Read Yucateco Levítico 3 Bible Online

Levítico 3 - Yucateco bible

Levítico 3

¹Le máax cu ch'a'ic ichil u yalak ba'alche'ob jun túul x wacax wa jun túul aach wacax u ti'al u táanbes ti' Yuumtzil jun túul quiimsbil ba'alche' u ti'al ca'a bisajbáil yéetel Yuumtzile', le ba'alche' u ti'al kubbilo' unaj láaj utz u wíinclil.

²Le máax taasic le ti'ibil óolo', bíin u dzáa u kab yóokol u pool le ba'alche' u taasmajo', cu dzo'ocole' cu xotic u yúul tu jool u noj Paselil Much'tal. Le aj kiino'ob xano' bíin u widz ki'ikto'ob yóokol yéetel tu bakpach le u multuunil kultajo'.

³Le máax taasic le ba'alche' u ti'al u táanbes bey u ti'ibil óolil ca'a bisajbáile', unaj u taasic tu táan Yuumtzil bey tóocbil ti'ibil óole', u tzaatzel yéetel u jobnel le ba'alche'o',

⁴u ca'a p'éel yiisilo'ob, le tzaatz to'omailo' bey xan le tzaatz to'omail u bakel u pu'ucho', u tzaatzel u táamnel, unaj u luksa'al pa'ate' yéetel u yiisilo'ob.

⁵Le aj kiino'obo', bíin u beeto'ob u yelel tuláacal yóokol le u multuunil kultajo' tu tzéel le ba'alche' bíin tóocac ti' le tóoch'bal si', bey tóocbil ti'ibil óol utz qui'iboquil tu táan Yuumtzil.

⁶Wa máax cu kubic ti' Yuumtzil jun túul u ba'alche'il u múuch'ul u yaalako'ob bey u quíimsbil ti'ibil óolil ca'a bisajbáile', unaj u táanbesic xiibil ba'alche' wa x ch'upul ba'alche' láaj utz u wíinclil.

⁷Wa cu táanbesic jun túul j tamane', le quéen u bis tu táan Yuumtzile'

⁸bíin u dzáa u kab yóokol u pool, cu dzo'ocole' cu xotic u yúul tu táan u noj Paselil Muuch'tal. Le aj kiino'ob túuno' bíin u widzo'ob u ki'ikel le ba'alche' yóokol yéetel tu tzéelo'ob le u multuunil kultajo'.

⁹Le máax táanbesic le ba'alche' bey u quíimsbil ti'ibil óolil ca'a bisajbáa, unaj u taasic tu táan Yuumtzil bey láaj tóocbil ti'ibil óole', u tzaatzel, u nej túulis xot'a'anil tu chuun u t'o'olol u paach, u tzaatzel to'ic u jobnel,

¹⁰u ca'a p'éel yiisilo'ob, le tzaatz to'omailo'obo' le yaan xan yóokol u bakel u pu'uche', yéetel u tzaatzel u táamnil bíin luksa'ac pa'ate' yéetel u yiisilo'ob.

¹¹Cu dzo'ocole' le aj kiino' cu láaj tóoquic yóokol u multuunil kultaj bey u ti'ibil óolil janal láaj tóocbil tu tzicbe'enil Yuumtzile'

¹²Wa le ba'alche' cu táanbesic jun túul x yuuque', le quéen u táanbes tu táan Yuumtzile'

¹³bíin u dzáa u kab yóokol u pool, cu dzo'ocole' cu xotic u yúul tu táan u noj Paselil Muuch'tal. Le aj kiino'ob túuno' cu widz ki'iktico'ob yóokol yéetel tu tzéelob le u multuunil kultajo'.

¹⁴Le máax kubic le ba'alche'o', je'el u páajtal u cha'ic u kub bey ti'ibil óolil tu nojbe'enil Yuumtzil, tuláacal u tzaatzel u jobnel,

¹⁵tu ca'a p'éel yiisilo'ob, le tzaatz to'omailo'obo', bey xan le to'omail u bakel u pu'uch, u tzaatzel yéetel u táamnele', unaj u luksa'al pa'ate' yéetel u yiisilo'ob.

¹⁶Cu dzo'ocole' le aj kiino', bíin u tóoc tuláacal yóokol le u multuunil kultajo' bey u ti'ibil óolil tóocbil janal utz qui'iboquil. Tuláacal le tzaatzo' u ti'al Yuumtzil.

¹⁷Lela' jatz t'aan u ti'al tuláacal kiin bíin máanac ti' taataob tac ti' u paalal je'el tu'ux bíin cajlaque'exe': Ma' jaantique'ex mix jun p'íit tzaatz, mix ki'ik.