Read Yucateco Levítico 7 Bible Online

Levítico 7 - Yucateco bible

Levítico 7

¹Le quíimsbil ba'alche'ob yo'olal si'ipilo', sen quili'icho'ob. Je'el u tzol t'aanilo'oba':

²Le ba'alche' cu ku'ubul yo'olal si'ipilo', unaj u xo'otol u yúul tu cúuchil tu'ux cu quíimsa'al le ba'alche'ob cu táanbesa'alo'ob u ti'al láaj tóocbilo', u ki'ikel xane' unaj u widzil tu yóokol yéetel tu tzelo'ob le u multuunil kultajo'.

³Unaj u ku'ubul tuláacal u tzaatzel le ba'alche'o': le yaan tu nej yéetel le balic u jobnelo',

⁴u ca'a p'éel yiisilo'ob, le tzaatz yaan yóokol u pu'ucho', bey xan u tzaatzel u táamnel, kabéet u luksa'al pa'ate' yéetel u yiiso'obo'

⁵Cu dzo'ocole' le aj kiino' cu tóoquic yóokol u multuunil kultaj, bey ti'ibil óol láaj tóoca'an tu nojbe'enil Yuumtzilo'. Lelo' quíimsbil ba'alche' tu yo'olal si'ipil,

⁶tuláacal xan le aj kiino'ob bíin páatac u jaantico'ob, quex tumen kabéet ti' jun p'éel cúuchil jun páaycuna'an, tumen sen quili'ich ba'al.

⁷Le quíimsbil ba'alche' tu yo'olal si'ipilo', bey je'el bix le quíimsbil ba'alche' tu yo'olal kebano', u tzol t'aanil xane' láili' beyo': le ba'ax kuba'ano', u ti'al le aj kiin máax beetic u táanbesajil u ka'amal sa'atsaj si'ipilo'.

⁸Le aj kiin xan táanbesic le ba'alche' cu taasa'al tumen wa máax u ti'al láaj tóocbile', je'el u páajtal u ch'a'ic u kéewlel le ba'alche'o'.

⁹Le xan u jejeláasil janalbe'en neeko'ob kéela'ano'ob ti' chujcab yéetel le ba'axo'ob máakanta'ano'ob ti' jaajay cáat wa ti' kóom xamache', u ti'al le aj kiin táanbesic le ti'ibil óolo'.

¹⁰Bey xan tuláacal u ti'ibil óolilo'ob jejeláas janalbe'en neeko'ob, ya'ach'ta'an yéetel aceite je'el bix le tiquino'obo', u ti'al u ch'i'ibalo'ob Aarón, jun tacáalili' jaatzil bíin t'o'oxoc ti'ob.

¹¹Lela' u tzol t'aanilo'ob le quíimsbil ba'alche'ob u ti'al ca'a bisajbáil cu táanbesa'al ti' Yuumtzilo':

¹²Wa le quíimsbil ba'alche' u ti'al u dzabal nib óolalo', yaan xan u táanbesa'al piimpiim waajo'ob x ma' levadurail ya'ach'ta'an yéetel aceite, oop'il waajo'ob x ma' levadurail widza'ano'ob aceite, yéetel u piimpiim waajil juch'bil ma'alob janalbe'en neeko'ob ya'ach'ta'an yéetel aceite;

¹³bíin táanbesa'ac xan piimpiim waajo'ob yaan u levadurail pa'ate' yéetel u quíimsbil ba'alche'ilo'ob le nib óolalo', bey xan yéetel u quíimsbil ba'alche'il ca'a bisajbáilo'.

¹⁴Ti' tuláacal ti'ibil óole', bíin ch'a'abac jun jaatz u ti'al j táanbesa'al ti' Yuumtzil u ti'al bo'olil, lelo' u ti'al le aj kiin widzic u ki'ikel u quíimsbil ba'alche'il le ca'a bisajbáilo'.

¹⁵U bakel le ba'alche' táanbesa'an u ti'al nib óolal wa u ti'al ca'a bisajbáilo' unaj u jaanta'al le kiin cu táanbesa'alo'; ma' unaj u líiksa'al mix jun xéet' u ti'al u láak kiini'.

¹⁶Wa le ba'alche' táanbesa'ab u ti'al u dzo'ocbesa'al jun p'éel séeb chi' wa quex u ti'al jun p'éel juunal óolal ti'ibil óole', unaj u jaanta'al láili' ti' le kiin táanbesa'abo', ba'ale' u yalabe' je'el u páajtal u jaanta'al tu láak kiine'.

¹⁷Wa tu yóox p'éel kiin láili' p'áatal u yalab le ba'alche' táanbesa'ano', yaan u láaj tóoca'al.

¹⁸Wa yanchaj máax jaantic tu yóox p'éel kiin u bakel u quíimsbil ba'alche'il u ti'al ca'a bisajbáilo', le quíimsbil ba'alche'o', cu p'áatal ma' kambe'eni', le bako' bíin ila'ac bey p'ecbe'en ba'ale'. Le máax bíin jaantique', bíin u cuch le kebano'.

¹⁹Le bak cu táakal ti' je'el ba'alac ma' utz yanile', ma' unaj u jaanta'ali', yaan u tóoca'al. Tuláacal le máaxo'ob utz yanilo'obe' je'el u páajtal u jaantico'ob le bako'.

²⁰Le máax ma' utz yanil wa cu jaantic u bakel u quíimsbil ba'alche'il u ti'al ca'a bisajbáile', yaan u tzéelel ichil u caajal.

²¹Le máax cu táakal ti' ba'ax ma' utz yanil, je'el bix wa ti' máac u taal wa quex ti' ba'alche', wa quex je'el ba'alac cu xot' óolaje', wa cu dzo'ocol cu jaantic u bakel quíimsbil ba'alche' u ti'al ca'a bisajbáile' jun páaycuna'an ti' Yuumtzile', yaan u tze'elel ichil u caajal.

²²Yuumtzile' tu t'anaj Moisese' ca tu ya'alaj ti':

²³A'al bey ti' le israelitaoba': Ma' utz a jaantique'ex mix jun p'íit u tzaatzel wacax, u tzaatzel j taman wa u tzaatzel x yuuqui'.

²⁴U tzaatzel le ba'alche'ob quimeno'ob wa xe'exet'a'ano'ob tumen dzíidzic ba'alche'obo', je'el u páajtal a beetique'ex je'el ba'alac yéetelo'obe', ba'ale' ma' a jaantique'ex.

²⁵Je'el máax ca u jaant u tzaatzel le ba'alche'ob cu taasa'alo'ob ti' Yuumtzil u ti'al láaj tóocbil bey ti'ibil óole', bíin tze'elec ichil u caajal.

²⁶Je'el tu'uxac bíin cajlaque'exe', ma' unaj a jaantique'ex mix u jun p'íit u ki'ikel ch'íicho'ob wa ba'alche'obi'.

²⁷Le máax bíin u jaant je'el ba'alac ki'ikele', bíin tze'elec ichil u caajal.

²⁸Yuumtzile' tu t'anaj Moisese' ca tu ya'alaj ti':

²⁹A'al ti' le israelitaobo', le máax táanbesic ti' Yuumtzil jun túul u quíimsbil ba'alche' u ti'al ca'a bisajbáile', unaj u bisic tu táan Yuumtzil.

³⁰Tu kabil unaj u bisic tu táan Yuumtzil le ti'ibil óolal u ti'al láaj tóocbilo', u tzaatzel u tzeem, tac xan le tzeem u ti'al u beeta'al u kultajil le táanbesaj tu táan Yuumtzilo'.

³¹Le aj kiino', bíin u tóoc le tzaatz ti' le u multuunil kultajo', ba'ale' le tzeemo', u ti'al Aarón yéetel u ch'i'ibalo'ob.

³²U x no'oj muuk ooquil le ba'alche'ob táanbesa'ano'ob u ti'al ca'a bisajbáilo', bíin dza'abac ti' aj kiin Aarón bey bo'olile'.

³³Le x no'oj muuk ooc je'elo', u ti'al le aj kiin táanbesic u tzaatzel yéetel u ki'ikel le ba'alche' quíimsa'an u ti'al ca'a bisajbáilo',

³⁴tumen ti' u quíimsbil ba'alche'ilo'ob u ti'al ca'a bisajbáil cu beetic le j israelitaobo', dzo'oc in jun páaycuntic u tzeem, mina'an u láak ti'ibil óol beyo', bey xan u muuk yooc bey bo'olale', dzo'oc xan in dzáic ti' Aarón yéetel ti' u ch'i'ibalo'ob, ba'al u ti'alo'ob mantadz ti' u taal ti' u ti'ibil óol le j israelitaobo'.

³⁵Ti' le ti'ibil óolalo'ob cu tóoca'al tu nojbe'enil Yuumtzile', jaatzilo'ob bíin dzabac ti' Aarón yéetel u ch'i'ilancab líikbal ti' le kiin jun páaycunta'abo'ob tumen Yuumtzil u ti'al u beeto'ob u aj kiinil ti' leti'a'.

³⁶Yuumtzile' tu tzol t'antaj ti' le j israelitaob ca u dza'ob líikbal ti' le kiin tu jun páaycunto'ob, lela' jun p'éel ba'al u najmal u beetico'ob mantadz, bíin máanac ti' taataob tac u paalalo'ob.

³⁷Lela' u nu'ucbesajilo'ob láaj tóocbil ba'alche'ob, u ti'ibil óolilo'ob jejeláas janalbe'en neeko'ob, u quíimsbil ba'alche'ilo'ob yo'olal keban bey xan yo'olal si'ipil, u ti'ibil óolilo'ob jun páaycunaj yéetel u quíimsbil ba'alche'ilo'ob ca'a bisajbáil.

³⁸Yuumtzile' tu dzáa ti' Moisés tu witzil Sinaí, le ca tu túuchi'ita ti' le j israelitaob tu witzil Sinaí ca u táanbeso'ob ti'ibil óolalo'obo'.