Read Yucateco Levítico 4 Bible Online

Levítico 4 - Yucateco bible

Levítico 4

¹Yuumtzile' tu t'anaj Moisés ca tu ya'alaj ti':

²A'al ti' le israelitaobo' wa yaan máax, ma' tumen wa j taali' ti' u kebanchajal ti' jun p'éel u nu'uc t'aano'ob Yuumtzile', wa cu beetico'ob le ba'ax u wet'maje', le ti'obe' unaj u beetico'ob lela':

³Wa le nojoch aj kiin cu kebanchajle', tu yo'olal lelo' cu beetic u si'ipil le caajo', kabéet u taasic ti' Yuumtzil jun túul wacax láaj utz u wíinclil, u ti'al mukyaj tu yo'olal le keban tu beetajo'.

⁴Unaj u taasic tu táan Yuumtzil, tu jool u noj Paselil Much'talo'; te'elo' bíin u dzáa u kab yóokol u pool le wacaxo', cu dzo'ocole' cu xotic u yúul tu táan Yuumtzil.

⁵Cu dzo'ocole' cu ch'a'ic jun p'íit u ki'ikel le wacaxo' cu bisic tu noj Paselil Much'talo';

⁶te'elo' cu ch'ulic u yaal u kab yéetel le ki'iko', cu dzo'ocole' cu widzic siete u téenel tu táan Yuumtzil tu x káasabil le quili'ich najo'.

⁷Bíin u cu'ult jun p'íit le ki'ik ti' u baaco'ob u multuunil kultaj beeta'an u ti'al qui'iboc poom le yaan tu táan Yuumtzil tu noj Paselil Much'talo', tuláacal u yalab le ki'ik cu p'áatale' cu wequic tu yooc le u multuunil kultaj beeta'an u ti'al láaj tóocbil ba'alche'ob le yaan tu jool le u noj Paselil Much'talo'.

⁸Cu dzo'ocole' cu lukesic tuláacal le tzaatz bakpachtic u jobnel le quíimsbil chan wacaxo',

⁹u tzaatzel yaan tu ca'a p'éel yiiso'ob, u táamnel bey ti' u bakel u paach bíin u lukes tuláacal pa'ate' yéetel u yiisil,

¹⁰jach je'el bix u lukesa'al ti' le xiibil wacax cu ku'ubul u ti'al u ti'ibil óolalil ca'a bisajbáile'. Cu dzo'ocole' le aj kiino' cu láaj tóoquic tu yóokol u multuunil kultaj.

¹¹Ba'ale' u kéewlel yéetel tuláacal u bakel, pa'ate' yéetel u pool, u muuk yooco'ob, u jobnel, yéetel le ma' janalbe'en ba'alo'obo',

¹²lela' u káat u ya'ale': tuláacal le chan wacaxo', cu jo'oksic tu paach le péet caajo' cu bisic ti' jun p'éel cúuchil manba'alcunta'an tu'ux cu pu'ulul u ta'anil káak, te'elo' tu yóokol tu'ux mulucbal le ta'ano', cu dzáic le si'o', cu dzo'ocole' cu t'abic.

¹³Wa tuláacal u caajil israel cu beetic ba'al kaas quex ma' u káat u beeto'obe', wa mix jun túul ichilo'ob tu yilaj dzo'oc u beetico'ob ba'ax kaas ti' u nu'ucbe'en t'aano'ob Yuumtzil cu si'ipilcuba'obe',

¹⁴le quéen ojéelta'ac ba'ax kebanil dzo'oc u beetico'obe', tuláacalo'ob u najmal u múul kubico'ob jun túul chan wacax u ti'al quíimsbil tu yo'olal keban. Cu bisico'ob tu táan u noj Paselil Muuch'talo',

¹⁵te'elo' u nuuquilo'ob le caajo', tu táan Yuumtzile' bíin u dzáa u kabo'ob tu pool le wacaxo', te'elo' cu xotco'ob u yúul.

¹⁶Cu dzo'ocole' le aj kiino' cu bisic jun p'íit u ki'ikel le wacax tu noj Paselil Muuch'talo',

¹⁷cu ch'ulic u yaal u kab te j ki'iko' cu dzo'ocole' cu widzic siete u téenel tu táan Yuumtzil, actáan ti' le x káasabo'.

¹⁸Bey xan cu cu'ultic jun p'íit le ki'ik tu baacoob le u multuunil kultaj yaan tu táan Yuumtzil, tu noj Paselil Muuch'tal. Tuláacal le u yalab le ki'iko' cu wequic tu yooc u multuunil kultaj láaj tóocbil ba'alche', yaan tu noj Paselil Muuch'talo'.

¹⁹Bey xan cu láaj luksic u tzaatzel le wacaxo' cu dzo'ocole' cu tóoquic tu multuunil kultajo',

²⁰u káat u ya'ale' Yaan u beeta'al yéetel le wacaxa' jach je'el bix cu beeta'al ti' le wacax cu quíimsa'al tu yo'olal kebano'; beyo' le aj kiino' cu kamic sa'atsaj u ti'al le caajo', le keban túuno' cu sa'atsa'al ti'ob.

²¹Cu dzo'ocole' cu jo'oksic le wacax tu paach le péet caajo', te'elo' bíin u tóoque', jach je'el bix beeta'ab ti' le yáax chan wacaxo', tumen j quíimsa'ab tu yo'olal u keban le caajo'.

²²Wa jun túul jo'ol póop cu kebanchajal tu yo'olal tu beetaj ba'al kaas ti' u nu'ucbe'en t'aano'ob Ku u Yuumtzile', cu yantal u si'ipil quex ma' j taaliti' u beetiqui'.

²³Le quéen u kaj óolt ba'ax kebanil tu beetaje', kabéet u bisic jun túul j yuuc utz u wíinclil bey ti'ibil óolale'.

²⁴Cu dzáic u kab tu yóokol u pool le j yuuco' cu xotic u yúul tu táan Yuumtzil, te tu cúuchil tu'ux cu quíimsa'al le ba'alche'ob u ti'al tóocbilo'obo', tumen lelo' quíimsbil ba'alche' tu yo'olal keban.

²⁵Cu dzo'ocole' le aj kiino' bíin u ch'a'a yéetel u yaal u kab jun p'íit u ki'ikel le ba'alche' quíimsa'an tu yo'olal le kebano', u ti'al u cu'ult tu baaco'ob le multuunil kultaj tu'ux cu tóoca'al le ba'alche'o', cu dzo'ocole' cu wequic u yalab le ki'ik láili' tu chuun le u multuunil kultajo'.

²⁶Cu láaj tóoquic le tzaatz je'el bix u beeta'al yéetel u tzaatzel u quíimsbil ba'alche'il yo'olal ca'a bisajbáilo'. Beyo' le aj kiino' cu kamic u sa'atsaj si'ipil u keban le j jo'ol póopo', cu sa'atsa'al u keban.

²⁷Wa jun túul óotzil máac cu kebantal ma' j taali'iti'e', tu yo'olal sipa'anchajic ti' u nu'ucbe'en t'aano'ob Yuumtzile',

²⁸le quéen u yojéelt dzo'oc u kebanchajle', unaj u bisic jun túul x yuuc láaj utz u wíinclil u ti'al u ti'ibil óolal le keban tu beetajo'.

²⁹Bíin u dzáa u kab yóokol u pool le ba'alche' cu ku'ubic yo'olal u kebano', cu dzo'ocole' cu xotic u yúul tu cúuchil tu'ux cu láaj tóoca'alo'ob.

³⁰Le aj kiin túuno' cu ch'a'ic jun p'íit le ki'ik yéetel u yaal u kabe', cu cu'ultic tu baaco'ob le multuunil kultaj tu'ux cu láaj tóoca'al le ba'alche'obo', cu láaj wequic xan u yalab le ki'ik tu chuun le multuunil kultajo'.

³¹Unaj xan u lukesic tuláacal u tzaatzel je'el bix u luksa'al ti' le ba'alche' cu quíimsa'al u ti'al ca'a bisajbáile', ca u tóoc yóokol le u multuunil kultajo' utz qui'iboquil tu táan Yuumtzil. Beyo' le aj kiino' cu kamic u sa'atsaj si'ipilil u keban le máaco', cu p'áatal sa'atsa'an le kebano'.

³²Wa le máac cu taasic jun túul j taman u ti'al quíimsbil tu yo'olal u kebane', unaj u taasic jun túul x taman láaj utz u wíinclil.

³³Bíin u dzáa u kab yóokol u pool le j tamano', cu dzo'ocole' cu xot'ic u yúul bey quíimsbil ba'alche' tu cúuchil tu'ux cu quíimsa'al le ba'alche'ob cu láaj tóoca'alo'obo'.

³⁴Le aj kiin túuno' cu ch'a'ic yéetel u yaal u kab jun p'íit u ki'ikel le ba'alche' quíimsa'an tu yo'olal kebano', cu cu'ultic tu baaco'ob u multuunil kultajo' tu'ux cu láaj tóoca'al le ba'alche'obo', cu wequic xan tu chuun le u multuunil kultaj u yalab le ki'iko'.

³⁵Cu dzo'ocole' cu láaj lukesic u tzaatzel je'el bix u luksa'al ti' le chan j taman cu quíimsa'al u ti'al ca'a bisajbáilo', cu tóoca'al u tzaatzel ti' le u multuunil kultaj tu tzéel le ti'ibil óolalo'ob cu tóoca'alo'ob tu nojbe'enil Yuumtzilo'. Beyo' le aj kiino' cu kamic u sa'atsaj si'ipil le máac kebanchajo', cu sa'atsa'al u keban.