Read Yucateco Jeremías 1 Bible Online

Jeremías 1 - Yucateco bible

Jeremías 1

¹Le dzíiba' cu ya'alic bix cuxlajic yéetel ba'ax tu beetaj Jeremías u paal Hilcías. U ch'i'ibal Jeremíase' cu taal ti' aj kiino'ob caja'ano'ob ca'ach tu caajil Anatot, tu lu'umil u ch'i'ibalo'ob Benjamín.

²Yuumtzile' tu t'anaj Jeremías tu trece ja'abo'ob u ajawil Josías, u paal Amón, táan u ajawiltic Judá.

³Bey xan tu t'anaj tu kiinilo'ob Joacim, u paal Josías, táan ca'ach u ajawtic Judá, tac tu once ja'abil u méektáan Sedequías u paal xan Josías, le ca tu méektáantaj Judae'; u káat ya'ale', tac tu cinco winalil le ja'abo', le ca j bisa'abo'ob náach u cajnáalilo'ob Jerusalene'.

⁴Yuumtzile' tu t'anajen ca tu ya'alaj ti' teen:

⁵Ma'ili' in dzáa a cuxtale', dzo'oc ca'ach in kaj óoltiquech; ma'ili' síijiqueche', dzo'oc ca'ach in jun páaycuntiquech, u ti'al a beetic u aj bóobatil caajo'obo'.

⁶Tene' tin núucaj: ¡Yuumtzil! ¡tene' jach paalen ma' xan in wojel t'aani'!

⁷Ba'ale' Yuumtzile' tu ya'alaj ti' teen: Ma' a wa'alic wa jach paalech. Teche' yaan a bin tu'ux bíin in túuxtech, yéetel yaan xan a wa'alic ba'ax bíin in wa'al ti' teech.

⁸Ma' a ch'a'ic sajaquil ti' mix máac, tumen teen bíin yanaquen ta wéetel u ti'al in canantech. Teen Yuumtzil, teen a'alic ti' teech.

⁹Yuumtzil túune' tu tich'aj u kab, ca tu cóojsaj tin chi', ca tu ya'alaj ti' teen:

¹⁰Tene' quin dzáic in t'aano'ob ta chi'. Bejela'e' táan in dzáic ti' teech páajtalil Tu yóokol ajawilo'ob yéetel múuch' caajo'ob, u ti'al a jobic yéetel u ti'al xu'ulsic caajo'ob, u ti'al pa'ic yéetel jenic caajo'ob, u ti'al xan a líiksic yéetel u ti'al a wa'acunsic caajo'ob.

¹¹Yuumtzile' t'aanajene' ca tu ya'alaj teen: Jeremías, ¿Ba'ax ca wilic? Ca tin núucaj: Taan in wilic u kab jun cúul almendro.

¹²Yuumtzile' tu ya'alaj teen: Jaaj a t'aan. Tumen táan in pa'atic u yúuchul ba'ax tin wa'alaj.

¹³Yuumtzile' tu ca'a t'anajen, ca tu káat chi'itaj ti' teen: ¿Ba'ax ca wilic? Tene' tin núucaj ti': quin wilic jun p'éel cuum cu looc, chéen ta'aytac u wéequel líikbal j xaman.

¹⁴Yuumtzil túune' tu ya'alaj ti' teen: Líikbal j xaman bíin talac u wéequel yaj óolal tu yóokol u cajnáalilo'ob lu'um.

¹⁵Teen Yuumtzil, teen a'alic bíin in ca'aj in t'aan tuláacal u ajawilo'ob j xaman. Bíin talac ajawo'ob u dza'ob u jalach káanche'ob tu jool u caajil Jerusalén, actáan ti' tuláacal u tuulumilo'ob bakpachtico' yéetel actáan ti' tuláacal u caajilo'ob Judá.

¹⁶Leti' le jadz bíin in xot kint yóokol le aj kebano'ob tu xúump'attajeno'obo', le máaxo'ob tu tóocajo'ob pom ca tu kultatajo'ob táanxel lu'umil kuob, leti'ob beetmailo'ob.

¹⁷Ba'ale' teche' ma' a ch'a'ic sajaquilil; xeen ca wa'al ti'ob tuláacal ba'ax dzo'oc in wa'alic ti' teech. Ma' a ch'a'ic sajaquil, tumen wa ma'e' tene' je'el in beetic a quiquilanquil tu táano'obe'.

¹⁸Bejela'e' quin dzáic ti' teech muuk beyech caaj bakpachta'an tu tuulume', beyech jun p'éel ocom fierro u ca'aje', beyech tuulum bronce u ca'aje', u ti'al a wa'atal j t'aan tu táan tuláacal u caajilo'ob Judá: ti' u ajawilo'ob, u nuuquilo'ob, u aj kiino'ob, yéetel tuláacal u cajnáalilo'ob.

¹⁹Leti'obe' bíin u ba'ateltecho'ob ba'ale' ma' bíin páataco'ob ta wéeteli' tumen teen bíin ti'anaquen ta wéetel u ti'al in canantech. Teen Yuumtzil, teen a'alic ti' teech.