Read Yucateco Levítico 21 Bible Online

Levítico 21 - Yucateco bible

Levítico 21

¹Yuumtzile' tu ya'alaj ti' Moisés: Tzicbalnen yéetel le aj kiino'ob u ch'i'ibalo'ob Aarone', a'al ti'ob ma' u kascuntico'ob u yanilo'ob yéetel u wíinclil ti' wa máax u láaktzilo'ob cu quíimil,

²chéen ja'ali' wa jun túul láaktzil jach nadza'an ti' u taata, wa ti' u maama', u j xibil paal wa u ch'upul paal, u sucu'un wa u yíidzin

³wa quex u quiic wa u x yíidzin cajnáal tu yicnal tumen ma' dzoca'an u beli'; je'el u páajtal u p'áatal ma' utz yanil tu yo'olalo'obe'.

⁴Ba'ale' ma' unaj u kastal yanil mix u kascunticubáa yéetel jun túul láaktzil dzoca'an u beel.

⁵Ma' unaj u dziquic u pool, mix u no'och, mix u loobiltic u wíinclil,

⁶ba'ale' yaan u jun páaycunticubáa u ti'al Ku tu jaajil, u ti'al ma' u manba'alcuntic u kaaba', tumen leti'ob táanbesic le ti'ibil óolal cu tóoca'alo'ob yéetel le waaj u ti'al u Ku; le t o'olal unaj u p'áatal mantadz jun páaycuna'ano'ob.

⁷Ma' unaj xan u dzo'ocol u beelo'ob yéetel jun túul x kaakas co'olel, mix yéetel co'olel beeta'an u yóolaj wa quex p'ata'an tumen yíicham, tumen jun páaycuna'ano'ob u ti'al Ku.

⁸Náachcunto'ob ti' tuláacal le ba'alo'ob kaaso', tumen leti'ob táanbesic u waaj a Ku. Leti'obe' bíin quili'ichchajco'ob a ti'al, tumen teen Yuumtzile', quili'ichen, le t o'olal quin quili'ichcuntico'ob.

⁹Wa u x ch'upul paal jun túul aj kiin cu yéensicubáa x kaakas x co'olelile', cu pajic u subtal u taata, kabéet u tóoca'al cuxa'an.

¹⁰U nojoch le aj kiino'obo' dzo'oc u kamic tuláacal páajtalil u ti'al u búuquintic le quili'ich búuco', le ca j ya'al u aceiteil jun páaycunaj tu poole', le t o'olal ma' unaj u chóoj wach'tic u pooli', mix u jatic u nook u ti'al u chíiculal u okom óolal;

¹¹Mix unaj u yocol tu'ux yaan jun túul quimeni': Mix tu yo'olal u taata wa tu yo'olal u maama unaj u kastal yanil.

¹²Ma' unaj u jóokol tu quili'ich naj u Kui', mix unaj u manba'alcuntic le quili'ich najo', tumen tu yóokol leti' ya'al u aceiteil jun páaycunaj u ti'al Ku. Tene' Yuumtzilen.

¹³U ti'al u caxtic u yatane', unaj u dzo'ocol u beel yéetel jun túul x ch'úupal x sujuy.

¹⁴Mix ba'al o'olal unaj u dzo'ocol u beel yéetel jun túul x quimen íicham, x p'at íicham, beeta'an u yóolaj wa x kaakas co'olel; yatane' unaj jun túul x ch'úupal x sujuy sijnal tu ch'i'iba'al,

¹⁵tu yo'olal ma' u chichancuntic u tziiquil u paalal ichil u ch'i'ibal u caajal; tumen teen Yuumtzil máax jun páaycunto'ob.

¹⁶Yuumtzile' tu t'anaj Moisese' ca tu ya'alaj ti':

¹⁷A'al ti' Aarón: Bejela'e' yéetel le kiino'ob bíin taalaque', mix jun túul ti' u paalal yaan wa ba'ax nuumil ti' u wíinclil bíin cha'abac u táanbesic u ti'ibil óolal waaj ti' u Ku.

¹⁸Tu jaajile', mix jun túul máax yaan nuumil ti' u wíinclil je'el u páajtal u náadzal tu táan Yuumtzil u ti'al táanbesaj: je'el bix wa ch'óop, móoch, wa quex yaan u nuumil u ni' wa u xiquin,

¹⁹wa caachal u yooco'ob wa u kabo'ob,

²⁰wa quex aj p'uus wíinic wa j áac wíinic, wa yaan u múuyalil u yich, wa yaan u we'echil wa pawo' tu wíinclil, bey xan wa ucha'an loob ti' ye'el u j xiibil.

²¹Mix jun túul u ch'i'ibal Aarón yaan u nuumil bíin u táanbes ti' Yuumtzil ti'ibil óolalo'ob u ti'al tóocbil; leti'e' yaan u nuumil, le t o'olal ma' tu páajtal u táanbesic u ti'ibil óolal u waaj u Ku.

²²Je'el u páajtal u jaantic le waajo', bey xan le quili'ich ba'alo'ob yéetel le sen quili'icho'obo',

²³ba'ale' ma' tu páajtal u ch'actic tu'ux yaan le káasab mix u náadzal ti' u multuunil kultaj tu yo'olal ma' u yéensic yéetel u nuumil u quili'ichil in quili'ich naj. Tene' Yuumtzilen máax jun páaycunto'ob.

²⁴Moisese' tu ca'a a'alaj ti' Aarón, yéetel u paalal bey xan ti' tuláacal le j israelitaobo'.