Read Yucateco Levítico 20 Bible Online

Levítico 20 - Yucateco bible

Levítico 20

¹Yuumtzile' tu t'anaj Moisese' ca tu ya'alaj ti':

²A'al ti' le j israelitaobo': Je'el máax ichilo'ob, wa je'el máaxac j táanxel lu'umil cajnáal Israel ca kuchuc u kub jun túul ti' u paalal ti' ku Moloque', unaj u quíimsa'al yéetel ch'iin tumen u cajnáalilo'ob le lu'umo'.

³Le máaco' yaj cun u yilicubáa tin wéetel, teen bíin in tzéel ichil u caajal, tumen tu kascuntaj in quili'ich naj, manba'alcunsaj xan in quili'ich kaaba' úuchic u kubic jun túul u paal ti' Moloc.

⁴Wa u cajnáalilo'ob le lu'um ma' tu táan óoltico'ob le ba'ala', ma' tu xot' kintico'ob le máaco',

⁵yaj cun u yilicubáa tin wéetel, leti' yéetel u yotoch, teen bíin in tzéel ichil u caajal pa'ate' yéetel le máaxo'ob tu quetajo'ob u kascunticuba'ob tu yo'olal káat óolnajico'ob ti' Moloc.

⁶Wa yaan xan máax cu bíin j t'aan yéetel pixano'ob wa tu yicnal j meeno'ob, cu kascunticubáa tu yo'olal cu tzaypachtico'obe', yaj cun u yilicubáa tin wéetel, teen bíin in tzel ichil u caajal.

⁷Jach jun páaycuntaba'ex in ti'al, quili'ichchajque'ex, tumen tene' Yuumtzilen a Junab Kuex.

⁸Beete'ex ba'ax cu ya'alic in a'almaj t'aano'ob; dzo'ocbese'exo'ob. Tene' Yuumtzilen quin jun páaycuntique'ex in ti'al.

⁹Je'el máax ca u loolob t'ant u taata wa u maamae', bíin xot kinta'ac u ti'al j quíimil. Tu yo'olal tu loolob t'antaj u Taata wa u maamae', leti' bíin u cuch u si'ipilil u quíimil.

¹⁰Wa yaan máax cu núup kebanchajal yéetel u yatan u yéet j xiibile', bíin xot kinta'ac u ti'al quíimil, je'el bix le j nup kebano', bey le x nup kebano'.

¹¹Wa yaan máax cu chital yéetel u yatan u taatae', cu pajic u subtal u taata. Le t o'olale' bíin xot kinta'ac u ti'al j quíimil le j xiib tac le x co'olelo', cu cuchico'ob u si'ipilil u quíimilo'ob.

¹²Wa yaan máax cu chital yéetel u yilibe', tu ca'a túulal bíin xot kinta'aco'ob u ti'al j quíimil, cu cuchico'ob xan u si'ipilil u quíimilo'ob tumen tu beetajo'ob ba'ax sen kaas u yu'uba'al.

¹³Wa yaan máax cu chital yéetel jun túul j xiib je'el bix wa táan u chital yéetel jun túul co'olele', yaan u xot kinta'al u ti'al j quíimil tu ca'a túulilo'ob, cu cuchico'ob xan u si'ipilil u quíimilo'ob iquil tu beetajilo'ob ba'ax sen kaas u yu'uba'al.

¹⁴Wa yaan jun túul máac cu yatantic jun túul co'olel bey xan cu yatantic u maamae' le co'olelo', cu beetic jun p'éel ba'al talam kaas, leti', je'el bix letiobe' unaj u tóoca'alo'ob cuxa'ano'ob. Beyo' je'el u we'et'el u yantal ba'alo'ob talam kaas ichile'exe'.

¹⁵Wa yaan máax cu dzáic tu yóol u nupcubáa yéetel jun túul ba'alche'e', yaan u xot kinta'al u ti'al j quíimil. Unaj xan u quíimsa'al le ba'alche'o'.

¹⁶Wa jun túul co'olel cu dzáic tu yóol u nupubáa yéetel jun túul ba'alche', le co'olel yéetel le ba'alche'o' yaan u quíimsa'alo'ob. Leti'ob bíin u cucho'ob u si'ipilil u quíimilo'ob.

¹⁷Wa yaan máax cu yatantic u quiic wa u x yíidzin, u x ch'upul paal u taata wa u x ch'upul paal u maamae' bey xan cu nupicubáa x yéetele', tu ca'a túulal bíin tze'elco'ob tu táan yich u yéet caajalo'ob, tumen sen subtzil u nupicubáa yéetel u quiic wa u x yíidzin, cu dzo'ocole' le máax beetic beyo' bíin u cuch u si'ipil.

¹⁸Wa yaan máax cu chital yéetel jun túul co'olel tu kiinil u yilic u nook bey xan cu nupicubáa x yéetele', cu chíicbesic tu'ux cu yilic u nook le co'olelo', beyo' le co'olel cu ye'esic xan tu'ux; le t o'olale' tu ca'a túulal bíin tze'eleco'ob ichil u caajal.

¹⁹Ma' a nupicabáa yéetel u quiic wa u x yíidzin a maama mix a taata, tumen le máax cu nupicubáa yéetel u yéet ki'ikele' tu ca'a túulal bíin u cucho'ob u si'ipil u kasa'anil.

²⁰Wa yaan máax cu chital yéetel u yatan u dzeyume', cu pajic u subtal u dzeyum; tu ca'a túulal bíin u cucho'ob u si'ipil u keban: bíin quíimco'ob x ma' paalal.

²¹Wa yaan máax cu toquic u yatan u sucu'une', cu pajic u subtal u sucu'un. Lelo' jun p'éel ba'al sen p'ecbe'en, tu ca'a túulal bíin p'áatac x ma' paalal.

²²Cuxlene'ex ichil in wa'almaj t'aano'ob yéetel in túuchi' t'aano'ob; láaj dzo'ocbese'exo'ob. Beyo' ma' bíin áalcabansa'aque'ex tumen le lu'um tu'ux quin bisique'ex cajtalo'.

²³Ma' a beetique'ex ba'ax cu beetic le máaco'ob bíin in tzel ta táanexo'; leti'obe' tu beetajo'ob tuláacal le ba'alo'ob je'ela', ca j sen lúubo'ob teen kaasil.

²⁴Tene' quin séeb chi'itic te'ex, te'exe' bíin a ti'alinte'ex u lu'umo'ob; teen tin kabil bíin in kub ti' te'ex le lu'um tu'ux cu yáalcab leche yéetel caab bey ja'e'. Tene' Yuumtzilen a Junab Kuex, máax tu beetaj a jela'antale'ex ti' u chuca'an caajo'ob.

²⁵Le t o'olale' te'exe' unaj a kaj óoltique'ex ba'ax ba'alche'ilo'ob yéetel ba'ax ch'íich'ilo'ob janalbe'eno'ob yéetel ba'ax ma' janalbe'eno'obi'. Ma' a p'ecbe'encunscaba'ex yéetel ba'alche'ob, ch'íicho'ob bey xan ba'alche'ob cu jíiltcuba'ob dzo'oc in wa'alic te'ex ma' janalbe'eno'obi'.

²⁶Te'exe' unaj a quili'ichtale'ex in ti'al, tumen teen Yuumtzile', quili'ichen, bey xan quin jela'ancuntique'ex ti' u láak caajo'ob tu yo'olal in ti'alintique'ex.

²⁷Le j xiib wa co'olel cu yocol pixan ti'ob wa cu beetic u j meenil wa u x meenile', yaan u quíimsa'alo'ob yéetel ch'iin, cu dzo'ocole' yaan xan u cuchico'ob u si'ipilil u quíimilo'ob.