Read Yucateco Levítico 2 Bible Online

Levítico 2 - Yucateco bible

Levítico 2

¹Le máax taasic u ti'ibil óolalil jejeláas janalbe'en neeko'ob ti' Yuumtzile', unaj u taasic u jach ma'alobil u sacanil, yaan u yalic yóokole', aceite yéetel poom;

²cu dzo'ocole' cu bisic ti' le aj kiino'ob u paalal Aarono', jun túul ichilo'obe' cu ch'a'ic jun láap' le sacan pa'ate' le aceite yéetel le poomo', cu tóoquic tu multuunil kultaj bey jun p'éel u tóocbil ti'ibil óolalil utz qui'iboquil ti' Yuumtzile'.

³U yalab le ti'ibil óolal cu p'áatalo', jun jaatzil jach quili'ich ichil le ti'ibil óolalo'ob cu tóoca'al ti' u tzicbe'enil Yuumtzil; lela' u ti'al Aarón yéetel u ch'i'ibalo'ob.

⁴Le quéen a taas ti'ibil óolal, janalbe'en neeko'obe' u naj póoca'an ti' chujcab, kub u péenchuquil ya'ach'ta'an yéetel aceite, ba'ale' x ma' levadurail, wa oop'o'obe' taas x ma' levadurail wi'iwidzáan yéetel aceite.

⁵Wa le ti'ibil óolal ca táanbesic, janalbe'en neeko'ob póoca'an ti' xamache' unaj u ma'alobil sacan, ya'ach'ta'an yéetel aceite x ma' j levadurail;

⁶ca xotláantic, cu dzo'ocole' ca widzláantic yéetel aceite, tumen u ti'ibil óolalil janalbe'en neeko'ob.

⁷Wa janalbe'en neeko'ob a ti'ibil óolal tzaja'an ti' cuume', unaj beeta'an yéetel u ma'alobil sacan yéetel ma'alob aceite xan.

⁸Quéen dzo'ococ a beetic le ti'ibil óolal yéetel tuláacal le ba'ax cu bisico', unaj a bisic tu táan Yuumtzil u ti'al a kub ti' le aj kiino', le ti' túune' cu bisic tu multuunil kultaj.

⁹Te'elo' le aj kiino' cu ch'a'ic jun p'íit le ti'ibil óolal u ti'al u tóoc tu yóokol le u multuunil kultajo' bey u tóocbil ti'ibil óolalil ka'ajsajil, utz qui'iboquil tu táan le Yuumtzilo'.

¹⁰U yalab le ti'ibil óolal cu p'áatale' jun jaatzil jach quili'ich ichil le ti'ibil óolalo'ob cu tóoca'al tu tzicbe'enil le Yuumtzilo', lelo' u ti'al Aarón yéetel u ch'i'ibalo'ob.

¹¹Ma' dzáique'ex levadura ti' mix jun p'éel u ti'ibil óolalil janalbe'en neeko'ob ca kubique'ex ti' Yuumtzil. Mix xan u tóoca'al levadura mix caab, bey jun p'éel ti'ibil óolal ti' Yuumtzil.

¹²Je'el u táanbesa'al levadura yéetel caab ti' Yuumtzil bey ti'ibil óolal ti' u yáax ich paakalo'obe' ba'ale' ma' u ti'al a táanbes ti' Yuumtzil tu multuunil kultaj bey jun p'éel utz qui'iboque'.

¹³Kabéet a dzáic ta'ab ti' tuláacal a ti'ibil óolal janalbe'en neeko'ob u ca'aje' u najmal a dzáic ta'ab ti', ma' u ku'ubul u ti'ibil óolalilo'ob janalbe'en neeko'ob x ma' ta'abil, tumen u ta'abil u nup t'aan Ku. Ti' tuláacal a ti'ibil óolalo'ob yaan a dzáic ta'ab.

¹⁴Wa ca taasic tu táan Yuumtzil jun p'éel ti'ibil óolal u yich a yáax paakalo'obe unaj a taasic tiquin i'ijo'ob póoca'an ti' káak, wa kutbil túumben neeko'ob ti' a yáax jooch.

¹⁵Tu yóokol le ti'ibil óolalo' yaan a yalic aceite yéetel poom, tumen jun p'éel u ti'ibil óolalil janalbe'en neeko'ob.

¹⁶Cu dzo'ocole' le aj kiino' cu tóoquic jun p'íit le neek kuta'ano', yéetel aceite xa'aka'an yéetel poom, lela' jun p'éel u ti'ibil óolalil ka'ajsaj tóoca'an tu táan Yuumtzil.