Read Yucateco Jeremías 11 Bible Online

Jeremías 11 - Yucateco bible

Jeremías 11

¹Yuumtzile' tu t'anajen, teen Jeremías, ca tu ya'alaj ti' téen:

²Le israelitaobo', ca u ch'en xiquinto'ob ma'alob ba'axo'ob cu ya'alic le nup t'aana'. T'aan u cajnáalilo'ob Judá bey xan u cajnáalilo'ob Jerusalén,

³ca wa'al ti'ob, téen Yuumtzil u Ku Israel, quin loolob t'antic máax ma' tu dzo'ocbesic ba'axo'ob cu ya'alic le nup t'aana'.

⁴Leti' le nup t'aan tin beetaj yéetel a máanja'an ch'i'ibalo'ob le ca tin jóokesajo'ob Egipto, u ti'alo'ob ca'ache' le lu'umo' bey jun p'éel chujcab tu'ux cu yi'ibil hierroe'. Tin wa'alaj ti'ob ca u dzo'ocbeso'ob tuláacal ba'axo'ob quin wa'alic, beyo' te'exe' bíin in caajalte'ex, tene' bíin a Kuiltene'ex.

⁵Wa te'ex ca wu'uyique'ex in t'aane', tene' bíin in béeycunt le jalach t'aan tin beetaj ti' a máanja'an ch'i'ibale'exe', in dzáic ti'ob jun p'éel lu'um, leti' le lu'um tu'ux yano'ob bejela'a', tu'ux cu yáalcab u kaab yiim wacax yéetel caab, bey u yáalcab ja'e'. Tene' tin núucaj: Bey, Yuumtzil.

⁶Yuumtzil túune' tu ya'alaj: Le péectzila' ka'ayt tu caajilo'ob Judá yéetel tu bejilo'ob Jerusalén. A'al ti' le máaco'obo': U'uye'ex ba'axo'ob cu ya'alic le nup t'aana', dzo'ocbese'ex xan.

⁷Le ca tin jóokesaj tu lu'umil Egipto a máanja'an ch'i'ibale'exe', tin kuben t'antaj ti'ob ca u dzo'ocbeso'ob, líikbal ti' le kiino'obo' tac bejela'e' cu bíin in kuben t'antic.

⁸Ba'ale' ma' tu táan óoltajeno'obi' mix tu dzo'ocbeso'ob in t'aani', ba'ale' tu yo'olal u dzu'uyil u poolo'obe' tu cha'ajo'ob u jíilta'alo'ob tumen u kaakas óolalilo'ob u pucsi'ikalo'ob. Ma' tu yóoltajo'ob u dzo'ocbeso'ob ba'axo'ob tin wa'alaj ti'obi', ca tin beetaj u taal yaayaj jadzo'ob dzíibta'an te j nup t'aano'.

⁹Yuumtzile' tu ca'a a'alaj ti' teen: U cajnáalilo'ob Judá bey xan u cajnáalilo'ob Jerusalene' cu mucul t'aano'ob u ti'al u beetico'ob ti' teen kaas.

¹⁰Dzo'oc u suuto'ob ti' u yúuchben kebano'ob u máanja'an ch'i'ibalo'ob, máaxo'ob ma' tu yóoltajo'ob u yu'ubo'ob in t'aani', ca j bino'ob tu paach u láak kuob ca tu kultajo'ob. Je'el bix Israele' bey judá, tu manba'alcuntajo'ob le nup t'aan tin beetaj tu yéetel u máanja'an ch'i'ibalo'obe'.

¹¹Tu yo'olale' yaan in túuxtic jun p'éel noj yaj, mix máac cu bin u jeche. Quex buca'aj ca awatnaco'ob u ti'al u káatico'ob áantaj, ma' bíin in wu'uyo'obi'. Teen Yuumtzil, teen a'alic.

¹²U cajnáalilo'ob túun Judá yéetel u cajnáalilo'ob Jerusalene' yaan u bino'ob u káato'ob áantaj ti' u kuob le máaxo'ob cu kubico'ob poom, ba'ale' leti'obe' ma' bíin páatac u toquico'ob le quéen kuchuc le noj yajo'.

¹³U kuob Judae' ya'abo'ob je'el buca'aj ya'abil u caajilo'obe', u cajnáalilo'ob Jerusalén dzo'oc u beetico'ob ya'ab u multuunil kultaj je'el buca'aj ya'abil u bejilo'ob le caajo', u ti'al u tóoquico'ob poom ti' baal.

¹⁴Teche' Jeremías, ma' a káatic utz tu yóolal le caaja', mix a payalchi', mix a káat óolal tu yo'olalo'ob, tumen ma' bíin in wu'uy le quéen a káat áantaj tu kiinil le noj yajo'.

¹⁵¿Ba'ax cu caxtic tin kulnaj Israel in wéet bisajbáa, cu dzo'ocol u beetic ba'al talam kaas? ¿Cu tucultic wa iquil u kubic tzaatzel yéetel bak bey quíimsbil ba'alche' bin u ca'aj u beet u náachtal le noj yaj, bíin xan u toquicubáa?

¹⁶Ti' u láak kiino'obe' teen, Yuumtzil, quin t'anic ca'ach olivo piim u le' bey xan qui'ichquelemtac u yicho'ob; ba'ale' bejela'e' ichil u juum cháaque', in ca'aj in tóoc u le'ob yéetel in je'ejekic u kabo'ob.

¹⁷Teen Yuumtzil u yuumil tuláacal páajtalil, teen máax pake dzo'oc in túuxtic noj yajil tu yóolal buca'aj kaas tu beetaj Israel yéetel Judá, tumen tu poch'ajeno'ob iquil u tóoquilaco'ob pom ti' Baal.

¹⁸Yuumtzile' tu dzaj in wojéelt in aj p'eec óolo'obe', táan ca'ach u jok jo'oltico'ob u beetico'ob teen kaas. Leti'e' tu p'ilaj in wich, u ti'al in wilic.

¹⁹Tene' jedza'an in wóol ca'ach, bey jun tuul j taman cu bisa'al tu cúuchil quíimsaje', mix in wojel ba'ax cu tuculta'al tin wóokoli'. Cu ya'alico'ob ca'achi: Cone'ex ch'aquic le che' bejela'a yaan u muuke'; jocbil unaj c beetic way yóokolcaabe', u ti'al ma' u ka'ajal ti' mix máac.

²⁰Ba'ale' teche' Yuumtzil, u yuumilech tuláacal páajtalil, teche' jun túulech ti'ibil bej aj p'is óol. Teche' a kaj óol tac u dzu' le ba'ax u ta'acmaj wíinic. P'at in wilic bix ca bin a jadz le máaco'obo', tumen dzo'oc in kubic in kuuxtal ta kab.

²¹U j xiibile'ex u caajil Anatot, máaxo'ob cu caxtico'ob ca'ach in quíimile', tu wet'ajo'ob xan in t'aan tu kaaba' Yuumtzil, wa ma' in káat ca'ach ca u quíimseno'obe',

²²Yuumtzil u yuumil tuláacal páajtalile' cu ya'alic ti'ob: Bin in ca'aj in bo'ot ti' te'ex ba'ax ca najmatique'ex: le táanquelemo'ob bíin quíimico'ob ichil ba'atel, a j xibil paalale'ex yéetel x ch'upul paalale'ex wi'ij bíin quíimsico'ob.

²³Ma' bíin p'áatac mix jun túuli', tumen yaan u kuchul u kiinil in bo'otique'ex u j xibile'ex u caajil Anatot, bíin in taas ta wóokole'ex noj yajil.