Read Yucateco Levítico 22 Bible Online

Levítico 22 - Yucateco bible

Levítico 22

¹Yuumtzile' tu t'anaj Moisese' ca tu ya'alaj ti':

²A'al ti' Aarón yéetel u paalal ca u meyajto'ob yéetel tziiquil le quili'ich ba'alo'ob cu jun páaycunta'al tumen le j israelitaobo', tu yo'olal ma' u manba'alcuntico'ob in quili'ich kaaba'. Tene' Yuumtzilen.

³A'al ti'ob líikbal bejela'e' tac ti' le kiino'ob cu taalo'obo', je'el máax ti' u ch'i'ibal kaas yanil ca u beet u táanbesajil le quili'ich ba'alo'ob cu jun páaycunta'al tumen le j israelitaob ti' Yuumtzilo', yaan u tze'elel tin táan. Tene' Yuumtzilen.

⁴Mix jun túul ti' u ch'i'ibal Aarón yaan u koja'anil jáaway ti' wa cu wixic síime', bíin u jaant quili'ich ba'alo'ob wa ma' dzo'ococ u dza'acali'. Le máax cu cóojol ti' jun p'éel wa ba'ax kascuna'an tumen jun túul máac quimen wa quex cu cóojol ti' jun túul máac koja'an ti' u wixic sim,

⁵wa quex cu kastal iquil u cóojol ti' jun túul ba'alche' cu jíilticubáa wa jun túul máac kaas yanile', cu kastal le máax cu cóojolo',

⁶yaan u ya'alal ma' utz yanil tac u yocbal kiini', ma' bíin páatac u jaantic quili'ich ba'alo'ob wa ma' u p'o'ubáa yéetel ja'i'.

⁷Cu p'áatal utz yanil tu yocbal kiin, cu dzo'ocole' je'el u páajtal u jaantic le quili'ich ba'alo'obo', tumen leti' u janal.

⁸Ma' unaj u jaantic u bakel jun túul ba'alche' cu chéen quíimil wa cu xéexet'al tumen jun túul dzíidzic ba'alche', tu yo'olal ma' u kastal yanil. Tene' Yuumtzilen.

⁹A'al ti'ob ca u dzo'ocbeso'ob in wa'almaj t'aano'ob tu yo'olal ma' u kebantalo'ob ti', beyo' ma' bíin quíimico'obi'. Tene' Yuumtzilen dzo'oc in jun páaycuntico'ob.

¹⁰Mix jun túul máac bíin páatac u jaantic le janal wa ma' aj kiino'. Mix u yula' le aj kiino', mix u aj meyaj bíin páatac u jaantic le quili'ich janalo'.

¹¹Wa le aj kiin cu manic jun túul palitzil yéetel u taakine', le palitzilo', je'el u páajtal u jaantic le quili'ich janalo'. Le máax cu síijil tu yotoch le aj kiino', je'el xan u páajtal u jaantique'.

¹²Wa u x ch'upul paal le aj kiin dzoca'an u beel yéetel máax ma' u ch'i'ibal aj kiine', ma' bíin páatac u jaantic u janlil le ti'ibil óolo'ob cu dzabal ti' le aj kiino'obo'.

¹³Ba'ale' wa quimen u yíicham wa quex p'ata'an, yéetel mina'an u paalal wa cu suut tu yotoch u taata je'el bix ma' dzo'ococ ca'ach u beele', je'el u páajtal u jaantic u janal u taatae'. Mix jun túul u láak máac ma' u ch'i'ibal aj kiin je'el u páajtal u jaantique'.

¹⁴Wa yaan máax cu kuchul u jaant le quili'ich ba'alo'ob quex ma' tu yóol ca'achi', yaan u sutic u je'el ti' le aj kiin le ba'ax tu jaantajo', yéetel u tiip'il jun jatz ti' cinco jaatzul;

¹⁵ba'ale' le aj kiino'obo', ma' unaj u cha'ic ti' le j israelitaob u manba'alcuntico'ob le quili'ich ba'alo'ob cu táanbesa'al ti' Yuumtzilo',

¹⁶mix u cuchico'ob u kaasil u kebanil u jaantico'ob le quili'ich janalo'ob. Tene' Yuumtzilen máax jun páaycunto'ob.

¹⁷Yuumtzile' tu t'anaj Moisese' ca tu ya'alaj ti':

¹⁸T'aanen yéetel Aarón, u paalal bey xan yéetel tuláacal le j israelitaobo' ca a wa'al ti'ob: Wa jun túul ti' le j israelitaob wa jun túul j táanxel lu'umil cajnáal ichile'ex cu táanbesic ti' Yuumtzil jun túul ba'alche' láaj tóocbil tu yo'olal u beetmaj jun p'éel séeb chi' wa u ti'al juunal óolal ti'ibil óole',

¹⁹unaj u táanbesic jun túul j xiibil ba'alche' láaj utz u wíinclil tu yo'olal u ka'amal. Je'el u páajtal u táanbesic jun túul wacax, jun túul chan j taman wa jun túul j yuuc,

²⁰ba'ale' ma' jun túul ba'alche' nuum u wíinclili', tumen ma' bíin ka'amqui'.

²¹Je'el máax bíin u táanbes ti' Yuumtzil jun túul ba'alche' u ti'al ca'a bisajbáil wa tu yo'olal u beetmaj jun p'éel séeb chi' wa quex jun p'éel juunal óolal ti'ibil óole', unaj u táanbesic wacaxo'ob, wa j tamano'ob láaj utz u wíinclilo'ob u ti'al ca ka'amac.

²²Ma' a táanbesic ti' Yuumtzil ba'alche'ob ch'óopo'ob, ucha'an loob ti'ob, móocho'ob, yaan u aaxilo'ob, we'ech wa pawo' tu wíinclilo'ob, mix a dzáique'ex tóocbil u ti'al u ti'ibil óolal tu multuunil kultaj u ti'al Yuumtzil.

²³U ti'al u ti'ibil óolal juunal óole', je'el u páajtal a táanbesic jun túul wacax wa jun túul j taman cóom jun dzíit yooc, ba'ale' u ti'al a dzo'ocbesic jun p'éel séeb chi'e', ma' kambe'eni'.

²⁴Ma' xan unaj u táanbesico'ob ti' Yuumtzil ba'alche'ob yaan u ye'el u j xiibilo'ob ucha'an loob ti'ob, kola'ano'ob, mamaxta'ano'ob wa xota'ano'ob. Ma' a beetique'ex ba'alo'ob bey ta lu'ume'exo'.

²⁵Mix a kamique'ex ti' le j táanxel lu'umil le ba'alche'ob beyo'ob u ti'al u janal a Kuex, tumen lelo' ba'alche'ob nuumo'ob ma' kambe'eno'obi'.

²⁶Yuumtzile' tu t'anaj Moisese' ca tu ya'alaj ti':

²⁷Le quéen síijic jun túul chan wacax, jun túul chan j taman, wa jun túul chan yuuque', unaj u p'áatal tu tzéel u maama siete kiino'ob, ba'ale' tu ocho kiine' cu kambe'enchajal u ti'al ti'ibil óol ti' Yuumtzil.

²⁸Ma' a quíimsic chéen ti' jun p'éel kiin jun túul wacax pa'ate' yéetel u yaal.

²⁹Le quéen a táanbes u ti'ibil óolal nib óolal u ti'al Yuumtzile', beet ma'alob u ti'al ca ka'amac ma'alo'.

³⁰Cu dzo'ocole' jaant láili' ti' le kiino', ma' a p'atic mix jun p'íit u ti'al tu láak kiini'. Tene' Yuumtzilen.

³¹Cuxlene'ex je'el bix in wa'almaj t'aano'obe'; Dzo'ocbese'ex. Tene' Yuumtzilen.

³²Ma' manba'alcuntique'ex in quili'ich kaaba', beyo' bíin quili'ichcunta'aquen tumen le j israelitaobo'. Tene' teen Yuumtzil máax jun páaycunte'ex.

³³Bey xan tin jóokese'ex Egipto u ti'al in beetinquinbáa a Kuex. Tene' Yuumtzilen.