Read Yucateco Levítico 9 Bible Online

Levítico 9 - Yucateco bible

Levítico 9

¹Tu ocho kiine' Moisese' tu t'anaj Aarón yéetel u paalal, bey xan u nuuquilo'ob Israel.

²Tu ya'alaj ti' Aarón: Taas jun túul chan wacax u ti'al quíimsbil tu yo'olal keban, yéetel jun túul j taman láaj utz u wíinclil u ti'al láaj tóocbil, ca a táanbeso'ob tu táan Yuumtzil.

³Ti' le j israelitaobo' a'al ti'ob ca u taaso'ob jun túul j yuuc u ti'al quíimsbil tu yo'olal keban, jun túul chan wacax yéetel jun túul chan j taman ja'abeno'ob láaj utz u wíinclilo'ob u ti'al táanbesbilo'ob láaj tóocbil,

⁴bey xan jun túul wacax yéetel jun túul j taman u ti'al quíimsbilo'ob tu táan Yuumtzil u ti'al ca'a bisajbáil. Yaan xan u taasico'ob jun p'éel u ti'ibil óolal jejeláas janalbe'en neeko'ob ya'ach'ta'an yéetel aceite, tumen Yuumtzile' bíin u ca'aj u chíicbesubáa ti'ob bejela'e'.

⁵Le j israelitaobo' tu bisajo'ob tu táan u noj Paselil Muuch'tal le ba'ax tu ya'alaj Moiseso', bey xan tu láaj nadzubáa le caajo', ca j wa'alajo'ob tu táan Yuumtzil

⁶Moisés túune' tu ya'alaj: Lela' leti' le ba'axo'ob tu nu'ucbe'en t'antaj Yuumtzila'. Dzo'ocbese'ex ca u chíicbesubáa te'ex Yuumtzil yéetel qui'ichquelmil sáasjome'enil.

⁷Cu dzo'ocole' tu ya'alaj Moisés ti' Aarón: Nadzabáa ti' le u multuunil kultajo', ca táanbes le quíimsbil ba'alche' tu yo'olal a keban, bey xan le láaj tóocbil ba'alche' u ti'al u sa'atsaj si'ipilil u keban u caajil Israelo'. Táanbes xan u ti'ibil óol le j israelitaob u ti'al u sa'atsa'al u si'ipilil u kebano'ob, je'el bix u ya'almajil Yuumtzilo'.

⁸Aarone' tu nadzubáa ti' le u multuunil kultajo' ca tu xotaj u yúul le ba'alche' cu táanbesic ca'ach tu yo'olal u kebano'obo'.

⁹Tu séeblaquil j na'adz le ki'ik ti' tumen u paalalo', j Aarone' tu ch'ulaj u yalo'ob u kab yéetele', ca tu cu'ultaj tu baaco'obo' le u multuunil kultajo', tu wecaj xan u yalab tu tzéelo'ob.

¹⁰Cu dzo'ocole' tu tóocaj yóokol le u multuunil kultajo' u tzaatzel, u yiisilo'ob yéetel u tzaatzel u táamnel le ba'alche' quíimsa'an tu yo'olal keban je'el bix tu ya'alajil Yuumtzil ti' Moiseso'.

¹¹Ba'ale' u bakel yéetel u kéewelile', tu tóocaj tu paach le x péet caajo'.

¹²Aarone' tu xotaj xan u yúul le ba'alche' cu táanbesa'al u ti'al láaj tóocbilo', ca j bisa'ab le ki'ik ti' tumen u paalalo', ca tu wecaj tu yóokol yéetel tu tzelo'ob le u multuunil kultajo'.

¹³Cu dzo'ocole', bisa'ab ti'e' u pool yéetel u xéexet'al le ba'alche' xo'oxo'ota'an cu táanbesa'al láaj tóocbilo', ca tu tóocaj Aarón tu yóokol le u multuunil kultajo';

¹⁴cu dzo'ocol xane' tu p'o'aj u choochel yéetel u muuk yooco'obe', ca tu tóocaj tu yóokol le u multuunil kultajo' bey xan le túulis ba'alche'o'.

¹⁵Aarone' tu kubaj xan u ti'ibil óol le j israelitaobo'. Tu ch'aj le j yuuc u quíimsbil ba'alche'il tu yo'olal keban ca'ach le caajo', ca tu xotaj u yúul u ti'al u táanbesic tu yo'olal u keban je'el bix tu beetajil yéetel le yáax ti'ibil óolo'.

¹⁶Le ba'alche' tu bisaj u ti'al láaj tóocbil, tu beetaj je'el bix a'ala'anilo'.

¹⁷Cu dzo'ocole' tu taasaj u ti'ibil óolal jejeláas janalbe'en neeko'obe', ca tu ch'aj jun lóoch'e', ca tu tóocaj tu yóokol le multuunil kultaj pa'ate' yéetel le ba'alche'ob cu tóoca'al ja'atzcab kiino'.

¹⁸Aarone' tu xotaj xan u yúul le wacax yéetel le j taman cu táanbesa'al tumen le j israelitaob u ti'al u quíimsbil ba'alche'il ca'a bisajbáilo'. J ku'ub le ki'ik ti' tumen u paalal ca tu wecaj tu yóokol yéetel tu tzelo'ob le u multuunil kultajo'.

¹⁹J ku'ub ti' xan u tzaatzelo'ob le wacax yéetel le j tamano', u nej, u tzaatzel u jobnel, u yiisilo'ob yéetel u tzaatzel u táamnel,

²⁰dzaab u tzaatzelo'ob tu tzéel u tzeemo'ob. Aarón túune' tu tóocaj le tzaatz tu yóokol le u multuunil kultajo'.

²¹Ba'ale' le tzeemo'ob yéetel le muuk oocobo', chéen tu beetaj u tich'kabil jun páaycunaj je'el bix u ya'almajil Yuumtzil ti' Moiseso'.

²²Aarone' tu líikesaj u kab tu yóokol le j israelitaobo', ca tu qui' t'antajo'ob, cu dzo'ocol u kubic le quíimsbil ba'alche' tu yo'olal kebano', le ba'axo'ob cu láaj tóoca'al yéetel le quíimsbil ba'alche' u ti'al ca'a bisajbáilo', ca tu tzelajubáa tu yicnal le u multuunil kultajo'.

²³Cu dzo'ocole', Moisés yéetel Aarone' j oocob tu noj Paselil Muuch'tal, u ti'al u jóokbalo'obe', tu qui' t'antajo'ob le j israelitaobo'. Yuumtzil túune' tu chíicbesubáa yéetel nojoch qui'ichquelmil ti' tuláacal le caajo'.

²⁴Jóok káak tu táan Yuumtzile', ca tu tóocaj le ba'alche' bíin tóoca'ac ca'ach pa'ate' yéetel le tzaatzo'ob yaan tu yóokol le u multuunil kultajo'. Le ca j ilab bey tumen le j israelitaobo', awat t'aanajo'ob yéetel qui'imac óolal, ca j chinlajo'ob tac u cóojol u táan poolo'ob j lu'um.