Read Yucateco Levítico 23 Bible Online

Levítico 23 - Yucateco bible

Levítico 23

¹Yuumtzile' tu t'anaj Moisese' ca tu ya'alaj ti':

²A'al ti' le j israelitaobo': Le kiino'oba' yéeya'ano'ob chéen u ti'al Yuumtzil, bíin a wa'ale'ex u kiinilo'ob quili'ich much'tal.

³Bíin meyajnaquech seis kiino'ob, ba'ale' sábado u siete kiine' ma' unaj a beetic mix jun p'éel meyaji'; tumen u kiinil sábado tu nojbe'enil Yuumtzil.

⁴Le kiino'ob je'ela' chéen u ti'al u beeta'al quili'ich much'talo'ob tu nojbe'enil Yuumtzil, unaj a much'tale'ex:

⁵Tu catorce kiin ti' yáax winal tu yocbal kiine', ca kiinbesique'ex le Tadz Máanil tu nojbe'enil Yuumtzil.

⁶Tu quince kiin láili' ti' le meso', ca kiinbesique'ex u kiinkujil waajo'ob x ma' levadurai tu nojbe'enil Yuumtzil. Buul siete kiino'ob bíin jaanta'ac waaj x ma' levadurai.

⁷Yáax jun p'éel kiine' bíin kiinbesa'ac jun p'éel quili'ich much'tal. Ma' a beetique'ex mix jun p'éel wa ba'ax meeyjul.

⁸Buul siete kiino'ob unaj a tóoquique'ex ti'ibil óolalo'ob ti' Yuumtzil, cu dzo'ocole' tu siete kiine' unaj a kiinbesique'ex jun p'éel quili'ich much'tal. Ma' unaj a beetique'ex mix jun p'éel meyaji'.

⁹Yuumtzile' tu t'anaj Moisese' ca tu ya'alaj ti':

¹⁰A'al ti' le j israelitaobo': Le quéen dzo'ococ a woocle'ex cajtal ti' le lu'um bíin in dzáate'ex, cu kuchul u kiinil a jochique'ex a trigo'exe', unaj a táanbesique'ex ti' le aj kiin u yáax chúuch kaaxil le joocho'.

¹¹Tu jo'oloj sábadoe', le aj kiino' cu táanbesic ti' Yuumtzil chéen u ti'al ti'ibil óolal yo'olal u kambe'enchajal.

¹²Láili' ti' le kiin cu táanbesa'al le chúuch kaxo'obo', bíin táanbesa'ac jun túul chan ja'aben j taman láaj utz u wíinclil u ti'al láaj tóocbil tu nojbe'enil Yuumtzil.

¹³Bíin u taaso'ob xan ca'a wuudz ca tac táancoch u ma'alobil juuch' xa'akta'an yéetel aceite, u ti'al u táanbesa'al ti' Yuumtzil u ti'ibil óolal láaj tóocbil utz qui'iboquil tu táan. U ti'al wecbil ti'ibil óole' unaj u táanbesa'al jun litro u kab uva.

¹⁴Ca'aliquil ma' a bise'ex a ti'ibil óole'ex ti' Yuumtzile', ma' unaj a jaantique'ex waaji', mix kéelbil trigo, mix che'eche' trigo. Lela' jun p'éel a'almaj t'aan bíin máanac ti' taataob tac ti' u paalalo'ob je'el tu'ux bíin cajlaque'exe'.

¹⁵Líikbal ti' le kiin bíin a bise'ex u chúuch kaaxil le trigo chéen u ti'al ti'ibil óol tu jo'oloj sábadoo', unaj u xo'ocol siete buul siete semanaob.

¹⁶Yéetel u láak jun p'éel kiin cu dzo'ocol sábadoe', cu chúucpajal cincuenta kiino'ob. Cu táanbesico'ob túun ti' Yuumtzil u ti'ibil óolal túumben trigo,

¹⁷cu ch'a'ico'ob tu yotocho'ob ca'a p'éel waaj takancuna'ano'ob yéetel levadura, míin can wuudz yaan ti' u jujun p'éelil, u ti'al u chéen ti'ibil óolal yáax icho'ob ti' Yuumtzil.

¹⁸Pa'ate' yéetel le waajo'obo', bíin u biso'ob siete mejen ja'aben j tamano'ob láaj utz u wíinclilo'ob, jun túul chan wacax yéetel ca'a túul j tamano'ob je'el bix le cu láaj tóoca'al tu nojbe'enil Yuumtzil, u ti'al qui'iboc ti'ibil óol utz tu táan leti', yaan xan u táanbesa'al u ti'ibil óol jejeláas neeko'ob yéetel u kab uva.

¹⁹Bíin xan u táanbeso'ob jun túul j yuuc tu yo'olal keban, bey xan ca'a túul mejen ja'abente'il j tamano'ob u ti'al u quíimsbil ba'alche'il ca'a bisajbáa.

²⁰Le aj kiino' bíin u kub le ba'alche' chéen u ti'al ti'ibil óol tu táan Yuumtzil, pa'ate' yéetel u waajilo'ob yáax jooch, bey xan le ca'a túul mejen j tamano'obo'. Bíin jun páaycunta'aco'ob ti' Yuumtzil u ti'al le aj kiino'.

²¹Láili' ti' le kiin je'elo', unaj a kiinbesique'ex jun p'éel quili'ich much'tal, bey xan bíin a wet'ique'ex wa ba'ax meyajil. Lela' jun p'éel a'almaj t'aan u ti'al tuláacal kiino'ob bíin máanac ti' taataob tac ti' u paalalo'ob je'el tu'ux bíin cajlaque'exe'.

²²Le quéen kuchuc u kiinil jooche', ma' jach láaj molic u joochil a cool, mix a meendzultic u x p'ata'abe'enilo'ob. P'at u ti'al óotzilo'ob yéetel j táanxel lu'umilo'ob. Tene' Yuumtzilen a Junab Kuex.

²³Yuumtzile' tu t'anaj Moisese' ca tu ya'alaj ti':

²⁴A'al ti' le j israelitaobo': Tu yáax u kiinil siete mese', yaan a kiinbesique'ex jun p'éel sábado, bey xan jun p'éel quili'ich much'tal yéetel u jóopsaj paaxil ju'ubo'ob.

²⁵Unaj a tóoquique'ex jun p'éel ti'ibil óol tu nojbe'enil Yuumtzil, cu dzo'ocole' ma' bíin a beete'ex wa ba'ax meeyjuli'.

²⁶Yuumtzile' tu t'anaj Moisese' ca tu ya'alaj ti':

²⁷U diez kiinil u siete mese', u kiinil sa'atsaj si'ipil. Unaj a kiinbesique'ex jun p'éel quili'ich much'tal, bey xan bíin su'ukiinaque'ex ti' le kiino' yéetel yaan a tóoquique'ex jun p'éel ti'ibil óol tu nojbe'enil Yuumtzil.

²⁸Ma' a beetique'ex mix jun p'éel meyaj ti' le kiin je'elo' tumen u kiinil sa'atsaj si'ipil u ti'al a kamique'ex u sa'atsaj si'ipil Yuumtzil a Kuex.

²⁹Le máax ma' tu jóokesic le kiin je'el u ti'al u su'ukino', je'el máaxac leti'e', yaan u tze'elel ichil u caajal.

³⁰Le máax xan bíin u beet wa ba'ax meyajil ti' le kiino', je'el máax leti'e' yaan in beetic u tze'elel ichil u caajal.

³¹Ma' a beetique'ex mix jun p'éel meyaj. Lela' jun p'éel a'almaj t'aan u ti'al tuláacal kiino'ob, bíin máanac ti' taataob tac ti' u paalal je'el tu'ux bíin cajlaque'exe'.

³²Jun p'éel sábado a ti'ale'ex, yaan a su'ukine'ex, bíin a cáajse'ex tu yoocbal u kiinil nueve ti' le meso', tac tu yoocbal u láak kiin.

³³Yuumtzile' tu t'anaj Moisese' ca tu ya'alaj ti':

³⁴A'al ti' le j israelitaob: U quince kiinil láili' ti' le siete meso', buul siete kiino'ob bíin a kiinbese'ex u cha'anil máacano'ob tu nojbe'enil Yuumtzil,

³⁵yéetel jun p'éel quili'ich much'tal tu yáax jun p'éel kiin. Ma' a beetique'ex mix jun p'éel meyaj.

³⁶Ti' buul siete kiino'ob bíin a tóoque'ex ti'ibil óolalo'ob tu nojbe'enil Yuumtzil. Lelo' jun p'éel kiinil kiin kuj, ma' bíin a beete'ex mix jun p'éel wa ba'ax meeyjuli'.

³⁷Lela' leti' le kiino'ob jóokesa'an chéen u ti'al Yuumtzil, unaj a wa'alique'ex u kiinilo'ob quili'ich much'tal tu'ux bíin a táanbese'ex ti' Yuumtzil tóocbil ti'ibil óolo'ob, tóocbil ba'alche'ob, u ti'ibil óolal jejeláas neeko'ob, quíimsbil ba'alche'ob yéetel u ti'ibil óolal u kab uva je'el bix unaj u ku'ubul tu kiinilo'obe',

³⁸jun páay xan bíin kiinbesaco'ob sábado tu nojbe'enil Yuumtzil, bey xan le siibalo'ob yéetel ti'ibil óolalo'ob séeb chi'itano'ob wa quex le cu dzabalo'ob chéen yéetel juunal óolo'.

³⁹Tu quince kiin ti' le siete winal le quéen dzo'ococ a joche'exo', ca kiinbesique'ex jun p'éel kiinkuj buul siete kiino'ob tu nojbe'enil Yuumtzil, bey xan jun p'éel sábado tu yáax jun p'éel kiin yéetel tu ocho kiin.

⁴⁰Tu yáax jun p'éel kiine' bíin ch'a'abac u yich u ma'alobil che'ob, u le' xan yéetel u le' che'ob piim u le'ob bey xan u cóopoilo'ob áalcab ja', buul siete kiino'ob bíin qui'imacchajac a wóole'ex tu táan Yuumtzil a Kuex.

⁴¹Tu jujun ja'ab tu siete mese', bíin a kiinbese'ex jun p'éel kiinkuj buul siete kiino'ob tu nojbe'enil Yuumtzil. Jun p'éel a'almaj t'aan u ti'al tuláacal kiino'ob bíin máanac ti' taataob tac ti' u paalal.

⁴²Ti' le buul siete kiino'ob je'elo', tuláacal u sijnalil le j israelitaobo', yaan u cajtalo'ob yáanal máacano'ob,

⁴³u ti'al ca kuchuc u yojéelto'ob tuláacal u ch'i'ibalo'ob, le ca tin jóokeso'ob Egipto le j israelitaobo', tin beetaj u cajtalo'ob yáanal máacano'ob. Tene' Yuumtzilen u Junab Kuob.

⁴⁴Bey úuchic u ya'alic Moisés ti' le j israelitaob ba'ax kiinilo'ob jóokesa'ano'ob chéen u ti'al Yuumtzil.