Read Yucateco Jeremías 10 Bible Online

Jeremías 10 - Yucateco bible

Jeremías 10

¹U'uye'ex u caajil Israel, le péectzil cu túuxtic Yuumtzil ti' te'exa'.

²Yuumtzile' cu ya'alic: Ma' a beetique'ex ba'alo'ob cu beetico'ob u láak caajo'obo' mix a ch'a'iquex sajaquil tu yo'olal u chíiculalo'ob le ca'ano', je'el bix u beetico'ob le u láak caajo'obo'.

³U yocsaj óolal le caajo'obo' mix ba'al u biilal. Cu ch'aquico'ob u chuun jun cúul che'e' te j káaxo', jun túul j póolche'e' cu t'óojic yéetel u cincel,

⁴cu dzo'ocole' cu jadzutzquintico'ob yéetel plata bey yéetel oro, cu bajico'ob ma'alob u ti'al ma' u lúubul.

⁵Le beetbil kuobo' beyo'ob ja'asaj óol ch'íiche' ti' jun p'éel cool tu'ux paka'an melón; ma' tu páajtal u t'aan, kabéet xan u cu'uchulo'ob, tumen ma' tu xíimbalo'ob. Ma' a ch'a'ique'ex sajaquil ti'ob, tumen ti' mix máac cu beetico'ob kaas, mix utz.

⁶Yuumtzil, mina'an mix máac je'el bixeche': teche' nojochech, a kaaba'e' nojoch, yaan u páajtalil.

⁷¿Máax ma' tu ch'a'ictech sajaquil, u ajawil u cajnáalilo'ob lu'um? Teche' u najmal a tzi'iquil. Ichil tuláacal aj ojéelajo'ob yéetel u ajawilo'ob u caajilo'ob lu'um, mina'an u láak je'el bixeche'.

⁸Tuláacalo'obe' j ma' na'ato'ob, mina'an mix jun p'éel u na'ato'ob. ¡Mix ba'al cu páajtal u ca'anbesic jun xéet' che'!

⁹U kuobe' jach chéen plataob, taasa'an tac tu caajil Tarsis yéetel oro taasa'an tu caajil Ufaz; ba'alo'ob beeta'ano'ob tumen j póolche'ob yéetel tumen máaxo'ob cu meyajtico'ob oro yéetel búucbesa'ano'ob yéetel bonbil chac nooko'ob láili' chéen j chuy nooko'ob j beete'.

¹⁰Yuumtzile', leti' jach u jaajil Ku, Ku cuxa'an mix bikin cu bin xu'ulul u ajawil. Le quéen p'ujuque' cu quiquilanquil lu'um, le caajo'obo' ma' tu páajtal u mukyajtico'ob u p'u'ujul.

¹¹(Te'exe', Israelitaex, a'ale'ex ti' le j ma' ocsaj óolo'obo': Le kuob ma' tu beetajo'ob lu'um mix ca'ane' yaan u xu'ulsa'alo'ob way j lu'ume'; mix jun túul bíin p'áatac yáanal ca'ani'.)

¹²Yuumtzil yéetel u páajtalile' tu beetaj lu'um; yéetel u yojéelaje' tu jedzaj yóokolcaab; yéetel u na'ate' tu sincuntaj ca'an.

¹³Yéetel u jaadz cháaque' cu beetic u quíilbal le ja' te j ca'ano' cu beetic u na'acal le múuyalo'ob líikbal tu xuul lu'um, cu beetic u léenbal chúumuc le cháaco', yéetel cu jóokesic le iik tu'ux u ta'acmajo'.

¹⁴Tuláacal wíinique' j ma' na'at mix ba'al u yojel xan. Le beetbil kuobo' cu tusico'ob máaxo'ob beetico'ob; u yoochelo'ob tuus, mina'an u cuxtalo'ob;

¹⁵ba'alo'ob mina'an u tojolo'ob, chéen meyaj che'ejo'ob, Yuumtzil bíin xu'ulsico'ob tu kiinil p'is óol.

¹⁶¡U Ku Jacobe', asab nojoch u páajtal ti' tuláacal ba'al! Leti' j yéey Israel bey ba'al u ti'ale'. U kaaba'e': Yuumtzil, u yuumil tuláacal páajtalil.

¹⁷Teech beya', jun p'éelech caaj bakpachta'ane'ech tumen aj ba'atelo'ob, mol a nu'uculo'ob.

¹⁸Tumen Yuumtzile' cu ya'alic: Bejela'e' bin in ca'aj in náachcuntic u cajnáalilo'ob le múuch' caajo'oba'. Bin in ca'aj in beet u máansico'ob sajaquil, u ti'al in wil wa beyo' je'el u nactáantiqueno'obe'.

¹⁹¡Yaj in wanil, tumen ichil nakan yajil yanilen! ¡Ti' in yajilo'obe' mina'an dzaac! ¡Tene' tin tucultaj je'el ca'ach u páajtal in mukyajtic le ki'inamila'!

²⁰In chuybil naje' láaj pa'aba'an, tuláacal u suumilo'obe' co'oco'otza'an. In paalale' dzo'oc u p'atqueno'ob, ¡mina'ano'ob tin wicnal! Mina'an mix máac ca páatac u ca'a líikesic in chuybil najo'ob, ca yanac máax u sincunt u nookilo'ob.

²¹U aj canano'ob le caaja' j ma' na'ato'ob; ma' táan u caxtico'ob Yuumtzil, Le t o'olal ma' xi'ic utzil ti'obi', tuláacal xan u j tamano'obe' dzo'oc u ki'itpajalo'ob.

²²¡Ch'en xiquinene'ex! ¡dzo'oc u kuchul jun p'éel péectzil! Ti' jun p'éel u múuch' caajilo'ob j xamane' cu taal jun p'éel ka'amcach juum bin u ca'aj u sut u caajilo'ob Judae', jun p'éel x tocoy lu'umil tu'ux chéen bíin cajlac u peekilo'ob káax.

²³Yuumtzil, tene' in wojele' xiibe' ma' u yuumil u cuxtali', mina'an u páajtalil u yéeyic bix cu bin j xu'ulul.

²⁴Jadzo'on je'el bix a ti'ibil bejile', ma' yéetel p'uja'anili', tumen je'el a xu'ulsico'one'.

²⁵Pul a p'u'ujul yóokol le caajo'ob ma' u kaj óolecho'obo', yóokol le caajo'ob ma' tu kultiquecho'ob, tumen dzo'oc u láaj xu'ulsico'ob u caajil Jacob, dzo'oc u p'atico'ob x tocoyil le múuch' caajo'oba'.