo', ca tu kascuntajo'ob le lu'umo'.

²⁸¡Bic áalcabansa'aque'ex tumen le lu'um tu yo'olal a kascuntique'ex, je'el bix úuchic u yáalcabansa'al le máaxo'ob j cajlajo'ob táanil ti' te'exo'!

²⁹Le máax bíin u beet je'el ba'alac ti' le ba'alo'ob talam subtzilo'oba', bíin tze'elec ichil u caajal.

³⁰Let o'olale' dzo'ocbese'ex in túuchi' t'aano'ob, ma' a beetique'ex le ba'alo'ob talam subtzilo'ob j beeta'abo'ob táanil ti' te'exo', mix a kascunticaba'ex yéetelo'ob. Tene' Yuumtzilen a Ku.