Read Yucateco Levítico 19 Bible Online

Levítico 19 - Yucateco bible

Levítico 19

¹Yuumtzile' tu t'anaj Moisese' ca tu ya'alaj ti':

²A'al ti' u cajnáalilo'ob Israel: Quili'ichcuntaba'ex, tumen teen Yuumtzil a Junab Kuexe', quili'ichen.

³Tu jujun túulile', u tzic u taata u tzic xan u maama'. Tzique'ex xan in sábado'ob. Tene' Yuumtzilen a Junab Kuex.

⁴Ma' a káat óolale'ex ti' beetbil kuob, mix a patique'ex kuob yéetel joybil máascab.

⁵Le quéen a táanbese'ex ti' Yuumtzil quíimsbil ba'alche'ob u ti'al ca'a bisajbáile', beete'ex tu beel u ti'al ca ka'amac tumen Ku.

⁶Le ba'alche' cu táanbesa'alo', unaj u jaanta'al láili' ti' le kiino', bey xan cu páajtal u jaanta'al tu láak kiin, ba'ale' le bíin p'áatac tu yóox kiine' unaj u tóoca'al.

⁷Wa cu jaanta'al le ti'ibil óolal tu yóox kiino', cu ya'ala'al p'ecbe'en, ma' kambe'en tu táan Kui';

⁸le máax bíin jaantique' yaan u cuchic u kasa'anil, cu dzo'ocole' yaan u tze'elel ichil u caajal tu yo'olal tu manba'alcuntaj ba'ax jun páaycuna'an ti' Yuumtzil.

⁹Le quéen kuchuc u kiinil jooche', ma' a láaj molic u joochil a cool, mix a meendzultic le cu p'áatalo'.

¹⁰Ma' a láaj meendzultic u yich a paakal uva, mix a molic u yicho'ob luba'ano'obo'; p'at ti' óotzilo'ob yéetel ti' j táanxel lu'umilo'ob. Tene' Yuumtzilen a Kuex.

¹¹Ma' a woocole'ex, ma' a tuse'ex mix a paaclan tuscaba'ex.

¹²Ma' a séeb chi'itique'ex tuus tin kaaba', tumen ca manba'alcuntique'ex u kaaba' a Junab Kuex. Tene' Yuumtzilen.

¹³Ma' a jáampay óoltic a láak mix a toquic ba'al u ti'al. Ma' unaj u p'áatal ta kab u bo'olal le aj meyaj tac tu láak kiini'.

¹⁴Ma' a loolob t'antic máax cóoc. Ma' a dzáic mix jun p'éel t'óochpajal tu beel ch'óop. E'es a tzicbe'enil ti' Junab Ku. Tene' Yuumtzilen.

¹⁵Ma' a beetic ba'ax keechel le quéen a wa'al ca úuchuc jun p'éel xotkine': Ma' a ch'a'ic óotzil ti' le j ma' óolo', mix xan a chintal tu táan le aj páajtalo'. Dzáaba tu tzéel ti' ba'ax no'oja'an le quéen a wa'al ca úuchuc xotkine'.

¹⁶Ma' a mucul t'aan jooltaquil naj ichil a caajal. Ma' a wáantaj u ti'al u quíimsa'al a láak. Tene' Yuumtzilen.

¹⁷Ma' a t'ilcuntic ta pucsi'ikal p'ectajil tu yóokol a sucu'un wa tu yóokol a wíidzin. Key a láak wa kabéet a keyic. Ma' a éejemtic u keban.

¹⁸Ma' a sutic kaas mix a ch'a'a kuxtic a caajal. Yaabilt a láak, tumen jach beyecho'. Tene' Yuumtzilen.

¹⁹Dzo'ocbese'ex in wa'almaj t'aano'ob. Ma' a nupic a wacax yéetel ba'alche'ob jela'an u ch'i'ibalo'ob. Ma' a xa'aktic u jejeláasil i'inajo'ob u ti'al a pakic a cool. Ma' a búuquintic mix jun p'éel búuc beeta'an yéetel u jejeláas nu'ucul u beeta'al nooko'ob.

²⁰Le máax cu chital yéetel jun túul x palitzil dza'an u t'aanil u dzo'ocsa'al u beel yéetel u láak j xiib, ca'aliquil ma' ma'anac mix jáalkabta'aque', yaan u bo'otic u x mu'ujulil; ba'ale' ma' bíin xot kinta'ac u ti'al j quíimili', tumen le co'olelo', x palitzil.

²¹Le j xiibo' bíin u bis u táanbes jun túul j taman u ti'al quíimsbil tu yo'olal u si'ipil, tu jool u noj Paselil Muuch'tal.

²²Yéetel le j taman cu quíimsa'al tu yo'olal le si'ipilo', le aj kiino' cu káatic ti' Yuumtzil ca sa'atsaj u si'ipil le máaco', cu sa'atsa'al le keban u beetmajo'.

²³Le kiin bíin ojque'ex ti' le lu'um quéen a pake'ex che'ob u ti'al ichanquilo', ma' unaj a t'oquique'ex mix a jaantique'ex u yicho'ob buul óox ja'abi'.

²⁴Tu can ja'abe' tuláacal u yicho'ob bíin jun páaycunta'ac u ti'al Yuumtzil ti' jun p'éel kiinkuj,

²⁵tu cinco ja'abe' je'el u páajtal a jaantique'ex u yiche'. Beyo' le che'ob bíin u dzáate'ex asab ya'ab u yich. Tene' Yuumtzilen a Kuex.

²⁶Ma' jaantique'ex mix ba'al yaan u ki'ikel. Ma' a beeticaba'ex j meenil, mix u táabal a wa'ale'ex ba'ax cu taal u kiinil.

²⁷Ma' a wóolis kosique'ex u tzo'otzel a poole'ex, mix a kupique'ex u me'exil a no'oche'ex.

²⁸Ma' a loobiltic a wíinclile'ex tu yo'olal máax j quíimi. Ma' a júup'bonic mix ba'al ta wíinclil. Tene' Yuumtzilen.

²⁹Ma' a pajic u subtal a x ch'upul paal tu yo'olal a sutic jun x cáacbach. Ma' a kascuntic a lu'umil tu yo'olal a chupic yéetel talam kasa'anilo'ob.

³⁰Tzique'ex le sábado in ti'alo'. Tzicbe'ente'ex in quili'ich naj. Tene' Yuumtzilen.

³¹Ma' a caxtique'ex u yáantaj pixano'ob mix j meeno'ob. Ma' u p'áatal kaas yanile'ex tu yo'olal lelo'. Tene' Yuumtzilen.

³²Wa'alen u ti'al a tziquic jun túul nuxib. E'es tziiquil ti' a Ku. Tene' Yuumtzilen.

³³Ma' a beetique'ex u mukyaj le j táanxel lu'umil cajnáal ichile'exo'.

³⁴Bisaba'ex yéetel bey láaktzile'; yaabilte'ex tumen leti'e' bey je'el bixe'ex te'exe'. U láak ba'ale' te'exe' ta beetaba'ex a j táanxel lu'umil Egipto. Tene' Yuumtzilen a Kuex.

³⁵Ti' p'iso'ob tojtac yéetel aaltaque' beete'ex ba'al tu beel ma' táabsique'ex mix máac.

³⁶Unaj a meyajtique'ex tuláacal u jejeláas p'iso'ob jach je'el bix unaje'. Tene' Yuumtzilen a Kuex máax jóokese'ex Egipto.

³⁷Bey túuno' dzo'ocbese'ex in a'almaj t'aano'ob dzo'ocbese'ex xan in túuchi' t'aano'ob. Tene' Yuumtzilen.